Dhilebiwe ni Juwawu 2:1-25
2 Labo nanatharu wahikala mathanga a matelo oKanaa murudda woGalileya, teto amaye Yesu yahikalavo.
2 Yesu naanamahara aye yahithaneliwa omathangani wule wamatelo.
3 Vinyuya aajaga omala, amaye Yesu owoga nuliye yegihina: “Aliwa kinna vinyu.”
4 Mbwenye Yesu wawakula amaye egihina: “Miyo ni nyu nnavolowa vaavi? Mudhidhi waga kunafiye.”
5 Vano amaye owoga ni adhaari ale yamugawa vinyu yegihina: “Mwerena ethu anuuwaddeliyeni.”
6 Mburo yole dhahikalavo muno 6 dha mabwe, yapwehiwamo manjhe owitxenihana mowiwanana ni malamulo amaJudewu; kadda muno dhooyamo mpimo * minli obe miraru.
7 Yesu wawaddela egihina: “Mudhaalihe muno dhatedhene ni manjhe.” Aliwa odhaliha tholoo.
8 Vano oliye owoga egihina: “Mmurugwemo vang’ono mwaanvahe muliba anaweddiha mathanga a matelo wihina amulawihe.” Aliwa werana ndo.
9 Vano muliba aweddiha mathanga nuwalawiha manjhe ale yasadduliwe ekala vinyu, ahinonaga wadheele vinyuya (naarive adhaari ale yarungwe manjhe eganonne), muliba aweddiha mathanga ale amatelo, omwithana namatelaya
10 omwaddela egihina: “Athu amodha enarajhiha omugawa vinyu oowawa, vano athu aatene yamala olezela omugawaga ole ahinawawa. Mbwenye we ohumukoyave vinyu oowawa ofiyedha mudhidhi yola.”
11 Yesu awenrena matikiniho ala oKanaa murudda woGalileya ninga yintelelo yaye yoobajha, ni woneyiha nthithimiho naaye, vano anamahara aye obajha omuroromela.
12 Nuwindo amaye, addibile, anamahara aye odhowa oKafarnawu, mbwenye kayalegenlewo.
13 Aaddamelaga Paskwa amaJudewu, Yesu odhowa oJeruzale.
14 Oliye wafwanya athu yaguliha ng’ombe, mambila, kangayiwa, ni anamakakaniha korowa egakiratile.
15 Vano, nusasanya muwaxuwaxu wa kabala, wawigaramo aatene yaale yaguliha mambila, ng’ombe mutempulu, omwadha korowadhiwadha ni wabidhula meziwaya.
16 Wawaddela ale yaguliha kangayiwa egihina: “Kavenyihamoni dhithu ndha! Muselele wawerana malondda nyumba ya Ababa!”
17 Anamahara aye wubuwela dholebela dhawoga dhegihina: “Oviheyana nyumba yababe were ohidda mootho.”
18 Mwaha wa yeyo maJudewu omukoha yegihina: “Yintelelo baani onanonihiwe enatonyihedha wihina ohuvahiwa owedha wowerana dhithu ndha?”
19 Yesu wawakula egihina: “Mbwanyule tempulu ela, miyo ginere wimesa muwari mwa malabo mararu .”
20 Nuwindo maJudewu omwakula yegihina: “Tempulu * ela emagiwe muwari mwa yaka 46, we onafuna wimese muwari mwa malabo mararu?”
21 Mbwenye tempulu oliye awogiye waali mwiili waye.
22 Vano oliye nuvenyihiwa muukwani, anamaharaye wubuwela wihina oliye owawogesa madhu yala, mwaha wa yeyo aliwa orumedha ndhe awonge Yesu ni ndhe dhawoga dholebela.
23 Oliye agaali oJeruzale Omathangani wa Paskwa, athu owinjhiva yoororomela ndina naaye mwaha wa matikiniho aweriyena.
24 Mbwenye Yesu kaaroromela ni murimaye watene, mwaha ahimala wanona aatene
25 ni kahowela wihina muthu avahe onamoona wodhela aliwa, mwaha oliye ahinona murima dhewa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “malituru 44 obe 66.”
^ Obe: “nyumba ya Mulugu.”
