Dhilebiwe ni Juwawu 4:1-54
4 Vano Yesu nunona wihina Afarizewu yahiiwa wi oliye* owahudhiha ni owabaddiza athu owinjhiva omukwaranya Juwawu
2 (naarive athuya yahibaddiziwaga ni Yesu mbwenye ebaddiziwaga ni anamaharaye),
3 oliye ovenyawo oJudeya ohogolowela oGalileya.
4 Mbwenye yohoweleya wihina avire oSamariya.
5 Nuwindo, oliye ofiya sidadi yoSamariya yithaniwa Sikari, waddamela mundda wa Juze aavahiwiye naababe Jako.
6 Mburo yole Jako ahitibavo ntxela naaye. Yesu nuugoma mwaha wolenddo anniyena, okarati vatxelani vevale. Waali mudhidhi wa 12 wora.
7 Muhiyana dhaala akala oSamariya ofiya wihina aarugwe manjhe. Yesu omuloba egihina: “Ginaaloba manjhe oong’wa.”
8 (Anamaharaye yagele osidadi * wihina yagule dhoojha.)
9 Nuwindo muSamaritana ole omukoha Yesu egihina: “Nabwiya nyu ninga Mujudewu, munanda addi ogiloba manjhe wula miyo ngali muSamaritana?” (Mwaha aJudewu ni asamaritanu kayavahana.)
10 Yesu omwakula egihina: “Wahanone nvaho wa Mulugu ni wahamunone muthuya anuuloba egihina: ‘Ginaaloba manjhe oong’wa’, ni weya ogahimuloba vano oliye eere wuvaha manjhe eegumi.”
11 Muhiyana ole omukoha egihina: “Nabwiya nyu kamunna ethu yowarugwana manjhe teto ntxela nna niiddiha. Manjhe ayo eegumi mwadhilena waani?
12 Gerege nyu Nabwiya muli munlubale omukwaranya nikolo nehu Jako, aanivahile ntxela ang’wiyevo nanaye vamodha ni mambilaye?”
13 Yesu omwakula egihina: “Muthu yole anang’we manjhe ala anere okanna nthona dila biili.
14 Mbwenye muthu yole anang’we manjhe ayo ginaanvahimi kanadha akanna nthona, mbwenye aneere okala nedduddu anaakumege manjhe wihina envahe egumi yohimala.”
15 Vano muhiyana ole owoga egihina: “Nabwiya, givaheni manjhe ayo wihina gihikanne nthona ni ginahogolowele warugwa manjhe mburo yola.”
16 Yesu omwaddela egihina: “Kadhowa wamwithane mamuno mudhe vamodha.”
17 Muhiyana ole omwakula egihina: “Kagiteliwe.” Yesu owoga egihina: “Ohuwoga ebaribari wegi: ‘Kuteliwe.’
18 Mbwenye we wahiteliwa naalobwana atanu, teto mulobwana onniwena ovanene kahiyo awo. Bumwahaya, owogiliwe ebaribari.”
19 Muhiyana ole owoga egihina: “Nabwiya ginoona wi nyu muli namavuhulela.
20 Makolo ehu yamwebedha Mulugu mburo yola, mbwenye nyu munihina mburo womwebedha Mulugu fuJeruzale.”
21 Yesu omwaddela egihina: “Muhiyana we karumedha ginawogimi: Onere ofiya mudhidhi muhunadhinyu mwawebedha Ababa vamwangoni vala, newene oJeruzale.
22 “Nyu munamwebedhinyu kammunonne; mbwenye iyo nnamwebedha nimunonilihu, mwaha ovulusiwa winadhela wa maJudewu.
23 Mbwenye, onna waddamela mudhidhi teto mudhidhiya buyola, anamwebedha eebaribari enawebedhegiwa Ababa ni muzimu ni ebaribari. Mwebaribarene Ababa enaasayela athu yayo wihina emwebedhege.
24 “Mulugu muzimu, ale enamwebedha, emwebedhege ni muzimu vamodha ni ebaribari.”
25 Muhiyana ole owoga nuliye egihina: “Miyo gihinona wi Mesiya anithaniwa Kiristu aneere odha. Oliye afiya anere onaddela dhithu dhatedhene.”
26 Yesu omwaddela egihina: “Miyo ginawoga niwe gili oliyene.”
27 Mudhidhi yole, anamaharaye nufiya aliwa otikina, mwaha wonfwanya awogaga ni muhiyana. Mbwenye kavo amukohile egihina: “Onanfunana ddi?” obe: “Mwahaya bwaddi ogamuwogana?”
