Karta naalebeliwe akudda Efeziyu 6:1-24
6 Ahima, mwawiwelelege makolo enyu mowiwana ni Nabwiya, mwaha eyo sowogowa.
2 “Waarihege ababo ni amayo” nna thi nlamulo noobajha wodhela mpaganyo onawoga weegi:
3 “Wihina dhawo dhuweddelege pama ni okanne malabo owinjhiva velaboni yavati.”
4 Abaabi, kamwaanyanyuwelege aninyu, mbwenye mwaalelege ni malagano a Yehova.
5 Adhaari * mwawiwelelege anabwiyinyu * mwawovaga ni mwathithimihaga ni muriminyu waateene, ninga munerinyu ni Kiristu,
6 kahiyo weragana mwasugweriwaga baahi wihina mwahagalase athu, mbwenye ninga adhaari a Kiristu, mweragana ni murima wateene ni efunelo ya Mulugu.
7 Mukale adhaari enna ekalelo yapama, moonihaga wi munamulabela Yehova ohiya athu,
8 mwaha nyu muhunona wihina Yehova aneere omuhogolosela kadda muthu opama aneriyena, naarive muthuya akale mudhaari obe ootapuwa.
9 Ni nyunwa anabwiya munna adhaari, mwaweeddihege ni makalelo mamodhave, kamwathusege, mwaha nyu muhunona wihina Nabwiya enyu ni ewa ali odhulu kanna nsakulo.
10 Vogomihedhava, mudidele olibihiwa mwa Nabwiya ni kopolo dhaye dhinlubale.
11 Muware dhipano dhaatedhene dha munyakoddo, Mulugu uuvahiliyeni wihina muwanena ni mwande ogonjhiha murako dha Ddiyabo;
12 mwaha nihikanna koddo, koddo yehu kahi ya mwiili nnikame, mbwenye nnawana nanamathonga, mamwene eelabo, anamathonga eelabo ela eli muyihini, ni kopolo dha muzimu dhabure dhili odhulu.
13 Mwaha wa yeyo, muware dhipano dhaatedhene dha mutoropa Mulugu uuvahiliyeni, wihina mwande ovilela nlabo nabure teto mwamala werana dhaatedhene, mwande okala txithi.
14 Mowindo, mukale txithi, muware sintu neebaribari ni epano yowogowa yowibarelana vamurimani
15 teto manyalo enyu mwaawarihe sapatho dholaleyana muthenga dhapama dha murenddele.
16 Okwaranya dhithu dhatedhene ndha, muthukule yowithithana yinlubale ya nroromelo, yeyo enukavihereni wathimihedha mathere Ambure enahidda mootho.
17 Teto murumedhe omuwara kapaseti oovulusa ni supadda noomuzimuni, enatapulela, madhu a Mulugu,
18 ni mudidele olobela mudhidhi wateene omuzimuni, mulobelaga ni mbebedhaga mwamakalelo aamateene. Wihina mwande werana ndha mukale mento, ohiya eyo mudhidhi waatene mwalobelelege oweela.
19 Mugilobelelege ni miyoya, wihina givahiwe madhuya ginafunimi wawoga gafugula mulomo wihina giwoge, wihina gandege owoga nuuliba murima gaavuwihaga yoviteya yotaleleya ya muthenga wapama.
20 Mulugu digirumile wihina gilaleye muthenga dhapama. Bumwahaya gidhe gimagiwege ni makurenti. Mugilobelelege wa Mulugu wihina gandege olaleya muthenga dhapama gihovaga ethu ninga enahoweleya.
21 Wihina munone makalelo gilimi ni dhithu dhinagipadduwela mwigumini mwaaga, Tikiku ddibila nnamudhivelihu ni ali mudhaari oororomeleya mwa Nabwiya aneere wuwaddelani dhithu dhaatedhene.
22 Bumwahaya miyo ngamuruma wa nyu wihina munone makalelo nilihu ni wihina alibihe murima dhenyu.
23 Addibilaga, mukanne murenddele, odhivela ni nroromelo nnadhela wa Mulugu, ali Baabi ni Nabwiya Yesu Kiristu.
24 Opama wohinifwanelela okale ni aatene yaale enamudhivela Nabwiya ehu Yesu Kiristu ni odhivela ohunamala.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “anamalaba.”
^ Obe: “apatarawinyu.”
