Karta naalebeliwe akudda Filipense 2:1-30
2 Akala vaari veenyu vihikala olibihana mwa Kiristu, ootodolana ni oodhivela, obe muzimu wowiwanana teto akala vihikala odhivela winlubale ni thagaraga,
2 mwakwanihedhe ohagalala waaga wodhela okanna makalelo mamodhave owubuwela ni odhivela wimodhave, mwiwananaga pama ni muganna mubuwelo mmodhave.
3 Kamwerena ethu mwaha wowithukula obe mwaha wowiikumbula; mbwenye mukale athu owiyeviha, mwathithimihege athu amodha ohiya withithimihaga mwaannya,
4 kamuthuwathuwelege dhofuna dhenyu baahi, mbwenye muthuwathuwelege dhofuna dhaathu amodha.
5 Mukanne mubuwelo mmodhave aanna Kiristu Yesu,
6 naarive agaarajhihile okalawo ni ekalelo ya Mulugu, kanubuwelege wipweha vamburoni vaye, obe neere, wiliganiha ni Mulugu.
7 Ohiya eyo, oliye ahileva dhatedhene anniyena, vano othukula ekalelo yodhaari oliganaga naathu.
8 Okwaranya eyo, aadhiliye elabo ela yavati ninga muthu, ahiiyeviha ni okala owiwelela ofiyedha opiwa, hee, opiwa vantxikwani na goyi.
9 Bumwahaya, Mulugu adhe anvahege owedha winlubale teto ni murima waaye watene onvaha ndina nnaakwaranya mandina matene
10 vano, wihina aatene ekokore mwa ndina na Yesu, okuma ale eli odhulu, ale enakala elabo yavati, naaleya enafwanyeya vati va thaya,*
11 ndo athu aateene* enone wihina Yesu Kiristu di Nabwiya, wodhela nthithimiho na Mulugu, Baabi.
12 Mowindo, addibila oofuneya, miyo ngaali vamodha ni nyu mwaali owiwelela teto vano givenyilimivo munoothabwa okala owiwelela. Ni makalelo yawo kadda muthu wa nyu adidele olaba ni woova vamodha nugurumela wihina mwande ovulusiwa.
13 Mulugu ole anerana dhithudha mowiwanana ni efunelo yaye anna osogolela egumi yenyu wihina uvaheni efunelo ni kopolo yowerana efunelo yaye.
14 Mwaparaga mabasa bi mabasa, kamunlihege dhammurimani newene kamukanganege,
15 wihina mukale athu ohikanna muladdu ni ohikanna yothega ninga ahima a Mulugu ehinna nihonya vaari vaathu abure ni yahinerana dhithu dhowogowa, venvo munaarinyu ninga dhoomoneyela dheelabo,
16 mugaaparele madhu eegumi ni mada menli. Mowindo, miyo kaginahagalale ebewene labo na Kiristu, mwaha ginere onona wihina kagithamagele ebewene ni kagiilibihere ebewene.
17 Teto, naarive miyo gikuthuliwaga ninga yong’wa eveleliwe wihina ekuthiwena mukutho ni mabasa ootaleleya enadhela mwaha nroromelo nenyu, ginohagalala ni ginofuna wi mukanne ohagalala wimodhave ginnimina.
18 Ni makalelo mamodhave, ni nyunwa mukale oohagalala teto muhagalalege vamodha ni miyo.
19 Ginoojheha mwa Nabwiya Yesu omuruma Timotiyu mowaguva wihina adhe wengo wi miyo gilibiheye oliye agaaddela makalelo mulinyu.
20 Mwaha kaginna muthu mmodha anna efunelo yokavihera ninga oliye anuusamaleleni pamadhene.
21 Mwaha aatene enasayela dhofuna dhewa baahi ohiya osayelaga dhofuna dha Yesu Kiristu.
22 Mbwenye nyu muhunona makalelo oliye iiveleliye: oliye ohulaba vamodha ni miyo ninga mudhaari nlaleyaga muthenga dhapama ninga mwaana vamodha ni ababe.
23 Bumwahaya, ganona ethu enaagipadduwele duliyene ginajheehimi omuruma.
24 Mowindo, ginomuroromela Nabwiya wihina mohulegela ginere odha wengo wihina guwaredheleni.
25 Mbwenye movanene, ginarajhiha omuruma ddibilaga Epafroditu analaba vamodha ni miyo ni ali munyakoddo mukwaaga, yoyo mmurumilinyu wihina adhe agikaviherege dhithu ginaahoweligimi,
26 woona wi oliye ohukanna munukwela wowuwonani nyu aatene ni ali owukuwene mwaha nyu wiwa wihina oliye aali muredda.
27 Mwebaribarene, oliye ahibulela ofiyedha ohala vang’ono nuukwa. Mbwenye Mulugu omweddela thagaraga; ohiya oliyeneve baahi ni miyoya ohugeddela thagaraga, wihina gihithabwege wukuuwa mudhidhi waatene.
28 Bumwahaya miyo ginomuruma mowaguva wihina mwamoona muhagalale dila biili teto miyo gahithabwe othuwathuwa.
29 Mowindo, mmwakele ninga nlemelihu mwa Nabwiya, nuuhagalala watewene, mudidele wavaha thima alobwana ninga oliye,
30 mwaha oliye oofuna okwa mwaha wa mabasa a Kiristu, apwehaga egumaye vangovini wihina agikavihera vamburoni veenyu woona wi nyu kamuli wewuno ni miyo.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “athu enaavenyihiwe muukwani.”
^ Lit.: Ni Egerego, “malumi maatene.”
