Karta naalebeliwe akudda Gaalata 3:1-29
-
Ohiyana wa mabasa a Nlamulo ni nroromelo (1-14)
-
Muthu owogowa anere okalawo mwaha wa nroromelo naye (11)
-
-
Mpaganyo aavahiwe Abarawu kawali mwaha wohara Nlamulo (15-18)
-
Odhuulu wa Abarawu, Kiristu (16)
-
-
Witiwa wa Nlamulo ni mwahaya bwaddi ndhe nikalegewo Nlamulo (19-25)
-
Ahima a Mulugu wodhela nroromelo (26-29)
-
Odhuulu wa Abarawu baale eli a Kiristu (29)
-
3 Akudda Gaalata, mukaleleddi ataduwa! Ulekethileni baani, kamutapuleliwemo pamadhene makalelo Yesu Kiristu apiwiye vantxikwani na goyi?
2 Akala ethu ginafunimi wukohani: Wihina mwakele muzimu wotxena, mwakenle mwaha wa mabasa a nlamulo obe mwaha wa nroromelo mwiwalinyu?
3 Gerege mweere othabwana otaduwaya? Vobajhavene nyu moweedda mowiwanana ni muzimu wotxena, vano munafuna muharege mubuwelo waathu?
4 Goyi ele yaateene moonilinyu, moonele ebewene? Gihikanna ebaribari wihina kamoonele ebewene!
5 Mowindo, ole anuvahani muzimu wotxena ni anawerana mabasa ootikiniha vaari veenyu, aneerana eyo mwaha nyu wahara malamulo enawogiiwa, obe mwaha wororomela muthenga dhapama mwiwalinyu?
6 Simodhave yampadduwele Abarawu: oliye “omuroromela Yehova, bumwahaya Mulugu adhe amonege Abarawu ninga muthu owogowa.”
7 Mwebaribarene, nyu muhunona wihina ale enithaniwa ahima Aabarawu, baale enna nroromelo.
8 Epaddi dhaala ya yolebela, enawoga wihina weere ofiya mudhidhi Mulugu aawonegiye athu amalogo mamodha ninga owogowa wodhela nroromelo, ohiya eyo, yahiwoga mutaneene muthenga dhapama wodhela Abarawu yegi: “Mwaha wawo, malogo maatene enere oreelihiwa.”
9 Ni makalelo yayo, ale enna nroromelo binareelihiwa vamodha ni Abarawu, anna nroromelo.
10 Aateene yaale enaaroromela mabasa a nlamulo, ehimala wulumeliwa, mwaha dholebela dhinawoga dheegi: “Owulumeliwa di muthu yoole ahinahara dhithu dhatedhene dhilebiwe muroluni ya Nlamulo.”*
11 Ohiya eyo, enowoneya pamadhene wi kaawo muthu anadha akala owogowa vamentoni va Mulugu wodhela mabasa a nlamulo, mbwenye muthu owogowa anere okalawo mwaha wa nroromelo naye.
12 Mowindo, Nlamulo kannadhela mwaha wa nroromelo. Mbwenye “muthu yoole anerana dhithu ndha anere ofwanya egumi.”
13 Kiristu ohunigula anobolaga wulumeliwa wehu mwaha wa Nlamulo ni ohipweha vamburoni veehu ninga dholebela dhinawogiwa dheegi: “Owulumeliwa di muthu yoole akomeliwe vantxikwani.”
14 Eyo epadduwe wihina athu amalogo yawakele mareeliho Aabarawu wodhela Kiristu Yesu, ni makalelo yaala naakele muzimu wotxena Mulugu apaganyiliye ovaha wodhela nroromelo nehu.
15 Addibila, ginawoga mowiwanana ni dhithu dhinereya naathu: woona wi neriwana nipangano, naarive agaalivo muthu mmodha baahi, kaawo muthu anabibiddela newene anenjhedhedhavo.
16 Mwaha aaroromelihiwe mpaganyo di Abarawu ni odhuulu * waye. Bumwahaya dholebela kadhinawoga dhegihina “odhuulu waye waatene” ekalaga ninga enawagana athu owinjhiva. Ohiya eyo, dholebela dinawoga dheegi “odhuulu waye” dhimwagagana muthu mmodha baahi ali Kiristu.
17 Teto ginowogave gegi: “Nlamulo nikumelele dhigavinre yaka 430, kannabibiddela nipangano Mulugu eriliyena kale ofiyedha obibiddela mpaganyoya.
18 Bumwahaya, akala nvaho aapaganyiwe Abarawu waadhele mwaha wa nlamulo kuwaali mpaganyo; Mbwenye Mulugu ohunvaha nuupama waye wodhela mpaganyo aamuroromelihiye.
19 Ki mwahaya bwaddi ndhe nikalegewo Nlamulo? Nihivahiwa Nlamulo wihina nonihege dhothega ofiyedha odha ole aapaganyiwe. Mpaganyo ola waawogiwe naangero, wodhela mmadani mwa namafihedha.
20 Mowindo, simodhave erilena Mulugu eragana mpaganyo ola kaamuhowele muthu onfihedha, oliye aalivo yeka.
21 Nerege Nlamulo nnoovanya mpaganyo dha Mulugu? Newene! Mwaha nahakalewo nlamulo nnanda ovaha egumi, mwebaribarene woogowa wadheele mwaha wa nlamulo.
22 Mbwenye Madhu a Mulugu ehipeleka dhithu dhatedhene wihina dhilamuliwege ni yothega. Nimakalelo yayo ale enna nroromelo eneere wakela mpaganyo eroromelihiwe athu aatene enamuroromela Yesu Kiristu.
23 Mowindala, nihinambele okanna nroromelo ni Kiristu, nasugweriwa ni nlalamulo teto needdihiwa ni nlamulo nenno wula nijheehaga nroromelo nafuna woneyihiwa ni Mulugu.
24 Vano Nlamulo okala namakavihera * ehu ninthukulelaga wa Kiristu wihina noniwege ninga athu owoogowa wodhela nroromelo.
25 Mbwenye vano ninnihuna nroromelo ni Kiristu kannahowela weddihiwa nnamakavihera.
26 Mwebaribarene nyu aatene muli ahima a Mulugu wodhela nroromelo munninyuna ni Kiristu Yesu.
27 Mwaha aatene nyu mbaddiziwe mwa Kiristu, munoligana ni Kiristu.
28 Kaawo muJudewu newene muGerego, kawo mudhaari newene muthu ootapuwa, kawo mulobwana newene muhiyana; mwaha aatene nyu muli mwimodhani ni Kiristu Yesu.
29 Ohiya eyo, akala nyu muli a Kiristu mwebaribarene muli odhuulu wa Abarawu ni nyunwa munere wakela mpaganyo mmodhave aaroromelihiwe Abarawu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Nlamulo nna tha Moyizeji.
^ Lit: “bewu.”
^ Obe: “namasugwera.”
