Karta naalebeliwe akudda Efeziyu 3:1-21
3 Vano, miyo Pawulo gihivokedhiwa mukambura mwaha wokala a Kiristu ni mwaha wukaviherani nyu mwahili Majudewu . . .*
2 Ginoona wihina nyu muhiwa ewogiwaga wi miyo gihakela mutholo woweeddiha opama wohinifwanelela wa Mulugu wihina gukavihereni,
3 hee, Mulugu ohugaaddela yoviteya yotaleleya yeyo gulebelimini kale mogwaddela.
4 Mowindala, mwilerigi ndha, munere woona wihina ginowonelamo dhoviteya dhotaleleya dha Kiristu.
5 Malogo mamodha, Mulugu kawaddenle athu yoviteya ela, ninga movanene vala aawaddenliye arumiwi aye oweela ni anamavuhulela wodhela muzimu waye wotxena,
6 yoviteya eyo siila: Athu ehili Majudewu eli mwimodhani ni Kiristu Yesu enere wakela mpaganyo mmodhave Kiristu anafuniye wakela ni enere okosa epaddi ya nikuru * nimodhave. Aliwa enere wakela dhithu dhimodhave Mulugu anipaganyiye mwaha wa muthenga dhapama.
7 Miyo gihirumedha okala mudhaari a yoviteya eyo yotaleleya mwaha wa opama wa Mulugu, oli winlubale. Oliye ohugivaha mukono oyo, mowiwanana ni kopolo dhaye.
8 Miyo ahithabwilese okanna thima vaari vaathu aatene oweela, gihivahiwa opama oyo wohinifwanelela wihina gande walaleya athu a malogo mamodha muthenga dhapama wodhela dhoorela dhinadhela wa Kiristu
9 wihina athu aatene yoone makalelo enaparihedhiwiwa mabasa yoviteya yotaleleya, yeyo emanle mudhidhi wowinjhivene egaali yoviteyene wa Mulugu apaddusile dhithu dhatedhene.
10 Eyo yapadduwe wihina, wodhela mulogo, anamathonga ni owedha watewene oli odhulu, onone thotho dha Mulugu mwamakalelo matene.
11 Eyo enowiwanana ni efunelo yaye yamukalakala anniyena ni Kiristu, yoyo ali Yesu Nabwiya ehu,
12 wodhela oliye ninnihuna ofuru wowoga ni womwaddamela Mulugu nigaali ootapuwene nihanganyedhaga ethu wodhela nroromelo ninnihuna ni Kiristu.
13 Bumwahaya, ngulobani wihina mwahiselele wodhela makathamiho ginavilelimina mwaha weenyu, woona wi enatapulela nthithimiho nenyu.
14 Mwaha wa yeyo, miyo ginokokora vamentoni va Baabi,
15 woona wi oliye ohuvaha ndina emudhi yatene yodhulu ni ya velaboni yavati.
16 Miyo ginoolobela wihina Mulugu wodhela nthithimiho naye ninlubale alibihe emuthu yenyu ya muwari ni kopolo wodhela muzimu waye wotxena,
17 teto wodhela nroromelo nenyu Kiristu akale mmurimani mweenyu vamodha ni odhivela. Mukanne musisi ni mutibeleye pamadhene valisersini,
18 wihina vamodha ni oweela aatene, mwandege wonelamo pamadhene, marambalaleloya, malapeloya, mataameloya ni maddiiheloya,
19 ni munone odhivela wa Kiristu oli winlubale okwaranya enonelo, wihina mwaakwanele dhikalelo Mulugu anavahiye.
20 Mbwenye ole ananikavihera mowiwanana ni kopolo dhaye, podi werana dhithu dhinlubale okwaranya ndhe nnamulobihu obe nnubuwelihu,
21 Mulugu athithimihiwege mwaha wa mulogo ni mwaha wa Kiristu Yesu ni malogo aamateene ni mukalakala. Amem.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Mubuwelo ohanlewo onodhowave va versu 14.
^ Obe: “ya mwiili.”
