Dhowera Dhaarumiwi 5:1-42
5 Nuwindo, mulobwana dhaala ithaniwa Ananiya ni mwariye Safira, oguliha munddiwa.
2 Mbwenye oliye opangana ni mwariye, ovugulavo korowadha aliwa okoya. Vano othukula korowa dhahanle odhowa opeleka mmadani mwa arumiwi.
3 Mbwenye Peduru omukoha Ananiya egihina: “Wandile addi omwihiya Saddana wuleketha ofiyedha othegela muzimu wotxena mwamakalelo abure ni okoya korowa dhimodha ogulihiwe mundda?
4 Mundda ole kawali wawo? Vano ogagulihe korowadha kadhaali dhawo? Mwaha bwaddi odhe wubuwelege mmurimani mwawo werana ethu ninga yela? We kumulekethile muthu mbwenye omulekethile Mulugu.”
5 Nuwawiwa madhu yaala, oliye omora okwa. Vano athu aatene yiwale ethu yampadduwele wambela woova vanlubale.
6 Nuwindo, odha azombwe omuthukula ni ompotha veesalani; aliwa omukumelana ode odhowa onvuhela.
7 Nuuvira mawora mararu, mwariyeya ovolowa, ahinonaga ethu baani yapadduwa.
8 Peduru omukoha egihina: “Kagaddele: Nyu aabilene muhuguliha mundda kahiyo?” Oliye wakula egihina: “Hee, korowadha sidhendho.”
9 Nuwindo, Peduru omukoha egihina: “Mwaha bwaddi nyu aabilene mudhe mpanganege weha muzimu wa Yehova? Manyalo aathu envuhele mamuno eli vamulago; aliwa enere wukumelana ode.”
10 Mudhidhi mmodhave, oliye omora ni okwa. Azombwe ale nuuvolowa, enfwanye agakwile; aliwa omuthukulela ode odhowa onvuhela waddamana ni mamune.
11 Nuwindo, mulogo watene ni athu yiwale yopadduwa ele, aliwa wambela woova vanlubale.
12 Ohiya eyo, wodhela nlada na arumiwi matikiniho odhowagave yereyaga vaari va nlogo; athu aatene otugumana mukodde mwa Salomawu.
13 Ebaribari wihina kaavo muthu andile oliba murima wihina itaganyihedhe naaliwa, mbwenye nlogo nowawoga opama arumiwi.
14 Kahi yeyove baahi; athu owinjhiva alobwana ni ahiyanaya obajha omurumedha Nabwiya vano nikuru na arumiwi wambela wunnuwa.
15 Athu ala, yowathukulela areddiwa ode, murampani ni yowakinantiha vakamani, voolilini wihina Peduru aaviraga muruntive ole baahi wafwanyege aredda amodha.
16 Ohiya eyo, athu owinjhiva yaddamele sidadi dho Jeruzale, yowadhana areddiwa ni amodha yonihiwa goyi ni ademoniyu, aatene yaala yoovulumusiwa.
17 Mbwenye, munddimuwa aanamakutha naale yaali a nikuru naaSadusewu wambela wakalela nrima.
18 Vano, aliwa wahidda arumiwi ale wavokedha mukambura.
19 Mbwenye emahiyu, mungero a Yehova ofugula musiwo dhamukambura, wathukulela ode ni wawaddela egihina:
20 “Kadhowani, mwavolowe mutempulu ni munaseelele ohudhiha nlogo muthenga dhatedhene wodhela egumi.”
21 Numala wawiwa madhu ala, vati nuusa aliwa ovolowa mutempulu wambela ohudhiha.
Munddimuwa aanamakutha ni athu amodha yaali vamodha nuliye, otugumana Sinediriyu yaatene ni wawithana anamaholela aatene Amwaana Ezarayeli, aliwa oruma wihina edhiwena arumiwi ale yaali mukambura.
22 Vano, anamasugwera nufiya mukambura mune, kayafwannyemo. Nuwindo, aliwa nuuhogolowa wawaddela yegihina:
23 “Nifwanye musiwo dhamukambura dhigaali dhofugiwadhene, anamasugweraya egaali owimelene vamusiwoni mbwenye iyo nufugula mukamburamwa, kaninfwanyemo muthu.”