28 Nuwindo muhiyana ole ohiya muno waye wa manjhe vevale, oliye odhowa musidadi wawaddela athu egihina:
29 “Kabeni mwamoone mulobwana dhaala awogile dhithu dhatedhene gerilimina. Oleya kadha akala Kiristu?”
30 Aliwa omaruwa musidadi mune odhowa omoona.
31 Mudhidhi yole, anamaharaye wambela omuwadda yegihina: “Rabi, karajhihani ojha.”
32 Mbwenye oliye wawaddela egihina: “Miyo gihikanna yoojha mwahinonninyu.”
33 Nuwindo anamaharaye wambela owoga vikaleliwa yegihina: “Ohukala anvahile yojha?”
34 Yesu owoga naliwa egihina: “Yojha yaaga fuwerana efunelo ya ole agirumile ni wamariha mabasa aye.
35 Nyu kamunawoga wi dhihanle mweri minnayi wihina mudhidhi wohadda ofiye? Mvuruwane ginawogimi: Mwavenyihe mento enyu musugwe mundda, dhihimala wotowa wihina dhihaddiwe. Dhenda vala
36 namahadda anna wakela korowa* dhaye alabeliye ni anna wugela dhowima. Dhowimadha baale enaakele egumi yohimala, wihina namamidha bewu nnamahadda ehagalale vamodha.
37 Nimakalelo yaala, madhu ala enihina: Mmodha dinamamidha mmodhaya dinamahadda, beebaribari.
38 Miyo gihurumani wihina mwahadde ele mwahimidhilinyu. Amodha bilabile okunamo, mbwenye nyu dawakenle mareeliho a mabasa ewa.”
39 Asamaritanu owinjhiva a sidadi yele yahimuroromela Yesu mwaha wa onamoona avanhe muhiyana ole egihina: “Oliye ohuwoga dhithu dhatedhene gerilimina.”
40 Asamaritanu nunfwanya Yesu, omuloba wihina akale naaliwa, oliye okala naaliwa malabo menli.
41 Nuwindo athu owinjhiva okanna nroromelo mwaha wa dhithu awogiye,
42 ni omwaddela muhiyana ole yegihina: “Iyo kanrumedhile mwaha wa madhu wawogiliwe baahi, mbwenye iyo nannya nihiwa teto nihinona wihina mwebaribarene mulobwana ola dinamavulusa eelabo.”
43 Nuuvira malabo ale menli, oliye odhowaga oGalileya.
44 Mwinnyene Yesu owoga egihina: Namavuhulela kanathithimihiwa elabwaaye.
45 Vano Yesu nufiya oGalileya, aliwa omwakela pamadhene, mwaha yahoona dhithu dhatedhene eriliyena vamathangani,* oJeruzale, mwaha naaliwaya yahidhowawo.
46 Nuwindo oliye ohogolowela oKanaa murudda woGalileya, wengo wasaddunliye manjhe okala vinyu. Murudda yole ahikalawo mudhaari a mwene, anna mwanaye abulela oKafarnawu.
47 Mulobwana ole nunona wihina Yesu ohukuma oJudeya vano ali murudda yole woGalileya, odhowa omuloba wihina anvulumuse mwanaye, mwaha ahanle neena nuukwa.
48 Mbwenye Yesu omwaddela egihina: Nyu mwahoona dhintelelo ni matikiniho, kamunadha murumedha.”
49 Mudhaari ole amwene owoga egihina: “Nabwiya kaaguvani mwanaga ahinakwe.”
50 Yesu omwaddela egihina: “Kadhowaga, mwanawo ohuvulumuwa.” Mulobwana ole warumedha madhu awogile Yesu, oliye odhowaga.
51 Adhowaga mudila wagumanana adharaaye edhaga omwaddela wihina mwanaye ahivulumuwa.
52 Nuwindo oliye wakoha mudhidhi avulumuwiye. Aliwa omwakula yegihina: “Nipanddawena* nimanle ndilo mawora a 13.”
53 Ababe woonelamo wihina waali mudhidhi yole Yesu awogiliye egihina: “Mwanawo ohuvulumuwa.” Vano oliye ni athu aatene avade vaye omuroromelaga Yesu.
54 Ela yaali dila yanabili Yesu aweriliyena matikiniho nuhogolowela oJudeya murudda woGalileya.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “nabwiya.”
^ Obe: “oluwani.”
^ Obe: “oyitavaye.”
^ podi wera yaali mathanga apaskwa.
^ Obe: “febiriya.”
