Karta naalebeliwe akudda Efeziyu 5:1-33
5 Mowindo, mmutajhihege Mulugu ninga ahima anaadhiveliye,
2 mudhowegeve mweddaga nuudhivela, ninga Yesu afiyedhe oleva egumaye mwaha wonidhivela, anvaha Mulugu mukutho wonukwela.
3 Mararuwo, dhithu dhaatedhene dhonyakavala ni nrima, dhithu dhendha kadhiwogiwege vaari veenyu, mwaha kadhinaafwanelela athu oweela,
4 newene mweddelo wa manyazo, newene owoga dhithu dhotakala, masika abure, dhithu dhohufwanelela; ohiya weragana dhendho, mwawogege madhu oomutamalelana Mulugu.
5 Mwaha nyu muhunona ni munowonelamo pamadhene wihina: muthu anawerana mararuwo, muthu anerana dhithu dhonyakavala, muthu anrima, enatapulela webedha dhikwamuthu, kanaavolowe Mumweneni mwa Kiristu ni mwa Mulugu.
6 Ahikalewo muthu anuleketheni ni madhu ohukanna mabasa, mwaha wa dhithu dhendha owali wa Mulugu onere wadhela ahima ohiwelela.
7 Mowindo, kamweregena dhithu dhimodhave aliwa eneriwana;
8 mwaha kale nyu mwaali yiihi, mbwenye vano muli wawara mowiwanana ni Nabwiya. Mudhowegeve mweddaga ninga ahima owaara,
9 mwaha wi dhowima dha waara dhinowoneya wodhela dhatedhene dhili dhapama, dhowogowa ni dhebaribari.
10 Mudidele werana dhithu dhinamuhagalasa Nabwiya
11 ni muselele wapara mabasa oyiihini ehinavaha dhowima; ohiya eyo mwawonege ninga oonyakavala.
12 Mwaha dhithu eneriwana moviteya samanyazo newene kadhinafwanelela owogiwa.
13 Dhithu dhatedhene dhinapwehiwa vowaara dhinowoneya, mwaha dhithu dhatedhene dhinapwehiwa vowaara, dhinookala waara.
14 Bumwahaya egawogiwa yegi: “Kavenya we onalibana ogona, kavenya muukwani, wera ndo Kiristu anere wumoneyela.”
15 Mowindala, mukale mento wihina muheddege ninga ataduwa, mbwenye ninga athu athotho,
16 mulabihedhege pama mudhidhi weenyu, mwaha malabo ala bowopiha.
17 Mwaha wa yeyo, muselele okala ataduwa, mbwenye musayele wonelamo efunelo ya Yehova.
18 Ohiya eyo, kamulezelege ni vinyu, mwaha olezela podi omuthukulela muthu werana dhithu dhowopiha, mbwenye mudhaaleliwe muzimu wotxena.
19 Mwathapanyaga mmodha ni mukwaye, madhu eenyu ethaananege ni masalmu mmuthithimihaga Mulugu ni jhibo dhomuzimuni. Mmwiibelaga Yehova ni muriminyu waatene,
20 malabo maatene mmutamalelaga Mulugu ali Baabi ehu wodhela dhithu dhatedhene, mwa ndina na Nabwiya Yesu Kiristu.
21 Mukale owiwelelana mmodha ni mukwaye, mmoovaga Kiristu.
22 Mwihiyana ooteliwa, amwiwelelege mamune ninga anamwiweleliye Nabwiya,
23 mwaha mulobwana musolo wa mwariye, ninga Kiristu aliye musolo wa mulogo ni namavulusa a mwiili yola.
24 Mowindala ninga mulogo onamwiweleliwa Kiristu, emodhave mwihiyana ooteliwa amwiwelelege mamune, mwadhatedhene.
25 Mulobwana ootela, kuhiye omudhivela mwariyo, ninga Kiristu adhiveliye mulogo, ofiyedha opeleka egumaye mwaha wa mulogo,
26 wihina atxenihe mulogo, asuwaga ni manjhe wodhela madhu a Mulugu,
27 oherana eyo wihina mulogo okale wowoma vamentoni vaye, ohunna mabamba, makunyazi* newene ethu siithu enaligana ni dhithu dhendha, mbwenye okale woweela ni wohukanna nihonya.
28 Ni makalelo mamodhave, mulobwana amudhivelege mwariye ninga anadhiveliye mwiili waye. Mulobwana onamudhivela mwariye, aniidhivela mwinya,
29 mwaha kawo muthu aniidda mwiili waye, mbwenye onojhiha ni onoosamalela ninga Kiristu aneriyena mulogo,
30 mwaha nili yaano dha mwiili waye.
31 “Bumwahaya mulobwana anere wahiya ababe ni amaye wihina akale ni mwariye vano aabilene ekale mwiili mmodha.”
32 Yoviteya ela yotaleleya, sathima. Ginawoga ndo, mwaha wa Kiristu ni mulogo.
33 Mowindo, kadda muthu wa nyu amudhivelege mwariye ninga anidhiveliye, emodhave, mwihiyana akanne nriho navati vamurima ni mamune.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “makunyari, makwizi.”
