Dhilebiwe ni Juwawu 10:1-42
10 “Ginowuwaddelani ebaribari: Anavolowa munikolani mwa mambila ahivirile vamulago, mbwenye anavira mburo mmodha wahili mulago, muthu yoyo mbava.
2 Mbwenye namakukula a mambila, dinavira vamulago.
3 Namasugwera onowafugulela musiwo. Oliye onowithana kadda nimbila ni ndina newa indo wathukulela ode.
4 Amala waakumiha mambila matene, oliye onosogola aliwa omuharaga, mwaha ehinona ndhu naaye.
5 Aliwa kinadha ehara ndhu na muthu yahimunonniwa, mbwenye enere othawa mwaha kinonne ndhu na muthu yoyo.”
6 Naarive Yesu agasorihile nladdaniho nna, aliwa kiyawoonelemo madhu awogiliye.
7 Bumwahaya, Yesu adhe awogege dila biili egihina: “Ginowuwaddelani ebaribari: Miyo gili mulago wa mambila.
8 Aatene yaale edhiile yalekethaga athu ni ndina naaga ambava, bumwahaya mambilaya edhe yahavuruwanege.
9 Miyo gili mulago. Muthu yole anavolowe mulago yola onovuluwa, vano anere ovolowa ni akume indo afwanye mpodda.
10 Mbava anadhela wiiya, opa ni ogujhula dhithu baahi. Mbwenye miyo gidhele wihina mukanne egumi ni malabo owinjhiva.
11 Miyo gili namakukula apama, namakukula apama onovaha egumaye mwaha wa mambila aye.
12 Namalaba, ahili namakukula teto mambilaya yahili aye, oona mwiijhi odhaga oliye onowahiya mambilaya othawa, vano mwiijhiya onowahidda ni onowabalalesa,
13 oliye onoothawa mwaha namalaba ni kanaapwatha mambilaya.
14 Miyo gili namakukula apama. Gihanona mambila aaga teto mambilaya ehiginona,
15 mowindo ninga Ababa eginoniliwa miyo gihanona Ababa ni ginovaha egumaaga mwaha wa mambila.
16 “Teto gihikanna mambila mamodha ehili a nikola nenna, nalaya ginere wadhana, aliwa enerege ovuruwana ndhu naaga ni eneere okala nikuuru nimodhave, nnamakukula mmodha baahi.
17 Bumwahaya Ababa egagidhivela, mwaha gihivelela egumaaga, wihina gaakele dila yanabili.
18 Kaawo muthu anagaka egumaaga, mbwenye miyo ginavelela ni murimaga wamuteene. Gihikanna oneeti wovelela ni wowakela dila biili. Gihakela nlamulo nna ni Ababa.”
19 Mwaha wa madhu yala awongiye, majudewu ogawanyeya dila biili.
20 Athu owinjhiva wa aliwa yowoga yegihina: “Oliye ohukanna demoniyu teto ohusavuwa. Mwahaya bwaddi muganvuruwana?”
21 Athu amodha yowoga yegihina: “Muthu anna demoniyu kanawoga ni makalelo yala. Nerege demoniyu podi wafugula mento a muthu ahinoona?”
22 Mudhidhi yole, okalawo Mathanga Oopeleka nyumba ya Mulugu oJeruzale. Teto waali mudhidhi wooriidha,
23 vano Yesu eera weedda mutempulu nikodde na Salomawu.
24 Nuwindo, Majudewu omurijha ni omukoha yegihina: “Nnagomelena wani wanganyedha wula ninnihuna? Akala we oli Kiristu, kanaddele ebaribariya.”
25 Yesu wawakula egihina: “Miyo gihuwaddelani, mbwenye naarive dhigaali ndo nyu kamunarumedha. Mabasa ginaaparimi ni ndina na aBaba enovaha onamoona waaga.
26 Mbwenye nyu kamunarumedha mwaha kamuli mambila aaga.
27 Mambila aaga enovuruwana ndhu naaga; miyo gihanona teto aliwa enogihara.
28 Miyo ginowavaha egumi yohimala, aliwa kinadha egujhuliwa, ni kaawo muthu anadha agaaka mmadani mwaaga.
29 Ethu egivahile aBaba si yinlubale okwaranya dhithu dhatedhene, ni kawo muthu ananda wawaka mmadani mwa aBaba.
30 Miyo ni Ababa nili mmodha.”*
31 Dila yanabili, Majudewu waddodda mabwe wihina empwesena.
32 Nuwindo, Yesu wawakula egihina: “Miyo gihuwonihani mabasa apama enadhela wa Ababa. Mabasa yala aamatene gawerilimina, enuthukuleleni ogipwesa ni mabwe ddi?”
33 Majudewu omwakula yegihina: “Iyo kannupwesele mabasa apama, mbwenye mwaha woruwana dhithu dhootaleleya; mwaha we naarive ogaali muthu, oniwoona ninga mulugu.”
34 Yesu wawakula egihina: “Malamulo enyu kinawoga yegi: ‘Miyo gihiwoga gegihina: “Nyu muli amulugu”’?
35 Akala athu ayo yaddeliwe madhu a Mulugu ehithaniwa ‘amulugu,’ Dholebela dhihikannave kopolo,
36 nyu munaginkedha miyo, Ababa egitxenihiwa ni egirumiliwa elabo ya vati mwegihina: ‘We onoruwana dhithu dhootaleleya,’ mwaha miyo owoga gegi: ‘Gili Mwaana a Mulugu’?
37 Akala kaginapara mabasa aaBaba, kamugirumedhe.
38 Mbwenye, akala ginowapara, naarive mwahigirumedhaga, mwaarumedhe mabasaya, wihina munone ni murumedhe wihina Ababa eli mwimodhani ni miyo teto miyo mwimodhani ni Ababa.”
39 Dila yanabili aliwa oxixa wihina emmage, mbwenye Yesu othawa.
40 Nuwindo, oliye ovenyavo dila yanabili, odhowa kobela emodha yoJordawu, mburo Juwawu aabaddiziyewo athu vobajhavene, okala wongo.
41 Athu owinjhiva yadhowile ogumana nuliye yowoga yegihina: “Juwawu kerilena yintelelo, newene modha, mbwenye dhithu dhatedhene Juwawu aawogiliye wodhela mulobwana ola sebaribari.”
42 Vano, athu owinjhiva yaali vevale omuroromela.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “nnowiwanana; nili mwimodhani.”
