Dhowera Dhaarumiwi 4:1-37
4 Mudhidhi yole aabilene ewogagave ni nlogo, anamakutha, namaholela amutempulu ni Asadusewu, wawaddamela.
2 Aliwa yaali ootakaleliwene mwaha arumiwi yera ohudhiha nlogo vaari vaathu wodhela ovenyihiwa wa Yesu muukwani.
3 Nuwindo, aliwa wahidda wavokedha mukambura ogona mwemmo mwaha vati vahimala oriba.
4 Mbwenye, athu yavuruwanile mwaha wewa wavathaddo orumedha, aatene yavuruwane yahakwana 5000.
5 Labo noharela, anamathonga, anamaholela ni anamaleba otugumana oJeruzale,
6 vaakaleliwa, ahikalavo Anaji aali munddimuwa aanamakutha, Kayifaji, Juwawu, Alixandere ni athu aatene a emudhi ya munddimuwa aanamakutha.
7 Omuthukula Peduru ni Juwawu, wapweha vaari vewa ni wakoha yegihina: “Nyu munerana dhithu ndha ni ndina nawani obe ni kopolo dhawani?”
8 Vano Peduru odhaaleliwa muzimu wotxena, ni owoga egihina:
“Nyu anamasogolela a nlogo ni anamaholela,
9 akala peeno munthukulele vala wihina munikohe mwaha opama nimwerelihu mulobwana ola ooragala, vano munafuna mmunone muthu afiyedhe onvulumusa,
10 nyu vamodha ni nlogo naatene nowiZarayeli munone wihina mwa ndina na Yesu Kiristu Munazarenu ole mumpilinyu vantxikwani, mbwenye Mulugu anvenyiha muukwani, hee, mulobwana ola ali vamentoni veenyu, avulumusiwe ni ndina naaye.
11 Yesu yoyo dili ‘Nibwe ameesili ekoddiliwa, mbwenye nihidha okala nibwe nolibiha nyumba.’
12 Ohiya eyo, kawo muthu mmodha anna owedha wovulusa mwaha velaboni yavati kaniwo ndina nimodha nivahiwe athu nenno nnafunihu ovulusiwela.”
13 Nuwoona oliba murima wa Peduru ni Juwawu, teto nuwona wi yaali athu yahathabwile ohudhera ni yooniwa ninga athu bure-bure, aliwa otikina vanlubale. Vano foneliwamo wi Peduru ni Juwawu yaheedda ni Yesu.
14 Aliwa kuukanna yowakula, mwaha yoomoona mulobwana ole avulumusiwe agaali vamodha naaliwa.
15 Nuwindo, aliwa waruma wihina ekumemo muSinediriyu, vano aliwa nuhala obajha okanganela muselu ole vakaleliwa;
16 yokohana yegihina: “Alobwana yaala nawerena ddi? Mwaha mwebaribarene wodhela aliwa, eherana yintelelo yooniwe ni athu aatene enakala oJeruzale teto ni iyoya nnorumedha.
17 Vano wihina muselu ola wahithabwe ovuwa, naathuse ni naakoddihe wihina yahalaleyege athu amodha wodhela ndina nenna.”
18 Nuwindo, aliwa wawithana ni wakoddiha wihina yahiwoge ethu newene yahihudhihe wodhela ndina na Yesu.
19 Mbwenye Peduru ni Juwawu wawakula yegihina: “Mpendde mwaannya akala sapama vamentoni va Mulugu wuvuruwanani nyu, ohiya onvuruwana Mulugu.
20 “Mbwenye iyo, kannaaselele owoga dhithu nonilihu ni niwalihu.”
21 Nuwindo, numala waathusa, aliwa watapula mwaha kayafwannyena muladdu wathukulele osinyusiwa ni mwaha yowoova nlogo, woona wi athu aatene yomuthithimiha Mulugu mwaha wa ethu yapadduwe.
22 Mulobwana ole avulumusiwe ni matikiniho yereye, ahikanna yaka dhokwaranya 40.
23 Nuumala otapuliwa, odhowa ogumana ni anamahara amodha ni wawaddela dhithu yaddeliwiwa ni anddimuwa aanamakutha vamodha ni anamaholela.
24 Nuwawiwa madhu yala, aliwa olobela wa Mulugu vamodha, yegihina:
“Nabwiya munlubale, di nyu apaddusile elabo yodhulu, yavati, niya ni dhatedhene dhilimo,
25 ni wodhela muzimu wotxena muwogilinyu nnikolo nehu Davidi mudhaari enyu, mwegihina: “Mwahaya bwaddi athu amahimo amatene edhe ekalege othuwathuwene teto nlogo nigapendda dhithu dhohukanna mabasa?
26 Mamwene a velaboni yavati ehikarati vampaddoni vewa, anamathonga ehimurugunuwela Yehova ni oothikitheliwa aye.’
27 Mwebaribarene, Erodi vamodha ni Ponsiyu Pilatu ehitugumana sidadi yela ni athu a mahimo aamatene ni nlogo naamwaana Izarayeli, omurugunuwela mudhaarinyu oweela Yesu, yoyo mmuthikithelinyu,
28 wihina yakwanelihe ele kopolo ni efunelo yenyu mwanninyuna kale.
29 Vano, Yehova, kasugwani makalelo enanithusiwa, mwakavihere adhaari enyu wihina yahiselele walaleya madhu enyu nuuliba murima,
30 mudhidhi mmodhave, mutapule nlada neenyu wihina mwavulumuse athu wula yereyaga matikiniho wodhela ndina na mudhaari enyu oweela Yesu.”
31 Nuumala olobela, mburo yatugumaniwavo oddiginyeya, vano aatene yalivo odhaaleliwa muzimu wotxena obajha owoga nuuliba murima.
32 Ohiya eyo, muthithi waathu warumedhe, wanna murima mmodhave ni mubuwelo mmodhave teto kaavo awoga wi dhithu anniyena saye baahi, mbwenye yogawana dhithu dhatedhene yanniwana.
33 Vano arumiwi yodhowave ni kopolo dhatedhene elaleyaga wodhela ovenyihiwa muukwani wa Nabwiya Yesu, teto aatene yoreelihiwa vanlubale ni opama wohinifwanelela.
34 Mwaha vaakaleliwa kaavo ahowela ethu-siithu, woona wi aatene yanna munddadhiwa obe nyumbadhiwa yaguliha korowadha yodhana
35 ni yoopeleka mmadani mwa arumiwi. Yamala, yogawana mowiwanana ni ele kadda muthu ahoweliye.
36 Juze werana emodhave yoyo arumiwi yamwiithaniwa Bernabe (enatapulela “mwaana ootodola”) aali mulevita akala oXipere,
37 ahikanna terenwaye, oliye oguliha, korowadha odhana opeleka mmadani mwa arumiwi.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
