Filemoni 1:1-25
1 Miyo Pawulo, amagiwe mwaha wa Kiristu, ni Timotiyu ddibilihu, ginamulebela Filemoni, ddibilihu nnalabihu vamodha ni nnamudhivelihu,
2 gihimuddiwalaga Aafiya murogolihu, Arkipu, mukwihu nnawanihu koddo* vamodha ni mulogo onatugumana vaade vawo:
3 Mukanne opama wohinifwanelela ni murenddele onadhela wa Mulugu, Baabi ehu, ni wa Nabwiya Yesu Kiristu.
4 Gaalobelaga malabo amatene gisorihaga ndina nawo, ginomutamalela Mulugu,
5 mwaha ginowiwa nroromelo nawo, nuudhivela onniwena nNabwiya Yesu Kiristu ni onawonihiwe oweela* aatene.
6 Ginoolobela wihina nroromelo nawo nnehu nuthukulele woonelamo dhithu dhatedhene dhapama ninnihuna wodhela Kiristu.
7 Ddibilaga, nuwiwa wodhela odhivela wawo, gahihagalala vanlubale ni gahitodoleya, mwaha we ohulibiha murima dhaaddibila oweela.
8 Bumwahaya, wodhela Kiristu, naari nganna ofuru wowuruma werana ele eri yapama,
9 gisakule wuloba nuudhivela ohiya wuruma. Miyo, mwanakalaba Pawulo, teto vadhuluva amagiwe mwaha wa Kiristu.
10 Ginowuloba mwaha wa mwanaga Onezimu, gifiyedhimi okala baabi aye ngali mukambura.
11 Vobajhavene kanna thima vamentoni vawo, mbwenye vano dathima vamentoni vawo ni vaga.
12 Ginomuruma wihina uhogolowele, hee, oliye di ddibilaga ginamudhivelimi ni murima waatene.
13 Geere odhiveliwa ahakaleve ni miyo agikaviheraga ninga wagikaviheriwe, wula ngali mukambura mwaha wa muthenga dhapama.
14 Mbwenye kaginafuna werana ethu-siithu ohurumedhe,* wihina oherena opama mwaha wowaddihedhiwa, mbwenye werena ni murima watene.
15 Podi wera siyeyo emuthukulele wuhiya mudhidhi vang’ono, wihina uhogolowele, mukalege vamodha malabo amatene,
16 ohiya ninga mudhaari, mbwenye omukwaranya mudhaari, vano ninga ddibila nnamudhivelihu vanlubale, thabwathabwa mwigumini mwaaga, teto, ni mwigumini mwawo. Kahiyo mwaha wokala mudhaari, mbwenye mwaha wokala mukiristawu mukwihu.
17 Mowindo, akala onagoona ninga mukwawo, omwakele ni malada menli ninga waagakeliwe.
18 Ohiya eyo, akala ohuwerela ethu yabure obe ohukanna mangawu ni we, wapwehe vamburoni vaga.
19 Miyo Pawulo, ginaleba muselu ola nimadaaga: miyo ginere wuliva, teto gihiddiwalaga wuwubusedha wihina weya onoogifiyari egumawo.
20 Hee ddibila, ginaroromela nikavihero nawo, mwaha wa Nabwiya, otodole murima waga mwaha wa Kiristu.
21 Gihikanna ebaribari wihina onere werana ginalobimi, bumwahaya gulebelaga karta nna, mwaha gihinona wihina onere werana ni ndhedha gihulombimi.
22 Ethu emodha, ogaajele mburo wohaya, eneriha kaginanganyedha wihina mwaha wa malobelo enyu, ginere otapuliwa mohilegela.
23 Epafara, munyakambura mukwaaga mwaha wa Kiristu, anowuvahedha malojhelo,
24 teto Marku, Aristarku, Demaji ni Lukaji, akwaaga ginalabimina vamodha naaliwaya enowuvahedha malojhelo.
25 Opama wohinifwanelela wa Nabwiya Yesu Kiristu oreelihe murima wapama munninyuna.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “munyakoddo a Kiristu”.
^ Obe: “oosakuliwa ni Mulugu”.
^ Obe: “ohunonne”.