Karta naalebeliwe akudda Filipense 1:1-30
-
Malojhelo (1, 2)
-
Omutamalela Mulugu; Nlobelo na Pawulo (3-11)
-
Wenjhedhedheya wa Muthenga dhapama naarive wigaali makathamihoe (12-20)
-
Mwaha akala miyo ginookalawo ginamukalelawo Kiristu teto akala miyo ginokwa ginokannavo mpurelo (21-26)
-
Mweddelo weenyu okale wapama ni wiwananege ni muthenga wapama (27-30)
1 Miyo Pawulo, gili vamodha ni Timotiyu ninga adhaari a Kiristu Yesu, ginowalebela oweela aateene eli mwimodhani ni Kiristu Yesu enakala elabo yo Filipu, vamodha ni anamaholela mulogo ni adhaari ookavihera:
2 Mukanne opama wohinifwanelela ni murenddele wa Mulugu ali Baabihu ni wa Nabwiya Yesu Kiristu.
3 Malabo aamateene ginomutamalela Mulugu gubuwela wodhela nyu,
4 teto gaalobelaga ginowulobelelani nyu aateene. Miyo ginoolobela nuuhagalala,
5 mwaha nyu okavihera muthenga dhapama okuma labo mwaddeliwinyu ofiyedha peeno.
6 Miyo gihikanna ebaribari wihina: Mulugu aneere wukaviherani wamariha mabasa apama awambeliye ni nyu ofiyedha labo na Kiristu Yesu.
7 Enofwanelela miyo wuwubuwelagani nyu aateene mwaha muli mmurimani mwaaga, hee, nyu aateene naakenlihu vamodha opama wohinifwanelela. Nyu muhugikavihera mudhidhi ola gilimi oomagiwene ni makurenti teto nihakihedha vamodha muthenga dhapama.
8 Mwaha Mulugu namoona aaga Oliye ohunona wi miyo gihikanna munukwela wa nyu aateene, odhivela wa vati vamurima ginnimina fuwimodhave anna Kiristu Yesu.
9 Galobelaga ethu ginalobesimi siila: wihina odhivela weenyu othabwegeve wenjhedhedheya, mukanne enonelo yeebaribari ni monelegemo pama dhithudha;
10 musogolihege dhithu dhili dhathima, wi muhukanne nihonya teto munakwakwathuse akwinyu, ofiyedha nlabo na Kiristu;
11 ni mudhaaleliwe dhowima dhowogowa, dhinadha wodhela Yesu Kiristu, wihina Mulugu athithimihiwe ni ebedhiwege.
12 Addibila, ginafuna munone wihina dhithu ndha dhinagipadduwela, mwebaribarene dhiheriha wihina muthenga dhapama dhidhowegeve vasogolo,
13 teto athu aateene ehifiyedha onona wihina gihivokedhiwa mukambura mwaha wa Kiristu ni anamasugweraya aateene a mwene ehinona.
14 Vano, addibila owinjhiva ehiliba murima mwaha wa miyo ovokedhiwa mukambura ni enna wonihave oliba murima wihina yawoge madhu a Mulugu ehoovaga ethu.
15 Ebaribari wihina athu amodha enamulaleya Kiristu ni nrima ni efunelo yopokihana mbwenye amodha enamulaleya ni efunelo yapama.
16 Oogomihedha ala enamulaleya Kiristu nuudhivela, mwaha ehinona wihina gihithomiwa wi gibarele muthenga dhapama;
17 mbwenye oobajhaya enerana ni efunelo yoopokihana, ohiya ni efunelo yapama mwaha enafuna egitotele makathamiho wula eganonne wi gili mukambura.
18 Ki mareeliho baani enakumelelavo? Mwa makalelo aamateene naarive ekale mowisinjhedha obe egaali ebaribari, Kiristu anna olaleyiwa teto siyeyo enagihagalasa. Ni gineerege ohagalalave,
19 mwaha gihinona wihina osogolowa gineere ovulusiwa, mwaha wa malobelo eenyu ni mwaha wa nikavihero na muzimu wa Yesu Kiristu.
20 Eyo enowiwanana ni ejhehedho yooliba ginnimina, yowi kayiwo ethu enaagithukulihe manyazo; mbwenye mwaha miyo owoga nuuliba murima, Kiristu anerege othithimihiwa ovanene ninga athithimihiwiye kale, wodhela mwiili waaga naarive nkanne egumi naarive gikwe.
21 Mwaha akala miyo ginookalawo ginamukalelawo Kiristu teto akala miyo ginokwa ginokannavo mpurelo.
22 Mbwenye akala egumaaga enerege odhowave gineerege omparela Kiristu mabasa owinjhiva; mbwenye kaginawoga ethuya ginafunimi osakula.
23 Wodhela dhithu ndha biili kaginonne ethu ginaasakulimi, mwaha ginofuna woboliwa wihina gakale ni Kiristu mwebaribarene eli ethu yohagalasa.
24 Mowindo, sohoweleya miyo gikalegewove epaddi yomwilini mwaha wa nyu.
25 Mwaha wa yeyo, gihinona wi kaginaakwe ovanene ni gineere okala ni nyu aateene wihina munnuwelegevo omuzimuni ni mukanne ohagalala.
26 Miyo gadha wengo ohagalala weenyu oneere wenjhedhedheya mwaha nyu okala anamahara a Kiristu Yesu.
27 Enlubaleya, mweddelo weenyu okale wapama ni wiiwananege ni muthenga wapama wa Kiristu, wihina naarive miyo gadha wuwaredhelani obe gahilivo, giiwege wodhela nyu wihina munna odhowave mweeddaga ni muzimu mmodhave, murima mmodhave, mwilibihedhaga dhipaddi dhatedhene ni nroromelo wodhela muthenga dhapama,
28 muhoovaga ethu-siithu wodhela amwiddani eenyu. Mwaha eyo enowooniha wihina aliwa eneere otolosiwa mbwenye nyu muneere ovulusiwa. Teto eyo enadha wa Mulugu.
29 Mwaha nyu muhuvahiwa oneeti, ohiya mwaha womuroromela Kiristu baahi, mbwenye mwaha wowonihiwa goyi wodhela oliye.
30 Bumwahaya nyu munna woona goyi emodhave mugoonilinyu giwanagana teto ninga munonilinyu ofiyedha peeno, ginna owananave.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
