Dhowera Dhaarumiwi 6:1-15
6 Malabo yaale, nikuru naanamahara wenjhedhedheyagave vano majudewu yawoga egerego wambela wunliha dhammurimani mwaha majudewu yawoga ebarayiku, woona wi dhagawiwaga dhoojha dha kadda labo amamukwele ewa yera olupiwa.
2 Mwaha wa yeyo anamahara ale 12 otugumana muthithi ole wa anamahara ni owoga yegihina: “Kahiyo ethu yapama wahiya madhu a Mulugu wihina nagawelege athu dhoojha.
3 Bumwahaya, addibila, vaari veenyu mwasakulevo alobwana 7 enna mweddelo wapama, edhaaleliwe muzimu wotxena ni enna enonelo, vano iyo nnere wathoma wihina yaaparege mabasa yaala ofuneya.
4 Mbwenye iyo nnere wivelela wihina nlobelege, ni walaleya madhu a Mulugu.”
5 Madhu yawogiliwa wahagalasa athu aatene a muthithi yoole, vano aliwa omusakula Estevawu mulobwana anna nroromelo ninlubale ni muzimu wotxena, vamodha ni Filipi, Porokoro, Nikanori, Timawu, Parmenaji ni Nikolawu aarumedhe okala mukudda Antiyokiya.
6 Aliwa wathukulela vaali arumiwi, vano numala olobela, watapulela malada.
7 Nuwindo, madhu a Mulugu othabwagave olaleyiwa, teto nikuru naanamahara wenjhedhedheyagave oJeruzale. Vano muthithi waanamakutha wambela okanna nroromelo.
8 Vano Estevawu, adhaleliwe mahala a Mulugu ni kopolo, owawerana matikiniho manlubale vaari va nlogo.
9 Mbwenye athu amodha yaakumile mburo withaniwa Sinagoga yaathu Ootapuliwa, ni athu amodha ooSireni ni owAlixandiriya, ni amodha oSilisiya ni oAziya, odha wihina ekanganege ni Estevawu.
10 Mbwenye, kiyandile ogonjhiha enonelo ni muzimu wamukavihera owoga.
11 Vano, aliwa moviteya watujela alobwana amodha owoga yegihina: “Iyo nihimwiwa awogaga madhu oruwana wodhela Moyizeji ni Mulugu.”
12 Aliwa owaddihedha nlogo, anamaholela ni anamaleba wihina; emuhidde ni emuthukulele osinediriyu.
13 Wadhana anamoona owoota yawogile yegihina: “Mulobwana ola kanamaala wawoga madhu oruwana wodhela mburo yoola woweela ni Nlamulo.
14 Motajhiha, iyo nihimwiwa awogaga wihina Yesu, yoyo Munazarenu, anere ogujhula mburo yoola ni anere osaddula dhilemelelo anaaddenle Moyizeji.
15 Vano, athu aatene yakaratile Musinediriyu omusugwa pamadhene Estevawu ni woona wihina kove yaye yaligana ni kove ya mungero.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
