Dhilebiwe ni Juwawu 16:1-33
16 “Miyo guwaddeleni dhithu ndha wihina mwahikwakwathuwe.
2 Athu enere wuwigarani musinagoga. Ohiya eyo, onere ofiya mudhidhi ale enaafunege wupani enubuwelegiwa wihina enaapara mabasa ootaleleya a Mulugu.
3 Mbwenye aliwa eneere werana ndo mwaha kiyanonne aBaba teto newene kiginonne.
4 Miyo guwaddeleni ebaribari ela wihina wafiya mudhidhiya dhinafuniiwa opadduwa nyu mubuwele wihina gahiwoga dhithu ndha.
“Miyo kaguwaddeleni dhithu ndha omambelelowene mwaha gaali vamodha ni nyu.
5 Mbwenye vano ginodhowa wa Ole ogirumile; naarive dhigaali ndo kaavo newene mmodha wa nyu anagikoha egihina: ‘Nabwiya munaya wani?’
6 Teto mwaha miyo wuwaddelani dhithu ndha, murima dhenyu dhinna okubanya.
7 Mowindo, miyo ginowuwaddelani ebaribari: Ginadhowa mwaha wa opama weenyu. Mwaha miyo gaahidhowa namakavihera kanadhe wa nyu, mbwenye miyo gadhowa ginere omuruma.
8 Oliye afiya mwilaboni anere woniha pamadhene yothega ddi, wogowa ddi ki otoriha wa Mulugu winatapulela ddi:
9 vobajha, wodhela yothega, mwaha aliwa kinagiroromela;
10 voharela, wodhela wogowa, mwaha ginadhowa wa Ababa teto nyu kamunadha mugoona;
11 vano, wodhela otoriha, mwaha namathonga eelabo ela ohutorihiwa.
12 “Ginofuna wuwaddelani dhithu dhowinjhiva mbwenye ovanene vala nyu kamunaakwanihe.
13 Mowindo, wafiya muzimu webaribari onere wuwaddelani ebaribari yatene, mwaha kunaawogege dhithu dhaaye mbwenye onawogege dhithu iwaliye ni anere wuwaddelani dhithu dhinapadduwe osogolo.
14 Oliye anere ogithithimiha, mwaha anere wuwaddelani ele iwaliye wa miyo.
15 Dhithu dhatedhene Ababa enniwana saaga. Bumwahaya gidhe giwogege gegi, oliye anere wuwaddelani ele iwaliye wa miyo.
16 Vohilegela nyu kamunadha mugoona teto vohilegela ginere ohogolowa.”
17 Mwaha wa yeyo, anamaharaye amodha wambela okohana vikaleliwa yegihina: “Madhu ala owi ‘vohilegela nyu kamunadha mugoona teto vohilegela ginere ohogolowa’ mwaha ‘ginaya wa Ababa, enatapulela ddi’?”
18 Aliwa yokohana yegihina: “Madhu ala owi: ‘Vohilegela’ kannonelamo ethuya afuniye owoga.”
19 Yesu ahinona wihina yafuna emukohegeve, bumwahaya adhe awaddelege egihina: “Nyu munna okohana vikalelinyu mwegi, gafuna giwoge ddi ni madhu ala gawogilimi gegihina: ‘Vohilegela nyu kamunadha mugoona teto vohilegela ginere ohogolowa?’
20 Ginowuwaddelani ebaribari: Nyu munere wunla ni munere wikubanyedha mbwenye elabo enere ohagalala; nyu munere wukuuwa mbwenye wukuuwa weenyu winere osadduwa wikale ohagalala.
21 Muhiyana afunaga ombala mwaana, onowoona goyi vanlubale mwaha ohufiya mudhidhaye; mbwenye ambala mwaanaya goyi ele ooniliye onoddiwala teto onohagalala mwaha ohubaliwa muthu.
22 Nimakalelo mamodhave, ovanene vala nyu muli owukuwene mbwenye miyo gahogolowa murima dhenyu dhinere ohagalala ni kawo muthu anadha uwaakani ohagalala weenyu.
23 Labo nenno nyu kamunadha mugikohaga newene nikoho nimodha. Ginowuwaddelani ebaribari: Mwaaloba Ababa ethu-sithu ni ndina naaga, aliwa enere wuvahani.
24 Ofiyedha mudhidhi yola nyu kamunalobe newene ethu modha ni ndina naaga. Kalobani munere ovahiwa wihina ohagalala weenyu wakwanele.
25 “Miyo gihuwaddelani dhithu ndha gilabihedhaga dholaddaniha. Vano onere ofiya mudhidhi ginawogegimi gihilabihedhaga dholaddaniha; mbwenye ginawogege wodhela Ababa mwamakalelo owoneleyamo.
26 Labo nenno nyu munere waloba Ababa ni ndina naaga. Kahiyo wihina dhooloba dhenyu anaalobege di miyo.
27 Annyene Ababa enowudhivelani mwaha nyu muhukanna odhivela ni miyo ni munorumedha wihina miyo girumiwe ni Mulugu.
28 Girumiwe ni Ababa miyo odha elabo yavati. Vano, ginohiya elabo ela ginadhowa wa Ababa.”
29 Anamaharaye omwaddela yegihina: “Vano mbwenye, munawoga mowoneleyamo mwahilabihedhaga dholaddaniha.
30 Vano nihikanna ebaribari wihina nyu nabwiya muhunona dhithu dhatedhene ni kamunahowela okohiwa. Bumwahaya iyo nnorumedha wihina nyu nabwiya mudhile wa Mulugu.”
31 Yesu wakoha egihina: “Vano nyu munorumedha?
32 Nvuruwane: Onere ofiya mudhidhi teto mudhidhiya ohufiya, nyu munere obalaleya kadda muthu adhowege vadevaye, ni munere ogihiya meeka. Mbwenye kagili meeka, mwaha Ababa eli ni miyo.
33 Ginowuwaddelani dhithu ndha wihina wodhela miyo mukanne murenddele. Mwilaboni munere okanna makathamiho, mbwenye mulibe murima! Miyo gihigonjhiha elabo.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
