Karta naalebeliwe akudda Efeziyu 1:1-23
1 Miyo Pawulo, murumiwi a Kiristu Yesu wodhela efunelo ya Mulugu, ginaalebela addibila oweela enafwanyeya oEfezu eli mwimodhani ni enamuroromela Yesu Kiristu:
2 Opama wohinifwanelela ni murenddele onadhela wa Mulugu Babihu ni wa Nabwiya Yesu Kiristu, okale ni nyu.
3 Oothithimihiwa akale Mulugu ni Babi a Nabwiya ehu Yesu Kiristu, mwaha oliye ohunireeliha mowiwanana ni Kiristu ni mareeliho mateene oomuzimuni enadhela odhulu,
4 wodhela onisakula elabo ehinathi opaddusiwa wihina nikale mwimodhani ni Yesu, ni makalelo yayo nikale oweela nihinna nihonya vamentoni va Mulugu mwaha wodhivela.
5 Mwaha oliye ahithoma wihina noniwege ninga anaaye wodhela Yesu Kiristu, mowiwanana ni efunelo yaye ni ele enamuhagalasa,
6 wihina athu emuthithimihe Mulugu mwaha woomulabihedha Mwanaye amudhiveliye wihina anoonihe opama waye wohinifwanelela.
7 Wodhela oliye nihitapuliwa mwaha wa yowobola, teto mwaha wa nikame naye, hee, nihileveleliwa dhothega dhehu, mowiwanana ni opama waye wohinifwanelela othabwile winjhiva.
8 Oliye ohunivaha opama ola wohinifwanelela, nthotho dhaatedhene ni enonelo yaateene
9 mwaha onaaddela yoviteya yotaleleya ya efunelo yaye. Mowiwanana ni ele yamudhivela, mwinnyene othoma werana ele afuniye eli
10 osogolela dhithu dhaatedhene mwamakalelo owegeredheya, teto eyo enaapadduwe mudhidhi athomiliye wihina atugumanye dhithu dhaatedhene dhodhulu ni dhavelaboni yavati wihina dhimwiwelelege Kiristu,
11 yoyo nilihu mwimodhani teto Mulugu anithomiliye wihina naakele vamodha ele anipaganyiye. Oliye ohunisakula mowiwanana ni efunelo yaye, mwaha aneerana dhaatedhene ninga munafuneliye
12 ofiyedha iyo nili oobajha omujheha Kiristu, ninvuwihe Mulugu ni nthithimiho.
13 Mbwenye nyu numala wawiwa madhu eebaribari ni muthenga dhapama wodhela ovulusiwa weenyu, wambela omujheha. Vano nyu nuumala orumedha, Mulugu olabihedha muzimu waye wotxena apaganyiliye wihina uvaheni yintelelo. Amulabihedhaga Kiristu wihina erena eyo,
14 oli mpaganyo wohanganyedheya wa dhithu Mulugu anipaganyiliye onivaha. Mulugu oherana eyo wihina ande oliva muthengo wathukulele nlogo naye okala notapuwa, teto mwaha wa yeyo Oliye anerege othithimihiwa vanlubale.
15 Bumwahaya nimiyoya nuuwiwa wodhela nroromelo munninyuna nNabwiya Yesu ni odhivela munawoonihinyu addibila oweela,
16 kaginamala omutamalela Mulugu mwaha weenyu. Ni kaginahiya wuromolani mmalobeloni mwaga,
17 wihina Mulugu a Nabwiya ehu Yesu Kiristu, Babi oothithimiheya, uvaheni muzimu wa thotho ni wonelamo dhovuhulela wodhela okanna enonelo yaye yowakwanela.
18 Oliye ohufugula mubuwelo weenyu* wihina nyu mwande onona ejhehedhelo Mulugu uvahiliyeni nuumala wuwithanani
19 ni wonelamo makalelo kopolo dhaye anivahiliye iyo ninna nroromelo, dhiliwa dhinlubale. Kopolo dhaye dhinlubale dhinowoneya wodhela mabasa anaapariye,
20 oliye alabihedhiye nuunvenyiha Kiristu muukwani ni nuumukaratiha moono waye woojha odhulu,
21 Oliye omuthithimiha okwaranya onamathonga watene, owedha, kopolo, onabwiya ni mandina matene enavahiwiiwa, ohiya elabo yela baahi mbwenye ni eyoya enaadhe osogolo.
22 Teto Oliye ohumuhiyedha dhithu dhaatedhene vati va manyalo aye wihina dhimwiwelelege ni omweriha wihina akale musolo wa dhithu dhaatedhene ni mulogoya,
23 oli mwiili waye oliye anakwanelihiye ni aneriha dhithu dhaatedhene wihina dhakwanele.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Lit:, Mento a murima dhenyu.
