Karta naalebeliwe akudda Efeziyu 2:1-22
2 Kale mwaali ookwene mwaha wa dhoviriganiha ni dhothega dhenyu, mbwenye naarive dhigaali ndo, Mulugu ohuuvahani egumi.
2 Mudhidhi yoyo moweedda mowiwanana ni elabo ela, momwiwelela namathonga akopolo a muya weelabo ela, muzimu yoyo onaathonga ahima oohiwelela.
3 Hee, kale iyo aatene needda mowiwanana ni munigwa wa mwiili wehu, nihagalasaga mwiili ni mubuwelo wehu teto nahikanna ekalelo yofwanelela onyanyuweliwa ni Mulugu mowindala ninga athu amodha.
4 Mbwenye Mulugu dodhaleliwa thagaraga, teto mwaha odhivela winlubale anonihiye,
5 onivaha egumi vamodha ni Kiristu naarive nigamanle okwa mwaha wa dhothega dhehu mbwenye mwaha opama wohifwanelela muhuvulusiwa.
6 Ohiya eyo, Mulugu onivenyiha ni onikaratiha vamodha nuliye mburo dhodhulu mwaha Mulugu ohuneriha wi nikale mwimodhani ni Kiristu Yesu,
7 Oliye oherana eyo wihina osogolo mwilaboni exa anoonihe opama waye winlubale amala onerela dhithu dhapama iyo nili mwimodhani ni Kiristu Yesu.
8 Mwaha wa opama wohinifwanelela nyu muhuvulusiwa wodhela nroromelo, mbwenye eyo yereye mwaha wa mahala a Mulugu ohiya ni kopolo dhenyu.
9 Teto, eyo kayereye mwaha wa mabasa enyu wihina ahikalewo muthu aniithukulege.
10 Iyo nili mabasa a mada a Mulugu ni nipaddusiwe mwimodhani ni Kiristu Yesu wihina naapare mabasa apama Mulugu awegeredhiye kale wihina naapare.
11 Mowindo, nyu muli athu amalogo mamodha ni mwahili maJudewu mubuwele wi kale athu “yineliwe” * ni mada aathu yuwithanani athu “oohineliwa.” *
12 Mudhidhi wakale kamwamunonne Kiristu, ni kamwali epaddi yamwaana Ezarayeli, kamwakosa epaddi ya nipangano; kamwanna ejhehedho ni kamwamunonne Mulugu.
13 Mbwenye vano, mowiwanana ni Kiristu Yesu nyu kale mwaali woolapela peeno muhumwaddamela Kiristu wodhela nikame naye.
14 Oliye di murenddele wehu andile waatugumanya makuuru menli wihina nikale nimodhave ni ogujhula txinga yanibarela vaari veehu.
15 Wodhela mwiili waye, oliye wamariha Malamulo a Moyizeji ni malaganoya mwaha wi siyeyo yadhilena widdana wa makuuru menli. Nuwindo wiita nikuuru nixa. Mwebaribarene makuuru ayo aamenlene bi anamahara aye, Kiristu akosiliye murenddele naaliwa,
16 ohiya eyo wodhela okwa waye vantxikwani na goyi, oliye wawandaniha pamadhene ni Mulugu wihina makuuru aamenlene ekale mwimodhani.
17 Oliye odha wulaleyani muthenga dhapama dha murenddele nyu mwaali wolapela vamodha naleya yaali vokwivelavene;
18 vano wodhela oliye iyo malogo aamenlene nnowanda onfiyedha Baabihu ni muzimu mmodhave.
19 Ni makalelo yayo, nyu kamuli aleddo newene kamuli anyawedda, mbwenye muli anamurala enakosa epaddi ya athu oweela ni emudhi ya Mulugu,
20 nyu muhulibihiwa ni alisersi aarumiwi ni aanamavuhulela, mbwenye Kiristu Yesu dili nibwe nathimana na alisersi oyo.
21 Mwimodhani nuliye nyumba yaateene yagumanihiwa dhipaddi dhatedhene, enowunnuwa wihina ekale tempulu yoweela ya Yehova.
22 Mwimodhani ni Kiristu, nyu munna ogumanihiwa wihina mukale mburo Mulugu anafuniye opwehamo muzimu waye wotxena.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “egwaddiwe nthuba.”
^ Obe: “aluku.”
