Karta naalebeliwe akudda Filipense 3:1-21
3 Bumwahaya addibila, mudidele ohagalala mwa Nabwiya. Miyo kaginagoma wulebelani dhithu dhimodhave, mwaha ginerela obareleya weenyu.
2 Pole-pole naale enaligana naanabwa; pole-pole naale enerana dhithu dhabure; pole-pole naale enafuna wihina mwineliwe.*
3 Anna wineliwa weebaribari di iyo nnaapara mabasa ootaleleya wodhela muzimu wa Mulugu, ni nnowithukula mwa Kiristu Yesu teto kannaroromela dhithu dhomwiilini,
4 naarive miyo nganna ethu yaagithukulele ororomela dhithu dhomwilini wapitha amodha. Akala muthu di muthu ohukanna ethu yaamuthukulele ororomela dhithu dhomwilini, miyo futhabwawa:
5 giineliwe labo na neetanu natharu, gili a nlogo na Ezarayeli, a nihimo na Benjami, gili muEberewu abaliwe ni akudda Eberewu; wodhela Nlamulo, gili nFarizewu;
6 gihithabwa oharahara mulogo ni gihilibihedha ohara Nlamulo.
7 Mbwenye dhithu goonimi ninga sathima, vano ginoona ninga dhithu dhohukanna mabasa mwaha wa Kiristu.
8 Ohiya dhendhove, dhithu ndhe dhatedhene ginoona ninga dhithu dhohukanna mabasa, mwaha wa thima enlubale enna enonelo ya Nabwiyaga Kiristu Yesu. Mwaha waaye, gihirumedha oyelela dhithu dhaatedhene teto ginoona ninga dhithu dhonyakavala * wihina gimwaakele Kiristu
9 ni gifwanyiwe ngaali mwimodhani nuliye, ohiya mwaha wowogowa waaga wodhela ohara Nlamulo, mbwenye wogowa mwaha omuroromela Kiristu. Wogowa onadha wa Mulugu mwaha wa nroromelo.
10 Ethu ginafunimi fumunona oliye ni kopolo anniyena dhowavenyihana anookwa, ni woona goyi emodhave ooniliye giilevaga wihina gikwe ninga oliye,
11 ni goone akala ginere ofwanya ovenyihiwa wobajha wanookwa onafuna weereya.
12 Kahiyo wihina gihaakela mukono oyo teto kahiyo wihina gere oologomana, mbwenye ginowilibihedha wihina dhenyeya gaakele ele Kiristu Yesu agiithaneliye.
13 Addibila, kaginiwoona ninga gihimala waakela kale mukono oyo; mbwenye ebaribariya siila: ginoddiwaala dhithu dha mundduli, giilibihedhaga wihina gifwanye dhithu dhinadha osogolo,
14 ginna wilibihedha vanlubale wihina gaakele mukono * waaga giithaneliwimi odhulu ni Mulugu wodhela Kiristu Yesu.
15 Mowindala, iyo nili owithwelavo omuzimuni nikanne mubuwelo yoyo; teto akala nyu muhukanna mubuwelo mmodhaya, Mulugu anere wuwaddelani makalelo apama owubuwela.
16 Mwamakalelo aatene, naarive nigadhowile vasogolo, nididele weedda dila yela.
17 Addibila, mukale mwimodhani wula mugitajhihaga miyo, teto mwasugwege ale enahara mweddelo oniwanana ni yotajhiha nuhiyedhihuni.
18 Mwaha ehikalawo athu owinjhiveene miyo gaasorihilimi dila dhowinjhivadhene, mbwenye vano ginaasoriha gunlaga mwaha enonyemula okwa wa Kiristu vantxikwani na goyi.
19 Omakuthulo weewa fuutolosiwa, mulugu ewa siirugulu * yeewa, aliwa enowiithukulana dhithu dhaatotege manyazo teto murima wewa onubuwela dhithu dha velaboni yavati.
20 Mbwenye elabo yehu eli odhulu, wengo nnamujhehihu nuuthaba nvulusi Nabwiya Yesu Kiristu,
21 anafuna osaddula mwiili wehu wowiyeviha wihina oliganege ni mwiili waaye woothithimiheya wodhela kopolo dhaaye dhinlubale dhinamuthukulele weeriha dhithu dhatedhene omwiwelelaga.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “ogwaddiwa nthuba. ”
^ Obe: “dhithu dhinarahileliwa vadhuguni; lixu”
^ Obe: “Padamari”
^ Obe: “thi nipu neewa”
