Judasi 1:1-25
1 Miyo Judasi, mudhaari a Yesu Kiristu, ddibile Tiyagu, ginaalebela ale yithaniwe ni Mulugu, Babi, ni ale anaadhiveliye wihina yakale vamodha ni Yesu Kiristu:
2 Mulugu uwenjhedhedheni thagaraga, murenddele ni odhivela.
3 Addibilaga, naari ngilibihere wihina gulebeleni ovulusiwa nnajhehedhihu vamodha, gihoona wi sapama wulebelani wihina gukongomedheni owaniha koddo ya nroromelo nenno nvahiwinyu dila modha ni mukalakala.
4 Mwahaya bowi vaari veenyu ehivolowavo alobwana ewogiwe kale ni Dholebela wihina etorihiwe, alobwana ayo babure, enowerana dhithu dha manyazo yinkedhaga opama wohinifwanelela wa Mulugu, vadhuluva enowoneya wihina anamaleketha vamentoni va mwinnya ni Nabwiya ehu, Yesu Kiristu.
5 Naarive muganonne dhithu dhatedhene ndha ginafuna guwubusedheni wihina Yehova ahobola nlogo naaye elabo yo Wijipitu, mbwenye watolosa ale yahanna nroromelo.
6 Teto angero ehiyile mutholo wewa yavahiwiwa ni Mulugu odhulu, ni mburo wewa wokala, Mulugu ohamaga ni makurenti amukalakala, wavokedha oyiihini ejheheraga labo ninlubale wihina etorihiwe.
7 Nimakalelo mamodhave, Sodoma ni Gomora ni sidadi dhaaddameliwa dhahavolowela mararuwo* onyakavala ni aliwa wambela ohara dhofuna dha mwiili dhabure; vano aliwa otorihiwa ni mootho wa mukalakala, dhopadduwa ndha dhilebiwe wihina dhinixagihe.
8 Naarive dhigari ndo, athu ayo enodhiveliwa dhoroha, etakalihaga mwiili wewa, enopwaza onamathonga ni enowaruwana ale enathonga.
9 Mbwenye Migeli mungero munddimuwa, nubajha okangana ni Ddiyabo mwaha mwiili wa Moyizeji, kamutorihe ni madhu abure, mbwenye oliye wera: “Yehova usinyuse.”
10 Mbwenye athu ayo, enovanyiha dhithu dhatedhene yahinoneliwamo pama. Mbwenye dhithu dhatedhene enoneliwamo vang’ono enonelamo ninga anenyama ehinna thotho, teto yeraga othabwa winonga.
11 Sathagaraga, mwaha alobwana ayo enahara dila emodhave ya Kayini, ehimorela murako mmodhave wa Balawu wofuna oliviwa, naaliwaya enere otolosiwa mwaha makalelo ewa owoga owithukula ninga Kora!
12 Alobwana ayo mabwe yipitile vati va manjhe, mwajhaga mathanga eenamudhi enovolowa vaari veenyu, aliwa egaali anamakukula enijhiha yahovaga, murabo dhohukanna manjhe, dhinathikiwa bure-bure nnipevo; mudhidhi wovaha dhowima, muthanko ndho kadhiimale, mwaha dhahimala okwa, ni dhihidduliwa musisidha;
13 alobwana ayo enakala ninga nipevo na kopolo na muniya, nnavokedha ode nipweru na manyazo ewa, enakala ninga thendderi dhihinna mburo vokala, Mulugu anafuniye wavokedha oyiihini enlubale ni mukalakala.
14 Mulobwana anetanu nabili mmudhi a Adawu, ithaniwa Enoki, ohuvuhulela ethu emodhave wodhela alobwana ayo egihina: “Kasugwani! Yehova ohudha vamodha ni matxikwi ni matxikwi* aangero aye oweela
15 wihina aatorihe aatene ni aawoge muladdu athu aatene abure mwaha wa dhowera dhewa dhabure yeriliwana, ni mwaha wa dhithu dhatedhene dhonyakavala athu ala abure emuwogeliwa.”
16 Alobwana ayo enowunliha dha mmurimani, ni kinahagalala ni dhithu enniwana, enerana dhofuna dhewa, yawogaga enowithukula, ni enowathethela athu amodha, evedaga dhofuna dhewa.*
17 Mbwenye nyu addibilaga, kamuddiwale muthenga* owogiwe kale narumiwi a Nabwiya ehu Yesu Kiristu,
18 yuwaddelesani yegi: “Malabo ookuthula enere okalawo athu oonyemula, enasayelege werana dhofuna dhewa dhabure.”
19 Biyala enadhana ohiwanana mmulogoni, alobwana ayo enakala ninga anenyama* ehithwale omuzimuni.
20 Mbwenye nyu addibilaga, muwaraalihe nroromelo nenyu noweela, mulobelege ni muzimu wotxena,
21 wihina Mulugu udhivelegenive, wula mujhehaga thagaraga dha Nabwiya Yesu Kiristu, anuvaheni egumi yohimala.
22 Teto, muhuselele waweddela thagaraga ale enanganyedha,
23 mwavuluse, ni mwawapule vamoothoni. Athu amodha, mwaweddelege thagaraga, mbwenye mwawovege, ni mwiddege dhowara dhewa dhitakale ni dhowera dhewa dhabure.
24 Vano Mulugu anna kopolo dhowubarelani wihina muhukwakwathuwe ni anukavihereni wimela txithi muhinna mahonya vamentoni vaye vowara, nuuhagalala winlubale,
25 Mulugu mmodha baahi, Namoobola ehu, avahiwe nthithimiho, waara, kopolo ni onamathonga wa malabo amatene, obajha peeno ni mukalakala, wodhela Yesu Kiristu Nabwiya ehu. Amem.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “muthithi ni muthithi wangero”.
^ Obe: “mpinddu”.
^ Obe: “dhovuhulela dhiwogiwe”.
^ Obe: “athu oomwiilini”.
