Dhilebiwe ni Juwawu 11:1-57
11 Mulobwana dhaala ithaniwa Lazaro aali muredda; oliye akala elabo yo Betaniya murudda mmodhave wakala Mariya ni murogoliye Marta.
2 Di Mariya mmodhave aamukuthulele Nabwiya makura oonukwela vano anfufutha manyaloya ni mathithi aye; Lazaro ola aali muredda aali murogoliye.
3 Nuwindo, arogoliye waruma athu wihina yamwaddele Yesu yegihina: “Nabwiyani, mukwinyu ole munathabwinyu omudhivela muredda.”
4 Mbwenye, Yesu agiwale ndo, oliye wawaddela egihina: “Oredda oyo kahiyo wookwana, mbwenye womuthithimihana Mulugu, wihina Mwana a Mulugu athithimihiwe wodhela oliye.”
5 Yesu oomudhivela Marta, Mariya ni murogoliwaya Lazaro.
6 Vano, nuwiwa wihina Lazaro muredda, omala malabo menli agaali mburo yole waaliye.
7 Nuwindo, oliye owoga ni anamaharaye egihina: “Kabeni nihogolowele oJudeya.”
8 Anamaharaye omukoha yegihina: “Rabi, nyu muhunona wihina kunavire mudhidhi wowinjhiva aJudewu yafuniwa wupwesani ni mabwe, vano munafuna muhogolowelewo?”
9 Yesu wawakula egihina: “Mudhidhi wamutana kunakanna mawora 12? Akala muthu onowedda ni waara wamutana, kanakwakwathuwa, mwaha onowoona waara weelabo.
10 Mbwenye, akala muthu onowedda ni mahiyu onokwakwathuwa, mwaha kawinakala waara.”
11 Numala wawoga madhu ala, oliye wenjhedhedhave egihina: “Mukwihu Lazaro ohugonelavo, mbwenye miyo ginadhowa wengo ganvenyihe.”
12 Nuwindo, anamaharaye owoga yegihina: “Nabwiyani, akala oliye onoogona, dhihikala-to.” *
13 Yesu, awoga wodhela okwa wa Lazaro; mbwenye aliwa yubuwela wi Lazaro eere ogonawene baahi.
14 Nuwindo, Yesu wawonelihamo wihina: “Lazaro ohukwa;
15 teto mwaha wa nyu ginohagalala mwaha wohukala wengo, wihina nyu murumedhe. Vano kabeni ndowe wiliye.”
16 Mbwenye, Tome aalemeliwe ni ndina na Mwanapata, wawaddela anamahara amodha egihina: “Nihiyoya kabeni nimuhare, nakwe vamodha nuliye.”
17 Yesu nuufiya, onona wihina Lazaro ahimala malabo mannayi agaali mmahame.
18 Murudda wo Betaniya waddamelawa ni oJeruzale, waali wa makilometuru mararu,
19 teto maJudewu owinjhiva yahidhowa omutodola Marta ni Mariya mwaha okwa wa murogoliwa Lazaro.
20 Marta nuwiwa wihina Yesu onoodha, odhowa ogumana nuliye, mbwenye Mariya ohala vaade.
21 Marta owoga ni Yesu egihina: “Nabwiyani, mwahakale vevala murogolaga kaakwe.
22 Mbwenye naarive dhigaali ndo, gihinona wihina dhatedhene munalobinyu wa Mulugu anere wuvahani.”
23 Yesu omwakula egihina: “Murogoliyo anere ovenya.”
24 Marta owoga egihina: “Gihinona wihina labo nookuthula, oliye anere ovenyihiwa muukwani.”
25 “Yesu omwaddela egihina: “Miyo gili ovenyiha ni egumi. Ole anagiroromela, naarive agakwile anere ohogolowela okalawo;
26 mwaha muthu yoole anakalawo ni anagiroromela, kanadha akwaga. We onorumedha yeyo?”
27 Oliye orumedha egihina: “Hee, Nabwiya miyo ginorumedha wihina nyu muli Kiristu, Mwaana a Mulugu, yoole afuna odha elabo yavati.”
28 Marta numala wawoga madhu ala, omwithanela okwibi ddibile Mariya, omwaddela egihina: “Namahudhiha ohudha, onowuwithana.”
29 Mariya nuwawiwa madhu yaala, ovenya mowaguva odhowa ogumana ni Yesu.
30 Yesu aali ahinafiye murudda wakaliwa, mbwenye aali mburo yole Marta vamugumaniyena.
31 Majudewu yahanle vaade emutodolaga Mariya, numoona oliye avenyaga mowaguva, aliwa omuhara yubuwelaga wihina adhowa omahame unlege.
