Karta naalebeliwe akudda Gaalata 4:1-31
4 Ginowuwaddelani ebaribari, akala muthuya anafuna ohalana dhithudha mwaana, kavili ohiyana ni muthu ali mudhaari, naarive dhithu dhaatedhene dhigaali dhaye,
2 mbwenye oliye anohowela osugweriwa ni osamaleliwa* ofiyedha labo nenno Ababe esakunliwa.
3 Ni makalelo mamodhave, mudhidhi nigaali ahima naali adhaari teto needdihiwa ni mubuwelo weelabo.
4 Mbwenye mudhidhiya nuufiya, Mulugu omuruma mwanaye aadhile obaliwa ni muhiyana aahara malamulo,
5 wihina awobole ni aagule athu yaahara malamulo, mowindo niithaniwege ahima a Mulugu.
6 Woona wi, nyu muli ahima, Mulugu ohupweha mmurimani mwehu muzimu wa Mwanaye, vano muzimu oyo onowithana wegi: “Aba, Babani!”
7 Nimakalelo yala, ohuhiya okala mudhaari, mbwenye vano oli mwaana, teto akala oli mwaana, onere wakela ethu Mulugu anafuniye wuhiyedha.
8 Mowindo, mudhidhi mwahinamunone Mulugu, mwaali adhaari aamulugu owoota.
9 Mbwenye, vano mmunonninyu Mulugu obe geere Mulugu amanliye wuunonani, mwahaya bwaddi mugahogolowela dhithu dhihinakavihera ni dhahinna mabasa, ni mugafuna ohogolowela okala adhaari a dhithu dhendho?
10 Nyu munothabwa othithimiha malabo, mweeri, masaka ni yaka.
11 Ginowoova wihina wilibihedha waaga wi gukavihereni onadha okale weebewene.
12 Addibila, ginowulobani gegi: Mugitajhihege miyo woona wihina miyo gaali ninga nyu. Nyu kamugerele ethu yabure.
13 Mbwenye nyu muhunona wihina waali mwaha woredda gannimina miyo gathomilimi dila yoobajha wulaleyani muthenga dhapama.
14 Teto, oredda waaga waali yoweha wa nyu, mbwenye naarive dhigaali ndo, nyu kamugeddihile mwamakalelo abure newene kamuginyemunle, mbwenye mugaakenle ninga mungero a Mulugu, ninga Kiristu Yesu.
15 Ohagalala wule mwanninyuna vobajhavene mugomenlena waani? Miyo gihikanna ebaribari wihina dhahere dhandeyaga mweere wavenyihamo mentwinyu muginkelele.*
16 Mwaha miyo wuwaddelani ebaribariya gili mwiddani enyu?
17 Aliwa enowerana dhatedhene enandiwa wihina mukale epaddi yewa, mbwenye kinerana ni efunelo yapama; enafuna yumwalaniheni ni miyo wihina mwaaharege aliwa.
18 Mwebaribarene, akala muthu onowusayelani ufunaganani opama, ohiya baahi gakala vaari veenyu, mbwenye mudhidhi waatene, kavili muladdu,
19 woona wihina nyu muli anaaga, nivanove ginna woona goyi ninga muhiyana anafuna obaala, ofiyedha nyu wambela wooniha dhikalelo dha Kiristu.
20 Miyo goofuna mudhidhi yoola ngali vamodha ni nyu wihina giwoge ni nyu mwamakalelo mamodha, mbwenye gili owukuwene mwaha weenyu.
21 Kagaaddeleni, nyu munafuna ohara nlamulo kamunavuruwana ele Nlamulona nnawogiwa?
22 Motajhiha, dhihilebiwa wihina Abaraawu aanna ahima abiili, mmodha ambaale ni mudharaaye mbwenye mmodhaya ambaale ni muhiyana ootapuwa;
23 mwaana ambaale mudharaaye aabaliwe ninga enabaliwa ahima amodha mbwenye ole aabaliwe ni muhiyana ootapuwa aabaliwe mwaha wa mpaganyo wa Mulugu.
24 Dhopadduwa ndha nifwanafwaniho, mwaha ahiyana aabilene enatonyihedha mapangano menli, nipangano nimodha neriwena omwangoni Sinayi, nnaabala ahima oodhaari, ali Agari.
25 Agari nifwanafwaniho na mwango Sinayi onakala o Arabiya, onatapulela Jeruzale oovanene, mwaha ali muudharini vamodha naanayene.
26 Mbwenye Jeruzale oodhulu dowobowene teto mamihu duliyene.
27 Mwaha dholebela dhinihina: “Agalala muhiyana we ohubaala, othabe nuuhagalala, muhiyana we ohunoonege goyi anoona muhiyana afunaga obaala; mwaha ahima a muhiyana ohiyiwa bithabwile winjhiva okwaranya ahima a muhiyana ateliwe.”
28 Addibila, nyu muli ahima a mpaganyo ndala ninga Izaki aaliye.
29 Emodhave, mowindala ninga mudhidhi yole mwaana aabaliwe ninga enabaliwa ahima amodha abajhiliye omwigara ole aabaliwe wodhela muzimu wotxena, simodhave enapadduwa peeno.
30 Ki vano, dholebela dhinawoga ddi? “Omwigare mudhaari ni mwanayeya, mwaha mwaana a mudhaari ola, kadha aakela ethu ya mwaana a muhiyana ootapuwa.”
31 Mowindala addibila, iyo kanili ahima a mudhaari, mbwenye nili ahima a muhiyana ootapuwa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Okabeleliwa.”
^ Obe: “mugivahe”