Dhilebiwe ni Juwawu 12:1-50
12 Ehalaga malabo 6 wihina ajhiwe Paskwa, Yesu ofiya oBetaniya, murudda wakala Lazaro, yole Yesu aanvenyihiye muukwani.
2 Nuwindo, ompiyela jantari; mbwenye Marta damugawa teto Lazaro aali mmodha waathu yaale yajha vamodha ni Yesu.
3 Vano, Mariya wathukula makura ookwima ni oonukwela * yasasanyiwe ni nardu ahataganyihedhiwe niithu, wakuthulela manyalo a Yesu, nuwindo, wafufutha ni mathithaaye. Onukwela wa makura ale odhaala nyumba yaatene.
4 Mbwenye, Judasi Iskariyoti, mmodha wa anamaharaye afuna omuguliha, owoga egihina:
5 “Mwahaya bwaddi makura ayo oonukwela edhe yahigulihiwege 300 denariyu, korowadha dhivahiwa athu oohawa?”
6 Mwebaribarene, oliye kawogele mwaha owathuwathuwela athu oohaawa, mbwenye mwaha aali mbava; teto duliye asamalela kaxa mwakoyiwa korowa ni owiyesamo korowa dhapwehiwamo.
7 Yesu owoga egihina: “Kamwihiyeni muhiyana ola erena anafuniye wihina oonihe okoyiwa waaga muukwani.
8 Mwaha nyu malabwene munookalesa naaliba ohawa, mwafuna podi wawerela opama, mbwenye kamunaakalege malabo aamatene ni miyo.”
9 Mudhidhi yole, muthithi waathu wa Majudewu onona wihina oliye aali oBetaniya, naaliwaya odhowa wengo, kahi wihina yadhowilewo wi yamoone Yesu baahi, mbwenye yafuna yamoone ni Lazaroya, yoyo aavenyihiwe muukwani.
10 Anddimuwa aanamakutha opangana wihina yampe ni Lazaroya,
11 woona wihina Majudewu owinjhiva yodhowawo ni yomuroromela Yesu mwaha wa Lazaro.
12 Labo noharela, muthithi waathu wadhowile omathangani onona wihina Yesu eere oddemulela oJeruzale.
13 Nuwindo, aliwa wathukula makubari omuharelagana ni ekuwaga yegihina: “Kamwerena, nivuluseni! Oothithimihiwa duule anadha ni ndina na Yehova! Oothithimihiwa di Mwene oWizarayeli!”
14 Yesu onfwanya mwanaburu ni omugwela, ninga dholebela dhinawogiwa dhegihina:
15 “Kuwoove, mwaana Siyawu. Kasugwa! Mwenaawo onoodha agamugwenle mwanaburu.”
16 Omambelelo, anamaharaye kiyonelemo ele yeriliwana, mbwenye Yesu nuthithimihiwa, aliwa wubuwela wihina dhithu yaamwereliwa dhahilebiwa kale wodhela oliye.
17 Athu yalivo mudhidhi Yesu amwithanaga Lazaro wihina akumele ode wa mahame ni anvenyihaga muukwani, yovaha onamoona.
18 Bumwahaya muthithi ole waathu odhe omaruwege wihina wagumane ni Yesu, mwaha yahiwa wi duliye awerilena matikiniho ala.
19 Vano, Afarizewu wambela onong’ona vikaleliwa yegihina: “Kasugwani, kannapuravo ethu. Moone makalelo athu aatene enamuhariwa!”
20 Waathu yaale yadhowile webedha omathangani, amodhaya yaali aGerego.
21 Aliwa omwaddamela Filipi, aali ooBetizayida sidadi yoGalileya, vano, aliwa omuloba yegihina: “Nabwiyani, nnafuna nimone Yesu.”
22 Filipi odhowa omwaddela Andere. Vano, Andere ni Filipi omaruwa, odhowa omwaddela Yesu.
23 Mbwenye, Yesu wawakula egihina: “Mudhidhi wa Mwaana Muthu ohufiya wihina athithimihiwe.
24 Ginowuwaddelani ebaribari gegihina: Akala thanga ya tirigu kinamothela vathayani ekwa, enakala thanga emodhave; mbwenye, akala enookwa enovaha dhowima dhowinjhiva.
25 Mwaha ole anadhivela egumaye anere oyelela, mbwenye ole aniidda egumaye elabo yela anere okoya wihina aakele egumi yohimala.