32 Mariya nufiya mburo ole vaali Yesu, oliye omukokorela ni owoga egihina: “Nabwiya, mwahakale vevala, murogolaga kaakwe.”
33 Numoona Mariya vamodha ni maJudewu yanvelele yunlaga, Yesu wukuuwa vanlubale ni wambela waweddela thagaraga.
34 Oliye wakoha egihina: “Mumpwehile waani?” Aliwa omwakula yegihina: “Nabwiya ndoweni mwamoone.”
35 Vano Yesu wambela wunla.
36 Mwaha wa yeyo majudewu owoga yegihina: “Kamusugweni makalelo oliye amudhiveliye!”
37 Mbwenye athu amodha yaali vevale yawoga yegihina: “Mulobwana ola, aafugunle mento a muliba ohoona, kaande werana ethu-sithu wihina Lazaro ahikwe?”
38 Nuwindo, naarive Yesu agaali owukuwene, oliye odhowa omahame. Mwebaribarene, waali okunguni teto mulagoya wafugiwe nnibwe.
39 Yesu waruma egihina: “Kavenyihawoni nibwena.” Marta murogoliye mwanookwa ole, omwakula egi: “Nabwiyani, podi wera ohambela onukwa, mwaha ehivira malabo mannayi.”
40 “Yesu omwakula egi: “Miyo kaguwaddele wihina wahere ororomela, were woona nthithimiho na Mulugu?”
41 Nuwindo, aliwa ovenyihavo nibwe nne. Yesu osugwa odhulu ni owoga egihina: “Babani, ginowutamalelani mwaha muhugivuruwana.
42 Mwebaribarene, gihinona wihina munogivuruwanesa, mbwenye giwogile mwaha anamwinjhi egapeenle, wihina ekanne ebaribari wi nyu digirumile.”
43 Nuwawoga madhu ala, oliye omwithana ni ndhu nootama egihina: “Lazaro, kakumela ode!”
44 Muthu ole aakwile okumela ode agaapothiwe ni esala moddo, moono ni wintoniwa. Yesu wawaddela egihina: “Mutapuleni mmwihiye adhowege.”
45 Vano, maJudewu owinjhiva yadhowile omwaredhela Mariya nuwoona dhithu enrena Yesu, aliwa wambela omuroromela,
46 mbwenye amodha waaliwa, odhowa wawaddela Afarizewu dhithu erilena Yesu.
47 Nuwindo, anddimuwa aanamakutha vamodha ni Afarizewu otugumana Sinediriyu yatene ni owoga yegihina: “Woona wi mulobwana ola matikiniho aye enna othabwa winjhiva, kivano neere ddi?
48 Namwihiya aweraganave ndala, athu aatene enerege omuroromela, teto akudda Roma enoonaka mburo wehu ni nlogonihuna.”
49 Vano mmodha waaliwa ithaniwa Kayifaji, aali namakutha yaka yeele, wawaddela egihina: “Nyu kamunonne ethu,
50 newene kamubuwele wihina sapama epaddi yenyu muthu mmodha okwa mwaha wa nlogo nenyu, ohiya nlogo naatene otolosiwa.”
51 Mbwenye oliye kawogile madhu ala ni efunelo aye, woona wihina aali namakutha yaka yeele, Mulugu omulabihedha wihina avuhulele wi Yesu eere okwa mwaha wa nlogo,
52 kaakwe mwaha wa nlogove nne baahi, mbwenye wihina aatugumane ahima a Mulugu yamanle obalaleya.
53 Vano, okuma labo nenne odhowa osogolo wambela omwiwananela wihina empe.
54 Mwaha wa yeyo, Yesu keedda bure-bure aJudewu emoonaga, mbwenye oliye okuma mburo yoole odhowa murudda waddamele mwiddeddereni, sidadi dhaala yithaniwa Efrayimu, okala wengo ni anamaharaye.
55 Eera waddamela Paskwa amaJudewu, teto athu owinjhiva yadhela othemba yodhowa oJeruzale wihina yatxenihiwe mowiwanana ni nlamulo.
56 Athu yomusayela Yesu mutempulu ni yokohana vikaleliwa yegihina: “Munoonamo aavi? Yesu kanadhe vamathangani?”
57 Mbwenye, anddimuwa aanamakutha ni aFarizewu yahawaddela athu wihina anaanone mburo vinaakale Yesu, adhowe awaddele wihina edhe emmage.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “aneere ovenya.”
