Dhilebiwe ni Juwawu 17:1-26
17 Yesu nusoriha dhithu ndha, osugwa odhulu ni owoga egihina: “Babani mudhidhiya ohufiya. Muthithimiheni mwaninyu, wihina mwaninyu uthithimiheni,
2 ninga munvahilinyu onamathonga waathu aatene, wihina aavahe egumi yohimala athu aatene munvahilinyu.
3 Ela enatapulela egumi yohimala: wihina yunoneni nyu Mulugu mmodha eebaribari, nuule mmurumilinyu, Yesu Kiristu.
4 Miyo guhuthithimihani elabo yavati ni gihamariha mabasa mugivahilinyu wi gaapare.
5 Vano, Babani, githithimiheni vamentoni veenyu ni nthithimiho gannimina ngali ni nyu elabo yahinathi okalawo.
6 “Miyo gihawaddela ndina nenyu athu mugivahilinyu elabo yavati. Aliwa yaali eenyu, nyu ogivaha, aliwa ehawiwelela madhu enyu.
7 Vano aliwa ehinona wihina dhithu dhatedhene mugivahilinyu dhaali dhenyu;
8 mwaha miyo gihawaddela madhu matene mugaddenlinyu, teto aliwa eharumedha ni ehinona wihina gidhile ninga namasogolela eenyu, ni enorumedha wihina nyu digirumile.
9 Miyo ginaloba vamburoni vewa, kaginaloba vamburoni va elabo mbwenye mwaha wa ale mugivahilinyu, woona wihina beenyu;
10 dhithu dhatedhene ginnimina seenyu, teto dhenyu saaga, bumwahaya miyo gihithithimihiwa vaari vewa.
11 Miyo kagilive mwilaboni, mbwenye aliwa eli mwilaboni, teto miyo ginadhowa wa nyu. Babani Oweela, mwasugwerege mwaha wa ndina nenyu, ndina mugivahilinyu, wihina ekale mwimodhani ndala ninga nyu ni miyo nilihu mwimodhani.
12 Miyo ngaali naaliwa gowasugwera, mwaha wa ndina nenyu, ndina mugivahilinyu; miyo gihabarela bumwahaya newene mmodha wa aliwa karimeele ahili mwaana ole oomatolosiwelo, wihina Dholebela dhakwanele.
13 Vano miyo ginadhowa wa nyu ni ginawoga dhithu nda ngali mwilaboni wihina aliwa yoone pamadhene ohagalala waaga.
14 Miyo gihavaha madhu enyu, mbwenye elabo enowawidda mwaha aliwa kili epaddi ya elabo mowindala ninga miyo gahilimi epaddi ya elabo.
15 “Kaginuulobani wihina mwavenyihemo mwilaboni mbwenye mwasugwerege mwaha wa Mbure.
16 Aliwa kili epaddi ya elabo, ndo ninga miyo kagili epaddi ya elabo.
17 Mwatxenihe wodhela ebaribari; mwaha madhu enyu beebaribari.
18 Mowindala ninga nyu mugirumilinyu mwilaboni ni miyoya giharuma mwilaboni.
19 Miyo ginowitxeniha mwaha wa aliwa wihina naaliwaya etxenihiwe wodhela ebaribari.
20 “Miyo kaginuulobani mwaha waalenave baahi, mbwenye mwaha wa ale enagiroromela wodhela madhu ewa,
21 wihina aatene ekale mwimodhani, ninga nyu Babani mulinyu mwimodhani ni miyo teto miyo mwimodhani ni nyu, vano naaliwaya ekale mwimodhani ni iyo, wihina elabo erumeedhe wi di nyu agirumile.
22 Miyo gihavaha nthithimiho mugivahilinyu wihina aliwa ekale mwimodhani ninga iyo nilihu mwimodhani.
23 Miyo mwimodhani ni aliwa teto nyu mwimodhani ni miyo, wihina ekale pamadhene mwimodhani vano elabo enone wihina di nyu agirumile ni muhadhivela ninga mugidhivelinyu.
24 Babani, ginafuna wihina ale mugivahilinyu ekale ni miyo venvo ginafunimi okalavo, wihina yoone nthithimiho mugivahilinyu, mwaha muhugidhivela obajha kale elabo yahinapaddusiwe.
25 Babani owogowa, mwebaribarene elabo kayunonneni mbwenye miyo gihunonani teto aliwa ehinona wi agirumile di nyu.
26 Miyo gihanoniha ndina nenyu ni gineerege wanonihave, wihina odhivela mugidhivelinyuna okale naaliwa, miyo naaliwa nikale mwimodhani.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
