Dhilebiwe ni Juwawu 3:1-36
3 Munikuruni mwa Afarizewu ahikalamo mulobwana dhaala ithaniwa Nikodemu, aali namaholela aaJudewu.
2 Oliye ahidhowa ogumana ni Yesu mahiyu ni omwaddela egihina: “Rabi, nihinona wi mudhile ninga namahudhiha a Mulugu, mwaha kawo muthu ananda wawerana matikiniho ninga ala munawerinyuna, ahikaviheriwaga ni Mulugu.”
3 Vano Yesu omwakula egihina: “Ginowuwaddela ebaribari: Muthu yole ahinabaliwe dila biili, kanande woona Omwene wa Mulugu.”
4 Nikodemu omwakula egihina: “Dhinandeya addi muthu obaliwa dila biili agamanle wuluvala? Gerege anere ohogolowela mbani mwaamaye abaliwe dila biili?”
5 Yesu omwakula egihina: “Ginowuwaddela ebaribari: Muthu ahibaliwa ni manjhe obe ni muzimu wotxena kanande ovolowa Mumweneni mwa Mulugu.
6 Ethu ebaliwe omwiilini somwiilini, ebaliwe omuzimuni somuzimuni.
7 Kutikine mwaha miyo owoga gegihina: Enohoweleya nyu obaliwa dila biili.
8 Nipevo nnoyela wengo winafuniwa ni nnowiweya oruma wewa, mbwenye kannanoneya winadheliwa newene winadhowiwa. Simodhave enereya nuule anabaliwa omuzimuni.”
9 Nikodemu omukoha egihina: “Dhithu ndho dhinandeya addi?”
10 Yesu omwakula egihina: “Nyu ninga anamahudhiha oWizarayeli, kamunonne dhithu ndha?
11 Ginowuwaddelani ebaribari: Nnawoga dhithu nnonnihu, ni nnavaha onamoona dhithu nonilihu, mbwenye nyu kamunarumedha onamoona nnavahihu.
12 Akala miyo gihuwaddelani dhithu dheelabo ela yavati mbwenye nyu kamurumedhe, kito munande addi orumedha guwaddelani dhithu dhodhulu?
13 Ohiya eyo kawo muthu ogwenle odhulu, omuhiya ole adhele odhulu, Mwaana Muthu.
14 Ndo ninga Moyizeji atomeyiliye nowa agaali mwiddeddereni, nimakalelo mamodhave Mwaana Muthu anere otomeyiwa
15 wihina muthu yole anaakanne nroromelo aakele egumi yohimala.
16 “Mwaha Mulugu ohudhivela vanlubale elabo, omuleva mwanaye mmodha, wi athu aatene enaamuroromele yahitolosiwe, mbwenye ekanne egumi yohimala.
17 Mulugu kamurumile mwanaye elabo ela yavati wihina atorihe mbwenye wihina athu evuluwe wodhela oliye.
18 Muthu yole anamuroromela kanaatorihiwe. Mbwenye ole ahinna nroromelo nuliye ohutorihiwa, mwaha karoromele ndina na Mwaana mmodha a Mulugu.
19 Mwebaribarene waara wahidha mwilaboni yavati, mbwenye athu odhivela yiihi ohiya waara mwaha mabasiwa yaali abureve. Bumwahaya eneere otorihiwa.
20 Ole aneerana dhithu dhabure anowidda waara ni kanaaddamela waara, wihina dhowera dhaye dhinaadhe dhoniwe.
21 Mbwenye ole aneerana dhithu dhapama onowaddamela waara, wihina mabasaaye yoneyege pamadhene mowiwanana ni efunelo ya Mulugu.”
22 Nuwindo Yesu ni anamaharaye odhowa sidadi yoJudeya okala wewule mudhidhi vang’ono naaliwa ni owabaddiza athu.
23 Mbwenye Juwawu aali oEnoni waddamela oSali aabaddizaga athu. Mwaha mburo yole yahikalavo manjhe owinjhiva ni athu yodhowa waaliye wihina ebaddiziwe;
24 mudhidhi yole Juwawu aali ahinafugeliwe mukambura.
25 Nuwindo anamahara a Juwawu wambela okangana ni Mujudewu dhaala wodhela muselu wotxenihiwa.
26 Vano aliwa odhowa omwaddela Juwawu yegihina: “Rabi, kasugwani, mulobwana ole aali ni nyu kobela yoJordawu, yole mmukalelinyu onamoona anna wabaddiza athu, teto aatene enathamagela wengo.”
27 Juwawu wawakula egihina: “Muthu kanaakele ethu-sithu ehinadhela odhulu.
28 Nyu muli anamoona a madhu gawogilimi gegihina: ‘Miyo kagili Kiristu mbwenye geere orumiwa osogolo waye.’
29 Anakanna muteliwi di namatelaya. Mbwenye mukwaye anamatela amwiwa aaddamelaga teto amwiwa awogaga onohagalala vanlubale. Bumwahaya ohagalala waaga ohakwanela.
30 Oliye podi odhowagave enjhedhedheyaga mbwenye miyo gineerege ovuguwave.”
31 Ole anadhela odhulu ohakwaranya athu aatene. Mbwenye ole ali eelabo yavati deelabo yela ni anawoga dhithu dhelabo yavati. Ole anadhela odhulu ohakwaranya athu aatene.
32 Oliye onovaha onamoona wa dhithu iwaliye ni ooniliye, mbwenye kaawo anarumedha onamoona waye.
33 Muthu yole anaakela onamoona waye onorumedha wi Mulugu deebaribari.
34 Ole arumiwe ni Mulugu anaawoga madhu a Mulugu, mwaha oliye aavahaga Muzimu waye wotxena kanapimelela.
35 Baabi onomudhivela Mwanaye ni ohunvahedhela dhithu dhatedhene mmadani mwaaye.
36 Yole anaamuroromele Mwaana Muthu aneere wakela egumi yohimala. Mbwenye muthu yole ahinamwiwelele Mwaana kanaakele egumi yohimala, mbwenye owali wa Mulugu onere okala nuliye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
