Dhilebiwe ni Juwawu 1:1-51
1 Vobajhavene naali Ndhu, Ndhu nna naali ni Mulugu, vano Ndhu nna naali mulugu.
2 Vobajhavene oliye aali ni Mulugu.
3 Dhithu dhatedhene dhipaddusiwe wodhela oliye, ni kaawo ethu epaddusiwe ehidhele woliye.
Ethu edhiile okalawo
4 wodhela oliye sigumi, vano egumi eyo okala waara waathu.
5 Waara winna omoneya vayiihini, mbwenye yiihi kayandile ogonjhiha waara.
6 Nuwindo, orumiwa mulobwana ninga namasogolela a Mulugu, ndina naaye ithaniwa Juwawu.
7 Mulobwana oyo aadhile ninga namoona, wihina avahe onamoona wowaara, wi athu aatene erumeedhe.
8 Oliye kaali waara, mbwenye aadhele ovaha onamoona wodhela waara.
9 Waara webaribari onaamoneyela athu aatene, wera odha mwilaboni.
10 Oliye aali mwilaboni teto elabo epaddusiwe wodhela oliye, mbwenye elaboya kiyamunonne.
11 Oliye adhele nlogo naaye, mbwenye nlogo nayena kanimurumendhe.
12 Mbwenye aatene yaale yamwakenle oliye ohavaha owedha wihina ekale ahima a Mulugu, mwaha wororomela ndina naaye.
13 Aliwa kibaliwe onikameni, newene nifunelo yomwiilini obe nifunelo yaathu, mbwenye nifunelo ya Mulugu.
14 Ofiyedha Ndhu nne okala muthu ni okala vaari vehu, teto iyo woona nthithimiho naaye, nthithimiho na mwaana mmodha avahiwiye naababe; oliye ahidhaleliwa mahala a Mulugu ni ebaribari.
15 (Juwawu ohuvaha onamoona waye, hee, oliye owoga egihina: “Ola dulena gamuwogesimi gegi: ‘Ole anadha mundduli mwaaga ohugikwaranya miyo, mwaha oliye doobajha okalawo, miyo gihinathi okalawo.’”)
16 Mwaha iyo aatene nihakela opama waye, hee, opama wohinifwanelela wodhela opama wohinifwanelela.
17 Nlamulo nidhele wa Moyizeji, mbwenye opama wohinifwanelela ni ebaribari widhele wa Yesu Kiristu.
18 Kawo muthu anarajhihaga omoona Mulugu; mbwenye mulugu mmodha baahi, ali epaddi ya Ababe, dinaaddele.
19 Ola buunamoona Juwawu awaaddeliye, majudewu nuwaruma anamakutha ni malevita ooJeruzale wihina yamukohe yegihina: “Weya oli aani?”
20 Oliye kakooddile, mbwenye orumedha egihina: “Miyo kagili Kiristu.”
21 Aliwa omukoha yegihina: “Kito oli aani? Eliyaji?” Oliye wawakula egihina: “Naari.” “Kito oli aani namavuhulela?” Oliye wakula egihina: “Naari!”
22 Nuwindo aliwa omukoha yegihina: “Kito nerege oli aani?” Kanaddele, wihina ni iyowa nawaddele ale enirumile. “Wamwinnyo oni oli aani?”
23 Oliye wawaddela egihina: “Miyo gili ndhu na muthu anithana mwiddeddereni negihina: ‘Moogolele dila dha Yehova,’ ninga awogile namavuhulela Izayiya.”
24 Athu ale yarumiwe yaali afarizewu.
25 Aliwa omukoha yegihina: “Kito akala kuli Kiristu, newene Eliyaji obe namavuhulela, kito onaabaddizela ddi athu?”
26 Juwawu wawakula egihina: “Miyo ginabaddiza ni manjhe. Mbwenye vikalelinyu ohukalavo muthu mwahimunonninyu,
27 ole anadha mundduli mwaaga, newene miyo, kaginafwanelela otapula sandaliya dhaye.”