24 Anamasogolela a mutempulu ni anddimuwa aanamakutha nuwawiwa madhu yaala, kuukanna yowoga, wambela wikoha ethu yapadduwe vasogolova.
25 Mbwenye ofiya mulobwana dhaala wawaddela egihina: “Athu ale mwaafugelinyu mukambura eli mutempulu enna ohudhiha nlogo!”
26 Vano, namasogolela a mutempulu ni anamasugweraye odhowa wahidda, mbwenye mwamakalelo apama, mwaha yoova wihina nlogo nnadha naapwese ni mabwe.
27 Aliwa nuuwadhana, wapweha osogolo wa Sinediriyu. Vano munddimuwa aanamakutha wakoha
28 egihina: “Iyo nihuwaddelani negi kamuhudhihe mulabihedhaga ndina nno, mbwenye kasugwani! Nyu muhudhaliha sidadi yo Jeruzale ni dhohudhiha dhenyu, ni munafuna munthukulihe nibili mwaha wa mulobwana oyo.”
29 Peduru ni arumiwi amodha waakula yegihina: “Nnohowela omwiwelela Mulugu ninga namathonga ohiya athu.
30 Mulugu a makolo ehu ohunvenyiha Yesu, yoyo mumpilinyu ni mmutomeya vantxikwani.
31 Mulugu ohumuthithimiha ni ompweha moono waye woojha ninga Namasogolela Munlubale ni Nvulusi wihina aakavihere Amwaana Ezarayeli othwaruwa ni oleveleliwa dhoothega dhewa.
32 Iyo vamodha ni muzimu wotxena Mulugu aavahiliye ale enamwiwelela ninga namathonga nili anamoona a dhithu ndha.”
33 Egawiwale madhu yaale yawogiliwa, aliwa otakaleliwa ni ofunaga waapa.
34 Mbwenye vaari va Sinediriyu ovenya nFarizewu dhaala ithaniwa Gamaliyeli namahudhiha a malamulo athabwa othithimihiwa ni nlogo naatene, oliye oruma wihina alobwana ale erajhihe okumihedhiwa ode mudhidhi vang’ono.
35 Nuwindo, oliye wawaddela egihina: “Nyu anlubale oWizarayeli, pole-pole ni dhithu munafuninyu wawerela alobwana ala.
36 Motajhiha, malabo a mundduli ahikumelela mulobwana dhaala ithaniwa Tewuda, iwoona ninga munlubaleya, vano athu owakwana 400 witaganyihedha nuliye. Mbwenye oliye opiwa teto anamaharaye aatene obalalesiwa newene kidhowile vasogolo.
37 Nuwindo, malabo athu elebeliwaga okumelela muthu mmodhaya ithaniwa Judasi, muGalilewu, nuliyeya wasayela anamaharaye. Mulobwana oyo opiwa teto aatene yamuhara obalalesiwa.
38 Bumwahaya wodhela muselu ola, ethu ginafunimi wuwaddelani siila: “Mwatapule alobwana ayo, mwaahiye yeeddege ni murenddele. Mwahaya bowi, akala mabasa ayo enapariwa baathu, kinaadhowe vasogolo;
39 mbwenye, akala ba Mulugu nyu kamunande wamaaliha. Teto mwahubuwelavo pama podi wera munawana ni mwinnyene Mulugu.”
40 Nuwindo, aliwa orumedha yolaga yaye. Oruma wihina yithaniwe arumiwi ale, numala wawukutha, wawaddela wihina eselele olabihedha ndina na Yesu, vano aliwa wahiya.
41 Vano, aliwa okumamo muSinediriyu mune ohagalalene mwaha yahooniwa ninga oofwanelela wodhela onyemuliwa mwaha wa ndina naaye.
42 Teto, kadda labo, mutempulu ni nyumba ni nyumba, kiyaselele ohudhiha ni olaleya muthenga dhapama wodhela Kiristu, Yesu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
