Dhilebiwe ni Juwawu 18:1-40
-
Judasi onomuguliha Yesu (1-9)
-
Peduru onolabihedha supadda (10, 11)
-
Yesu onothukuleliwa wa Anaji (12-14)
-
Dila yobajha Peduru anamukoddiye Yesu (15-18)
-
Yesu agaali vamentoni va Anaji (19-24)
-
Dila yanabiili ni yanatharu Peduru anamukoddiye Yesu (25-27)
-
Yesu agaali vamentoni va Pilatu (28-40)
-
“Omwene waaga kahiyo weelabo yela” (36)
-
18 Numala wawoga madhu ala, Yesu ni anamaharaye wabuwela kobela emodha ya nthiya nooSedroni, murudda yole Yesu ni anamaharaye yadhowiliwawo ahikalawo jardi.
2 Teto Judasi, yole afuna omuguliha ahinonawo mburo yole, mwaha malabo owinjhivene Yesu ahitugumana wewule naanamaharaye.
3 Nuwindo, Judasi odhana nikuru naatoropa ni nanamasugwera naarumiwe ni anddimuwa aanamakutha ni aFarizewu, aliwa yadhile ni malampadiwa ni masupaaddiwa.
4 Vano, Yesu nunona dhithu dhatedhene dhafuna ompadduwela, oliye weedda vang’ono odhowa osogolo ni wakoha egihina: “Munamusayela ani?”
5 Aliwa omwakula yegihina: “Yesu Munazarenu.” Oliye wawaddela egi: “Di miyo.” Judasi, ole aamugulihe, ali vamodha naaliwa.
6 Vano Yesu nuwawaddela egihina: “Di miyo,” aliwa ohogolowela mundduli ni omothela vati.
7 Nuwindo oliye wakoha dila biili egihina: “Nyu munamusayela aani?” Aliwa omwakula yegi: “Yesu Munazarenu.”
8 Yesu wawakula egihina: “Miyo gihuwaddelani gegi di miyo. Vano, akala munagisayela miyo, mwaahiye alobwana ala edhowege.”
9 Eyo yapadduwe wihina yakwanele madhu awogiliye egihina: “Kagimuyelele newene mmodha wa athu yaale mugivahilinyu.”
10 Vano Simawu Peduru, oweta supaddanaye oliye ogwadda nibaru na moono woojha na mudhaari anamakutha, ithaniwa Malku.
11 Mbwenye Yesu omwaddela Peduru egihina: “Kahogolosela supadda muyinuni. Onoona wi kagifwanelele ong’wa kopo egivahile Ababa?”
12 Nuwindo, atoropa, namasogolela aatoropa ni anamasugwera a majudewu omwihidda Yesu aliwa ommaga.
13 Voobajha aliwa omuthukulela wa Anaji mwaha okala moyaye Kayifaji, aali namakutha munlubale yaka yele.
14 Mwebaribarene aali Kayifaji awaddenle majudewu wihina yere okala yapama muthu mmodha okwela nlogo.
15 Simawu Peduru ni namahara mmodhaya, yomuhara Yesu. Namahara yola aanoniwe nnamakutha munlubale, ofiya ni Yesu vathaddo vanamakutha munlubale,
16 mbwenye Peduru okala ode waddamela ni musiwo. Vano namahara ole aanoniwe nnamakutha munlubale ovenya, odhowa owoga ni mudhaari a muhiyana asugwera musiwo nuwindo omweenya Peduru wihina avolowe.
17 Mudhaari ole, omukoha Peduru egihina: “Mulobwana ole namaharaye mmodha, kahiyo wene oli vala?” Oliye omwakula egi: “Naari kahiyo miyo.”
18 Adhaari ni anamasugwera yanna wootha mootho yatubanyiliwa mwaha wooriidha. Teto Peduru aali vamodha naaliwa oothaga.
19 Vano munddimuwa aanamakutha, omukohaga Yesu wodhela anamaharaye ni mabasa aapariye oohudhiha.
20 Yesu omwakula egihina: “Miyo goohudhiha nlogo vaari vaathu. Malabwene gohudhiha musinagoga ni mutempulu, mburo mwatugumana majudewu ni kagiwogile ethu moviteya.