28 Dhithu ndha dhapaddunwe oBetaniya kobela emodha yoJordawu wengo wabaddiza Juwawu.
29 Labo noharela, oliye omoona Yesu adhaaga vaaliye ni owoga egihina: “Kasugwani Nimbila na Mulugu, nnalevelela dhothega mwilaboni!”
30 Ola diyole gamuwogesimi gegihina: ‘Ole anadha mundduli mwaaga ohugikwaranya miyo, mwaha oliye doobajha okalawo, miyo gihinathi okalawo.’
31 Teto ni miyoya kagamunonne, mbwenye siyeyo egithukulele obaddizaga ni manjhe: wihina avuwe elabo yatene Yowizarayeli.”
32 Ohiya eyo Juwawu ohuvaha onamoona egihina: “Gihoona muzimu wotxena omukitelaga ninga kangayiwa.”
33 Miyo kagamunonne, mbwenye Ole agirumile wihina gimbaddize ni manjhe ogaddela egihina: ‘Yole onamooniwe muzimu wotxena omukitelaga ni ogimenle vadhulu vaye, diyoyo anabaddiza ni muzimu wotxena.’
34 Miyo nuwoona okanna ebaribari wihina ola Mwaana a Mulugu.”
35 Labo noharela, Juwawu ohogolowela vankavene ni anamaharaye abiili,
36 vano numoona Yesu eeddaga, oliye owoga egihina: “Kasugwani Nimbila na Mulugu!”
37 Anamaharaye ale abiili nuumwiwa awogaga ndo, aliwa omuharaga Yesu.
38 Yesu orugunuwa, nuwawoona aliwa emuharaga, oliye wakoha egihina: “Munasayela ddi?” Aliwa omwakula yegihina: “Rabi (enatapulela “namahudhiha”) mwakeliwe vaade vawani?”
39 Oliye wawakula egihina: “Ndoweni mwanonevo.” Nuwindo aliwa odhowa ononavo vaade vakeliwiye, teto labo nenne aliwa okala vamodha. Yaali mawora a 16.
40 Andere ddibila a Simawu Peduru, aali mmodha wa athu yaale abiili yawiwale madhu a Juwawu nuwindo aliwa omuharaga Yesu.
41 Vobajha Andere onfwanya ddibile ithaniwa Simawu, ni omwaddela egihina: “Nihinfwanya Mesiya” (enatapulela Kiristu),
42 vano omudhowana waali Yesu. Yesu nuumusugwa oliye owoga egihina: “We oli Simawu, mwaana a Juwawu.” Vano onithaniwege Sefaji” (enatapulela Peduru).
43 Labo noharela Yesu afuna adhowe oGalileya. Nuwindo onfwanya Filipi ni owoga egihina: “Okale namahara aaga.”
44 Filipi aali ooBetizayida sidadi ya Andere ni Peduru.
45 Vano Filipi ogumana ni Nataniyeli ni omwaddela egihina: Nihinfwanya ole malamulo a Moyizeji ni anamavuhulela yalembiwa wodhela oliye yegihina: Yesu, mwaana Juze, Munazarenu.”
46 Mbwenye Nataniyeli omukoha egihina: “Nerege oNazare podi okumawo ethu yapamene?” Filipi omwakula egihina: “Kandowe wamoone.”
47 Yesu numoona Nataniyeli amwaddamelaga owoga wodhela oliye egihina: “Kamusugweni, Mwizarayelita ebaribari, ahinoota anna ofiya.”
48 Nataniyeli omukoha egihina: “Nabwiya nyu muginonne addi?” Yesu omwakula egihina: “Filipi ahinathi wuwithana ogaali musiddo mwa nfigera miyo gahuwoona kale.”
49 Nataniyeli owoga egihina: “Rabi, nyu muli Mwaana a Mulugu, ni mwene oWizarayeli.”
50 Yesu omwakula egihina: “We onarumedha mwaha miyo wuwaddela wihina guhuwona kale ogaali musiddo mwa nfigera? We onere woona dhithu dhinlubale okwaranya dhendha.”
51 Nuwindo oliye omwaddela egihina: “Ginowuwaddela ebaribari: Nyu munere woona odhulu wigafuguwe angero a Mulugu egwelaga ni ekitaga edhaaga vili Mwaana Muthu.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
