Dhowera Dhaarumiwi 26:1-32
26 Agiripa omwaddela Pawulo egihina: “Vano we ohuvahiwa ofuru wowoga muladdu onniwena.” Nuwindo, Pawulo otapula nlada ni obajha wibarela egihina:
2 “Mwene Agiripa, wodhela dhithu dhatedhene gininkedhiwimi ni maJudewu, miyo ginohagalala okala vamentoni veenyu peeno teto mwaha wogenya wihina giibarele,
3 thabwa-thabwa mwaha nyu muhunona dhilamalelo ni dhithu dhinakanganela maJudewu. Bumwahaya, ginulobani wihina mugipwasedhe ogivuruwana pama.
4 “Mwebaribarene, wodhela mweddelo gannimina obajha ezombwe yaaga, vaari va nlogo naaga, oJeruzale ni va maJudewu aatene,
5 eginonne pamadhene obajha kale ni enonne wihina gibaliwe ninga nFarizewu mowiwanana nnikuru nooviheya na gereja* yehu; aliwa yafuna podi okalela onamoona dhithu ndha ginawogimi.
6 Mbwenye, peeno ginna otorihiwa mwaha wa ejhehedho ginnimina, yeyo Mulugu apaganyiye makolo ehu,
7 bumpaganyo yola mmodhave onakwanela mahimo ehu 12 enajhehedhiwa woona, emparelaga mabasa ootaleleya nuuviheya, mutana ni mahiyu. Mwene, sijhehedho yeela yaathukulele maJudewu ogisumela.
8 “Mwahaya bwaddi nyu mwahirumedhaga wihina Mulugu onowavenyiha anookwa?
9 Kale, miyo gahikanna ebaribari wihina gohowela olabihedha kopolo dhaaga dhatedhene wihina giharahare ndina na Yesu, Munazarenu.
10 Siyela gerilimina oJeruzale. Gihafugela mukambura anamahara * owinjhiva, mwaha miyo gahenyiwa ni anddimuwa aanamakutha wapara mabasa yaala; teto yaafunaga opiwa miyo gookalela onamoona.
11 Mmasinagoga mwatemwene gaafwanya, miyo gowasinyusa wihina eselele omuroromela Kiristu. Woona wi gahithabwa wanyanyuwela, gahaharahara ofiyedha sidadi * dhimodha wathaweliwa.
12 “Ni efunelo yeela, miyo omaga olenddo odhowaga oDamasku ni kopolo vamodha ni owedha gaavahiwimi ni anddimuwa aanamakutha.
13 Mwene, ngaali mudila mudhidhi wamutana, miyo woona waara wakopolo wadhela odhulu okwaranya nduwa, omoneya mburo vaalimi ni vaali athu ale yaali vamodha ni miyo.
14 Mwaha wa yeyo iyo aatene otongwa, voharela miyo wiwa ndhu nawoga ni Ebarayiku negihina: ‘Sawulu, Sawulu onagiharaharela ddi? Wawanaga ni miyo, anoona goyi diwe.’
15 Miyo okoha gegihina: ‘Nabwiya nyuwa muli aani?’ Nabwiya ogaakula egi: ‘Miyo gili Yesu ole onamuharahariwe.
16 Vano kavenya wimele. Miyo gidhile wihina guusakule ninga mudhaari ni namoona a dhithu woniliwe ni dhithu ginafunimi wuwoniha wodhela miyo.
17 Miyo ginere wuwobola vaari va nlogo nna ni malogo ginafunimi wurumawo
18 wihina waafugule mento ni wawobole muyihini wihina ekale mowaara ni wawobole mmadani mwa Saddana wihina ekale mmadani mwa Mulugu, vano yaande oleveleliwa dhothega dhewa ni yaakele mukono wa nihimo noweela ninna nroromelo ni miyo.’
19 “Mowindo mwene Agiripa, miyo kagivanyile dhithu ndhe goonilimi dhadhela odhulu,
20 mbwenye gaabanjhe walaleya athu oDamasku, nuwindo ooJeruzale ni a murudda dhatedhene dhooJudeya ni athu a malogo wihina ethwaruwe ni emuhogolowele Mulugu, yindo yaaparege mabasa eniwanana ni othwaruwa.
21 Bumwahaya maJudewu edhe egihiddege mutempulu * mwewa efunaga ogipa.
22 Woona wihina Mulugu anna ogikavihera ofiyedha peeno, ginna wavahave onamoona anamwani ni makolwiwaya, teto kaginawoga ethu yahiwogile Anamavuhulela obe Moyizeji wihina yere opadduwa yegi:
23 Kiristu eere woona goyi, teto ninga muthu oobajha ovenyihiwa muukwani, eere walaleya wihina adhena waara vaari va nlogo nna ni athu a malogo mamodha.”
24 Wula Pawulo awogagave wodhela wibarela waye, Festu owoga ni ndhu nootama egihina: “We Pawulo onafuna osavuwe! Enonelo yawo enna wusavusa!”
25 Mbwenye Pawulo wakula egihina: “Oothithimiheya Festu, miyo kaginosavuwa ginawoga madhu eebaribari ni mubuwelo wapama.
26 Mwebaribarene, mwene ginamuwogimi ni murimaga wamutene ohunona pamadhene dhatedhene ginawogimi; teto gihikanna ebaribari wihina kawo ethu newene modha mwahiwalinyu, mwaha kaawo madhu ewogiwe moviteya.
27 Mwene Agiripa, munowarumedha madhu aanamavuhulela? Gihinona wihina ni nyuwa munowarumedha.”
28 Mbwenye, Agiripa omwaddela Pawulo egihina: “Wahanle vang’ono wihina ogidahinye murima ni miyoya gikale Mukiristawu.”
29 Nuwindo, Pawulo omwakula egihina: “Miyo ginomuloba Mulugu wihina vilegele-vihilegele ohiya nyuweneve, mbwenye aatene yaala enagivuruwana peeno esaddule murima dhewa ekale ninga miyo, mbwenye yahimagiwe ni makurenti ninga yaala gimagiwimina.”
30 Vano mwene ovenya ni musadoro Berenisi vamodha naathu yakaratile nuliye.
31 Mudhidhi ekumaga, wambela owoga vikaleliwa yegihina: “Mulobwana ole katheegile ethu anafwaneleliye opiwa obe ofugeliwa mukambura.”*
32 Nuwindo, Agiripa omwaddela Festu egihina: “Mulobwana ole ahere ahiloba wihina adhowiwena wa Sezare, eere otapuliwa.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “makalelo owebedha.”
^ Obe: “oweela.”
^ Obe: “luwani.”
^ Obe: “nyumba ya Mulugu.”
^ Obe: “mukadeya.”
