Karta naalebeliwe akudda Gaalata 5:1-26
5 Kiristu ohunobola wihina nitapuwe.* Bumwahaya, mukale txithi ni kamuhogolowele mutholo wookala adhaari.
2 Nvuruwane! Miyo Pawulo, ginowuwaddelani wihina, akala munafuna mwineliwe, Kiristu kanakanne mabasa mwigumini mweenyu.
3 Miyo ginowoga dila biili wi muthu yole anathoma wineliwa,* onofwanelela wawiwelela Malamulo maatene.
4 Nyu munaxixa wooniwa ninga athu owoogowa wodhela nlamulo muli woolapela ni Kiristu; ni muhukoodda opama waye wohinifwanelela.
5 Mbwenye iyo, nnojheha nuuhagalala wakela wogowa webaribari onadhela mwaha wa nroromelo ni muzimu wotxena.
6 Mwaha akala muthu ali mwimodhani ni Kiristu Yesu, wineliwa ni ohiineliwa vamodhave, mbwenye nnafuneya thi nroromelo nnadhela mwaha wa odhivela.
7 Nyu mwera weedda pamadhene dila yeebaribari* baani ukoddihileni odidela wiwelela ebaribari?
8 Athu ayo yulekethileni dhohudhiha dhewa kadhinadhela wa Mulugu yole uwithanileni.
9 Emela* vang’ono, enonyakuwiha othu waateene wakanddiwa.
10 Gihikanna ebaribari wihina nyu muli mwimodhani ni Kiristu munere orumedha ethu ginawogimi, mbwenye ole anulekethani naarive eere okala ddi, aneere otorihiwa.
11 Addibila, giwogaga wodhela miyo, akala ginolaleya muselu wowineliwa, mwahaya bwaddi ngaharahariwa? Teto akala ginolaleya muselu wowineliwa, ntxikwa na goyi kahiyo nibwe nookwakwathusa.
12 Miyo goofuna wihina alobwana ayo enuthuwathuwihani yiifuule* annya.
13 Addibila nyu muhithaneliwa ofuru, mbwenye kampathe ofuru oyo wihina mweregena dhofuna dha mwiili, mbwenye mulabe nuudhivela ninga adhaari aathu amodha.
14 Mwaha Nlamulo naatenene nnaakwanela ni madhu owihina: “Omudhivele mwanddamanaawo ninga onidhiveliwe.”
15 Akala nyu munodidela olumana ni otakunana mmodha ni mukwaye, pole-pole wihina munadha mutolosane.
16 Mbwenye miyo ginowoga gegihina: Mudidele weedda mowiwanana ni muzimu wotxena, ni makalelo yayo, kamunadha mwerana ethu yomwilini.
17 Mwaha mwiili kuniwanana ni dhofuna dha muzimu teto muzimu kuniwanana ni dhofuna dha mwiili, aliwa enovanyihana mmodha ni mukwaye ofiyedha nyu ohandaga werana dhithu munafuninyu.
18 Ohiya eyo, akala nyu muneddihiwa ni muzimu wotxena, kamunathongiwa ni nlamulo.
19 Mabasa oomwiilini kinasitheya. Baala: oraruwa, dhithu dhonyakavala, dhithu dhamanyazo,
20 webedha dhikwamuthu, masenga,* widdana, okangana, ajhe, waguvela onyanyuwa, ohiwanana, ogawanyeya, ohara dhohudhiha dhaathu,
21 nrima, olezela, mathanga* oonyakavala, ni dhithu dhimodha ninga dhendha. Miyo ginowukongomedhani wodhela dhithu ndha ni makalelo mamodhave ninga guwaaddelimini kale gegi: athu yaale enerana dhithu ndha kinaakele Omwene wa Mulugu.
22 Wa epaddi emodhaya, yowima ya muzimu wotxena siila: odhivela, ohagalala, murenddele, ohaguvela onyanyuwa, opama, owoma murima, nroromelo,
23 opwaaseya, onona wihiha. Kawo nlamulo nimodha nnakwaranya dhithu dhendha.
24 Ohiya eyo, athu yaale eli a Kiristu Yesu, ehikomela vantxikwani mwiili, munigwa ni dhofuna dhewa.
25 Akala nnakalawo mowiwanana ni muzimu wotxena ndidele weedda mowiwanana ni muzimu yoyo.
26 Kanikale aliba withukula, kanipokihanege, newene kanikalelanege nrima mmodha ni mukwaye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Lit.: “enagiwana ohara Nlamulo na Moyizeji.”
^ Obe: “ogwaddiwa nthuba.”
^ Lit.: “dhenyu dhera wuweddelani pama.”
^ Obe: “Fermentu.”
^ Obe: “yikumihemo, ehiyege mba.”
^ Obe: “okwiri; dhithu dhowipini.”
^ Obe: “festa.”
