Karta naalebeliwe akudda Gaalata 1:1-24
1 Miyo Pawulo gili murumiwi ohiya athomiwe naathu newene ni muthu, mbwenye gisakuliwe ni Yesu Kiristu vamodha ni Mulugu Baabihu yoyo anvenyihile Yesu muukwani,
2 teto ni addibila eli vamodha ni miyo, nnolebela mulogo dhoGalasiya wihina:
3 Opama wohinifwanelela ni murenddele wa Mulugu Baabihu ni wa Nabwiya Yesu Kiristu okale ni nyu.
4 Kiristu ohiipeleka mwaha dhotheega dhehu wihina anobole mwilaboni ela yabure, mowiwanana ni efunelo ya Mulugu ehu ali Baabi;
5 mowindala, Mulugu athithimihiwe ni mukalakala. Amem.
6 Miyo ginotikina vanlubale giiwaga wihina munna omusukuma Mulugu mowaguva, yoyo uwithanneni ni opama wohinifwanelela wa Kiristu, muharaga muthenga dhimodha dhapama.
7 Kahiyo wihina dhere okalawo muthenga dhimodha dhapama, mbwenye ehikalawo athu amodha enafuna wuholosani efunaga oviriganiha muthenga dhapama wodhela Kiristu.
8 Mowindo, naarive mmodha wa iyo obe mungero oodhulu ulaleyani muthenga dhapama dhohiyana ni ndhe nulaleyihuni, muthu yoyo ulumeliwe.
9 Ninga nimanlihu owoga, ginohogolowela owoga gegi: Muthu di muthu anuulaleyeni muthenga dhapama dhohiyana ni ndhe murumedhilinyu, muthu yoyo ulumeliwe.
10 Miyo ginasayela wahagalasa athu obe omuhagalasa Mulugu? Akala miyo ginasayela wahagalasa athu, kagili murumiwi a Kiristu.
11 Addibila, ginafuna munone wihina muthenga dhapama gulaleyimini kadhinadhela wa muthu;
12 mwaha kagaakenle wa muthu ni kawo muthu agihudhihe, mbwenye gaaddeliwe ni Yesu Kiristu.
13 Nyu muhiwa ewogiwaga wodhela mweeddelo gahariimi kale wa maJudewu, wihina miyo gooharahara vanlubale Mulogo wa mulugu ni googujhula,
14 teto gowunnuwelavo ni mweddelo wa maJudewu wapitha athu owinjhiva a nlogo naaga nannihuna yaka dhimodhave, woona wi miyo gaali ooviheya ni mweddelo wa makolo aaga.
15 Mbwenye, Mulugu agisakunle mbani mwa amma ni agithanile wodhela opama waye wohinifwanelela, ohona okala yapama
16 ogilabihedha wihina gaalaleye muthenga dhapama athu a malogo mamodha wihina emunone mwanaye. Oliye nuugisakula wihina gerena eyo, kagidhowile omukoha muthu;
17 newene kagidhowile oJeruzale warumiwi amodha yaali oobajha miyo gihinakale, mbwenye gaadhowile wArabiya nuwindo miyo ohogolowela oDamasku.
18 Vano nuuvira yaka tharu miyo odhowa oJeruzale wihina gamwaredhele Sefaji* nuwindo miyo okala nuliye malabo 15.
19 Mbwenye kagaawoonile arumiwi amodha ahili Tiyago ddibile Nabwiya.
20 Wodhela dhithu ndha ginuulebelimini, miyo ginowuroromelihani vamentoni va Mulugu wihina ginawoga ebaribari.
21 Vasogolova, miyo odhowa murudda dhoSiriya ni dhoSilisiya.
22 Mbwenye addibila a mulogo dhooJudeya yaali mwimodhani ni Kiristu, kiyaginonne.
23 Aliwa yeresa wiwa baahi wihina: “Mulobwana ole aniharaharesa kale, vano anna olaleya muthenga dhapama wodhela nroromelo agujhuliye.”
24 Nuwindo, aliwa wambela omuthithimiha Mulugu mwaha wa miyo.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Aanoniwe ni ndina na Peduru.
