Karta naalebeliwe akudda Gaalata 2:1-21
2 Vano nuuvira yaka 14 miyo ohogolowela oJeruzale vamodha ni Bernabe, mbwenye olenddoola miyo omuthukula Titu.
2 Gahidhowawo mwaha wa yoroha gaaddeliwimi ni Nabwiya, miyo wawaddela addibila muthenga dhapama ginaalaleyimi athu amalogo. Mbwenye moviteya miyo othapanya naathu athima wihina nkanne ebaribari wi mabasa ginaaparimi kagaaparela ebewene.
3 Mowindo, newene Titu aali vamodha ni miyo kaawaddihedhiwe wineliwa* naarive agaali muGerego.
4 Mbwenye muselu ola wakumelele mwaha waaddibila owoota yivolosihile vaari vehu ni makalelo ooviteya wihina esayele makalelo oononga ofuru ninnihuna mwimodhani ni Kiristu Yesu nindo nikale adhaari ewa,
5 mbwenye iyo kanaarumendhe, newene vang’ono, wihina ebaribari wodhela muthenga dhapama ekaleve ni nyu.
6 Mbwenye ale yiwoona okala ninga athu athimaya, mwebaribarene aliwa kigaaddenle muselu muxa, teto naarive ekalaga ninga bathimaya wa miyo kavili ohiyana, mwaha Mulugu kanamutoriha muthu mowiwanana niile anooniye odeve wule baahi.
7 Mohiyana ni eyo, aliwa nuugoona wihina gahikanna mabasa owalaleya muthenga dhapama athu ohineliwa mowindala ninga Peduru avahiwiye ofuru wowalaleya athu owineliwa,
8 ole anvahile Peduru kopolo dhowakwana wihina akale murumiwi aathu owineliwa, nuliyeya ohugivaha kopolo dhimodhave wihina gaalaleye athu a malogo
9 teto aliwa nuwoona opama wohinifwanelela gaavahiwimi, Tiyago, Sefaji* ni Juwawu, yakala ninga anamaholelaya aliwa ogitapulela nlada na moono woojha miyo vamodha ni Barnabe ninga makalelo ootonyihedha wi yapara mabasa vamodha ni iyo, nuwindo aliwa oniruma wihina iyo naalaleyege athu amalogo mbwenye aliwa yalaleyege athu owineliwa.
10 Nuwindo, aliwa oniloba wihina nahaddiwalege aliba ohawa, teto siyeyo ginilibihedhimi vanlubale wihina geregenave.
11 Mbwenye Sefaji nuufiya elabo yo Antiyokiya gahimusumulula vamentoni vaathu aatene, mwaha wi oliye eere oviriganiha.
12 Mwaha, ehinafiye alobwana yarumiwe ni Tiyagu, Sefaji oojha naathu yahali Majudewu, mbwenye alobwana ale nuufiya, oliye ohiya ojha naathu ale yahali Majudewu, awoovaga athu owineliwa.
13 Teto Majudewu amodha obajha omutajhiha makalelo aye owisinjhedha, vano ni Bernabeya wambela werana emodhave.
14 Mbwenye miyo nuwoona wi aliwa kayedda mowiwanana ni muthenga dhapama, miyo owoga ni Sefaji vamentoni vaathu aatene gegi: “Akala we ninga Mujudewuya oneedda ninga athu ehili Majudewu, ki mwahaya bwaddi ogaawaddihedhaga athu ehili Majudewu weeddaga ninga Majudewu?”
15 Iyo nili Majudewu, kannaligana ni athu a malogo eli anamatheega,
16 nihinona wihina muthu kanakala owogowa mwaha wa mabasa a nlamulo, mbwenye mwaha wa nroromelo anniyena ni Yesu Kiristu. Hee, nihiyoya nihikanna nroromelo ni Yesu Kiristu, wihina nooniwege ninga athu owogowa mwaha okanna nroromelo ni Kiristu, ohiya mwaha wamabasa a nlamulo, mwaha kaawo muthu anadha akala owogowa mwaha wamabasa a nlamulo.
17 Mbwenye akala nnooniwa ninga athu oothega wula nisayelaga okala athu owogowa wodhela Kiristu, nerege Kiristu dinanithukulela otheega? Naari, kahi yeyo!
18 Akala miyo ginoovenyihedha dhithu dhimodhave gimanlimi ogujhula, eyo enatapulela wihina ginna watheegela malamulo.
19 Mwaha wohara Nlamulo, gihikwa wodhela Nlamulo wihina gikanne egumi wa Mulugu.
20 Vano gihikomeliwa vantxikwani ni Kiristu. Anakalawo kahiyo miyo, mbwenye di Kiristu anakalawo mwimodhani ni miyo. Mwebaribarene, egumi yomwiilini ginnimina ovanene, ginakalawo mwaha wa nroromelo wodhela Mwaana a Mulugu, agoonihile odhivela ni apelekile egumaye mwaha wa miyo.
21 Miyo kaginakodda opama wohinifwanelela wa Mulugu, mwaha akala muthu anooniwa ninga owoogowa mwaha wa nlamulo, mwebaribarene Kiristu akwele ebewene.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “ogwaddiwa nthuba.”
^ yoyo aanoniwe ni ndina na Peduru.
