Dhilebiwe ni Juwawu 5:1-47
5 Nuwindo okalawo mathanga amaJudewu, vano Yesu odhowa oJeruzale.
2 Ojeruzale waddamela Musiwo wa Mambila, vihikala nthiya naapeliwe ni makodde matanu, ni Ebarayiku nnithaniwa Betizata.
3 Mukoddemwa mookinanti muthithi ni muthithi waathu yaali aredda, aliba ohoona, ookwethenkwa * vamodha ni athu oragala.
4 —
5 Mburo yole ahikalavo mulobwana dhaala amanle yaka 38 abulelaga.
6 Yesu numoona mulobwana ole agaali okinanteene teto nunona wihina ahimala yaka dhowinjhivadhene abulelaga, omukoha egihina: “Onofuna ovulumuwa?”
7 Muredda ole omwakula egihina: “Nabwiyani kaginna muthu ogikavihera wihina agibwinihe vanthiyani vala manjheya yatekumaga; gafunaga okitelavo muthu mmodhene dinathamagela osogolo waaga okitelavo.”
8 Yesu omwaddela egihina: “Kavenya! Kathukula olilawo * odhowege.”
9 Mohulegela mulobwana ole ovulumuwa, othukula olilaye oliye odhowaga.
Labo nne vaaligi Sabadu.
10 Mwaha wa yeyo maJudewu wambela owoga ni mulobwana ole yegihina: “Peeno Sabadu, kinenyeya muthu othukula olili.”
11 Mbwenye oliye wawakula egihina: “Mulobwana agivulumuse diwogile egi: ‘Othukule olilawo odhowege.’”
12 Aliwa omukoha yegihina: “Mulobwana yoyo uwaaddenle egihina: ‘Othukule olilawo odhowege’, baani?”
13 Mbwenye mulobwana ole kamunonne muthu anvulumusile, mwaha Yesu ahimala witaganyihedha ni muthithi yole waathu waali vevale.
14 Numala, Yesu onfwanya mutempulu ni omwaddela egihina: “Kasugwa, vano ohumala ovulumuwa. Kutheege dila biili wihina enuupadduwele ethu yowoopiha.”
15 Mulobwana ole nudhowa wawaddela maJudewu wihina di Yesu anvulumusile.
16 Mwaha wa yeyo maJudewu obajha omuharahara Yesu mwaha erana dhithu ndha labo na sabadu.
17 Nuwindo oliye wawaddela egihina: “Ababa enna olaba nivanove, nimiyowa ginna olaba.”
18 Bumwahaya maJudewu yowasayela makalelo wihina empe, kawali mwaha woomulupa Sabaduve baahi, mbwenye oomwithana Mulugu ninga Baabe, iliganihaga ni Mulugu.
19 Mwaha wa yeyo Yesu wawaakula egihina: “Mwebaribarene ginowuwaddelani: Kavo ethu anerana Mwaana, anakumihiye mmuruni mwaaye, mbwenye anerana ele anawoniye aBabe yeragana. Dhithu anerana Baabi, Mwaana anerana dhimodhave.
20 Mbwenye Baabi onomudhivela Mwanaye ni onomoniha dhithu dhatedhene Oliye aneriyena, teto anere omoonihave mabasa manlubale wapitha ala, wihina nyu mwaatikine.
21 Ndo ninga Baabi anaavenyihiye athu ekwile ni aavaha egumi, nimakalelo mamodhave Mwaana ananvaha egumi yole ananfuniyena.
22 Mwaha Baabi kanamutoriha muthu, mbwenye otoriha watewene amuthikenle Mwanaye,
23 wihina athu aatene emuthithimihege Mwaana ninga enamuthithimihiwa Baabe. Ahinamuthithimiha Mwaana kanamuthithimiha Baabe, ole amurumile.
24 Ginowuwaddelani ebaribari gegihina: “Anawiwa madhu aaga ni anamuroromela ole agirumile anere ofwanya egumi yohimala ni kanaatorihiwe, mbwenye ohulupa okwa ofwanya egumi yohimala.
25 “Ginowuwaddelani ebaribari gegihina: Winere ofiya mudhidhi, teto mudhidhiya buyola, anookwa enavuruwaniwa ndhu na Mwaana a Mulugu, ale enavuruwane eneere okalawo.
26 Mowindala ninga Baabi ali nedduddu eegumi, oheriha wihina Mwanaye akale nedduddu eegumi.
27 Oliye ohunvaha owedha wotoriha, mwaha wokala Mwaana Muthu.
28 Kamutikine dhithu ndha, mwaha onere ofiya mudhidhi aatene yaale eli mmahame owubuweliwa enadhiwa yiiwe ndhu naaye
29 yindo ekumemo: ale yerilena dhithu dhapama, evenyihiwe wihina yaakele egumi; ale yerilena dhithu dhabure, evenyihiwe wihina etorihiwe.
30 Kaginerana dhithu dhammuruni mwaaga. Ninga giniwimi, miyo ginatoriha ndo, teto otoriha waaga fowogowa, mwaha kaginaveda werana efunelo yaaga, mbwenye efunelo yole agirumile.
31 “Akala miyo giniivaha onamoona meeka, onamoona waga kahiyo webaribari.
32 Ohukalawo muthu mmodha anavaha onamoona waaga teto miyo gihinona wihina onamoona onavahiye wodhela miyo bwebaribari.
33 Nyu muharuma athu wa Juwawu, oliye ovaha onamoona webaribari wodhela miyo.
34 Mowindala kaginarumedha onamoona wa muthu mbwenye ginawoga dhithu ndha wihina nvulusiwe.
35 Mulobwana ole ali lampada nohidda ni nowaara teto mudhidhi vang’ono nyu orumedha ohagalala ni waara waye.
36 Mbwenye miyo gihikanna onamoona winlubale omukwaranya Juwawu, mwaha mabasa egivahile aBaba wihina gaapare, biyayo ginaparimi ni enavaha onamoona wihina bi aBaba egirumile.
37 Teto aBaba egirumile enovaha onamoona waaga. Nyu kamuniiwege ndhu newa newene kamunonege ekalelo yewa,
38 bumwahaya madhu ewa kili ni nyu, mwaha nyu kamunamurumedha ole emurumiliwa.
39 “Nyu munosanyiha dholebela mwaha munubuwela wihina sidhendho dhinuvaheni egumi yohimala teto si dholebela dhendha dhinavaha onamoona waaga.
40 Ohiya eyo, nyu kamunafuna odha wa miyo wihina mukanne egumi yohimala.
41 Kaginarumedha nthithimiho naathu,
42 miyo gihinona pamadhene wihina mmurimani mweenyu kamunamudhivela Mulugu.
43 Miyo gihidha ni ndina na aBaba nyu kamugakenle. Mbwenye muthu mmodha ahaadhe ni ndina naye mweere omwaakela.
44 Munande addi orumedha, wula mwakelaga nthithimiho naathu amodha mbwenye kamunasayela nthithimiho nnadhela wa Mulugu mmodha?
45 Kamubuwele wihina miyo ginere wuwinkedhani vamentoni va aBaba; mbwenye akala muthu anuwinkedhani: Moyizeji muthu munamuroromelinyu.
46 Mwebaribarene mwahere mmurumedha Moyizeji, ni miyowa mweere ogirumedha mwaha oliye ohuleba wodhela miyo.
47 Akala nyu kamunarumedha dhithu alembiye, munande addi orumedha dhithu ginawogimi?”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “ogaddibwa.”
^ Obe: “obonddawo.”