21 Mwahaya bwaddi nabwiya mugagikoha? Kaakoheni athu yiwale dhithu giwogilimi. Naaliwaya ehinona dhithu giwogilimi.”
22 Yesu numala wawoga madhu ala, namasugwera mmodha aamwaddamele, onvaha nikofi ni omukoha egihina: “Onamwakula ndo namakutha munlubale?”
23 Yesu omwakula egihina: “Akala miyo giwogilimi sabure kagaddele ethuya giviriganihimi mbwenye akala kagiviriganihe ethu kito onagivadela ddi?”
24 Vano, Anaji omuruma oomagiwene wa namakutha munlubale Kayifaji.
25 Simawu Peduru aali vevale oothaga. Vano aliwa omukoha yegihina: “Ni weya kuli mmodha wa anamaharaye?” Oliye okoodda egi: “Naari kahiyo miyo.”
26 Vano mudhaari mmodha a namakutha munlubale aali mmudhi a mulobwana ole Peduru amugwaddiliye nibaru, omukoha egihina: “Miyo kaguwonile ojardi ogaali vamodha nuliye?”
27 Nuwindo, Peduru okooddave, vohilegela mutubi wunla.
28 Vano, aliwa omuthukula Yesu wa Kayifaji, omudhowana vaade va musadoro. Waali mudhidhi wa mambesi. Mbwenye aliwa kiyafile vaade vamusadoro wihina enaatakale * yindo emujhe Paskwa.
29 Nuwindo, Pilatu ovenya odhowa ogumana naliwa ni wakoha egihina: “Mulobwana ola munamusumelinyu, anna muladdu baani?”
30 Aliwa omwakula yegihina: “Mulobwana ola ahere ahikala mpanga iyo kanampeleke mmadani mweenyu.”
31 Vano Pilatu wawaddela egihina: “Mmuthukule mwaannya mwamutorihe mowiwanana ni nlamulo neenyu.” Majudewu omwakula yegihina: “Iyo kannenyiwa ompa muthu.”
32 Eyo yapadduwe wihina yakwanele madhu aawonge Yesu yoniha makalelo oliye afuniye opiwa.
33 Nuwindo, Pilatu ovolowa mba mwa musadoro, omwithana Yesu ni omukoha egihina: “We oli mwene amajudewu?”
34 Yesu omukoha egihina: “Nabwiya, munakohela mwaha munoonamo ndo obe ohukala muthu uwaddenleni?”
35 Pilatu omwakula egihina: “Miyo gili Mujudewu? Nlogo nawo ni anddimuwa aanamakutha bupelekile mmadani mwaga. Ethu baani weriliwena?”
36 Yesu waakula egihina: “Omwene waaga kahiyo weelabo yela. Omwene waaga wahakale wa elabo yela, anamahara aaga yere owana koddo wi gihipelekiwe mmadani mwa ajudewu. Ebaribariya sowi, Omwene waaga, kahiyo wa elabo yela.”
37 Vano Pilatu omukoha egihina: “Dhihikala, gerege we oli mwene? Yesu omwakula egi: “Nabwiya anawoga di nyu wi miyo gili mwene. Bumwahaya gidhe gibaliwege teto siyeyo gidhelimi mwilaboni muna: wihina givahe onamoona webaribari. Muthu yole ali epaddi ya ebaribari onovuruwana ndhu naaga.”
38 Pilatu omukoha egihina: “Ebaribari ddi?”
Numala wawoga madhu ala oliye ovenyavo dila yanabiili odhowa ogumana ni Majudewu ni wawaddela egihina: “Miyo kaginoona muladduya munamwinkedhinyu mulobwana ola.
39 Ohiya eyo, mudhidhi wa Paskwa nyu muhukanna elamalelo yogiruma wihina gimukumihe muthu mukambura. Mowindala, munafuna wihina gimutapule mwene amajudewu?”
40 Aliwa okuwave dila yanabiili yegihina: “Mulobwana oyo naari; nnanfuna Baraba!” Mwaha Baraba aali mpanga.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “enanyakavale.”