26 Akala muthu onofuna ogilaba, agiharege; venvo ginakalimivo, nuliyeya anakale vevene. Muthu yole anafuna ogilaba, Ababa enere omuthithimiha.
27 Vano, gihithabwa wukuuwa, ki vano giwoge ddi? Babani, givuluseni mudhidhi yola. Teto, siyela egithukulele odha mudhidhi yola.
28 “Babani, muthithimihe ndina nenyu.” Nuumala, wiweya ndhu nadhela odhulu negihina: “Miyo gihithithimiha ni ginere othithimihave dila biili.”
29 Muthithi waathu waali vevale ni wiwale ndhu nadhela odhulu wubuwelaga wihina dari sirumile. Mbwenye amodha yawoga yegihina: “Mungero diwogile nuliye.”
30 Yesu wawakula egihina: “Ndhu nno kanidhile mwaha wa miyo mbwenye nidhile mwaha wa nyu.
31 Vano, elabo ela enna otorihiwa; ovanene namathonga eelabo ela anere wigariwa.
32 Mbwenye, miyo gamala otomeyiwa * velaboni yavati ginere odahinya murima dhaathu ohiyana-hiyana.”
33 Mwebaribarene, oliye aawogile madhu ala wihina oonihe makalelo afuniye opiwa.
34 Nuwindo, muthithi ole waathu omwakula wegihina: “Nihiwa Mmalamuloni wihina Kiristu anere okalawo nimukalakala. Ki mwahaya bwaddi ogawoga wihina Mwaana Muthu anere otomeyiwa? Mwaana Muthu yoyo baani?”
35 Vano, Yesu wawaddela egihina: “Waara winere okala ni nyu mudhidhi vang’ono. Mweeddege ovanene munninyuna waara, wihina yiihi yahugonjhiheni; ole aneedda muyihini kanonne winayiyewo.
36 Vevala munninyuna waara muroromelege waara, wihina mukale ahima a waara.”
Yesu numala wawoga madhu yala, oliye ovenyavo mburo yole, wipita.
37 Naarive oliye agawerilena matikiniho owinjhiva aliwa yaawonaga, newene kimuroromele,
38 wihina yakwanele madhu a namavuhulela Izayiya enawoga yegihina: “Yehova, anaaroromele madhu naawogilihu baani? Aaddeliwe kopolo dhinna moono wa Yehova baani?
39 Ohiya eyo, Izayiya wawaddela mwahaya bwaddi edhe yaharumedhege egihina:
40 “Oliye wafuga mento ni wummiha murima dhewa wihina mento ewa yahoonege newene murima dhewa dhahonelegemo ethu, musaddule eguminyu, wihina miyo guwoboleni.”
41 Izayiya aawogile ndo mwaha ahoona nthithimiho na Kiristu.
42 Ohiya eyo, ni anamaholelaya aMajudewu mwebaribarene yomuroromela, mbwenye mwaha wa Afarizewu, kayanvuwiha vaari vaathu yovaga wigariwa musinagoga,
43 mwaha yadhiveliwa wathithimiha athu ohiya omuthithimiha Mulugu.
44 Nuwindo, Yesu owoga ni ndhu nootama egihina: “Muthu yole anagiroromela, kanagiroromela miyeneve baahi, mbwenye anamuroromela nuleya agirumile;
45 teto muthu yole anagoona, anoomoona Nuleya agirumile.
46 Miyo gidhile mwilaboni ninga waara, wihina muthu yole anaagiroromele miyo ahikale muyihini.
47 Mbwenye, akala muthu onowawiwa madhu aaga ni kanaparihedha mabasa, miyo kaginamutoriha, mwaha miyo kagidheele otoriha elabo, mbwenye gidhele ovulusa.
48 Muthu yole anagilamusa ni ahinarumedha madhu aaga, ohukalawo anamutoriha. Madhu gawogilimi binamutorihe labo nookuthula.
49 Mwaha dhithu giwogilimi kadhinakuma mmuruni mwaaga, mbwenye dhinakuma wa Ababa egirumile, aliwene bigivahile malamulo wodhela ethu ginawogimi ni ginahudhihimi.
50 Miyo gihinona wihina malamulo ewa enatapulela egumi yohimala. Bumwahaya, dhithu dhatedhene ginawogimi, ginawoga ninga Ababa egaddeliwa.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Lit., meyu kilu, owakwana 327g.
^ Obe: “okomeliwa vantxikwani na goyi.”
