Dhilebiwe ni Juwawu 6:1-71
6 Nukuma wewule, Yesu wabuwela kobela emodha ya niya yoGalileya, obe yo Tiberiyadi.
2 Vano muthithi waathu womuhara ni womusugwa aweragana matikiniho ni aavulumusaga aredda.
3 Nuwindo, Yesu ogwela vamwangoni oliye okarati venvo ni anamaharaye.
4 Era waddamela paskwa, mathanga amajudewu.
5 Yesu nuwavenyiha mento woona muthithi waathu omwaddamelaga, omukoha Filipi egihina: “Nnagule wuvi pawu wihina muthithi ola waathu ojhe?”
6 Mbwenye aawooga madhu ala wihina awehe, mwaha ahinona ethu afuniye wera.
7 Filipi omwakula egihina: “Pawu dha 200 denariyu kadhinaakwana naarive kadda muthu atakunaga vang’ono.”
8 Namaharaye mmodha ithaniwa Andere, ddibile Simawu Peduru, omukoha egihina:
9 “Vala ukalavo muzombwe anna pawu tanu dha Sevada ni mwana oba biili. Dhendha baahi dhinere wawakwana athu yaala aatene?”
10 Yesu owoga egihina: “Kawaddeleni athu aatene wihina ekarati.” Mburo yoole vahikala maani owinjhiva; athu owakwana 5000 okarati vevale.
11 Yesu othukula pawu olobela, numala wagawela athu aatene yakaratile vevale; werana emodhave ni mwana oba, aliwa ojha ninga mwafuneliwa.
12 Vano, aliwa numala orubala oliye wawaddela anamaharaye egihina: “Muddoddele dhatedhene dhihanle wihina dhinanongeye.”
13 Nuwindo aliwa oddoddela ndhe dhahanle ni yaselele athu ale yatakunne pawu tanu dha sevada, odhaliha muddanga 12.
14 Vano muthithi ole waathu nuwawoona matikiniho aweriliyena, wambela owoga yegihina: “Mwebaribareene ola di namavuhulela ajhehiwa odha mwilaboni.”
15 Mbwenye, Yesu nunona wihina yafuna emwihidde wi emuhabihe omwene, ovenyavo dila biili odhowa omwangoni okalawo yeka.
16 Vati nuuriba, anamaharaye okitela muniya,
17 ogwela mmwanddeyani, wabuwa niya odhowaga oKafarnawu. Vati nuuriba Yesu aali ahinaafwanye.
18 Vano niya wambela otekuma, mwaha nahikumelela nipevo nakopolo.
19 Mbwenye aliwa nuutxapa makilometuru 5 obe 6, aliwa omoona Yesu eeddaga vadhulu vaniya aaddamelaga mwanddeya waagwenliwa, vano aliwa wambela woova.
20 Mbwenye oliye wawaddela egihina: “Dimiyo, kamoove!”
21 Nuwindo aliwa omwaakela mmwanddeyani mwewa, vohilegela mwanddeyaya ofiya okobela yadhowiwawo.
22 Labo noharela, muthithi waathu wahanle kobela emodha ya niya wonelamo wihina mburo yole wahanlevo bumwanddeya mung’ono, teto Yesu kagwenle mwanddeya vamodha ni anamaharaye, mbwenye aliwa yadhowile yekiwa.
23 Nuwindo mwanddeya dho Tiberiyadi ofiya waddamela mburo yajhiliwavo pawu nabwiya alobeleliye.
24 Vano, muthithi yole waathu nuwona wihina Yesu ni anamaharaye kayali mburo yole, ogwela mwanddeya dhewa odhowa oKafarnawu wihina yamusayele Yesu.
25 Nunfwanya Yesu agaali kobela emodha ya niya, aliwa omukoha yegihina: “Rabi, nfiyile wuno alini?”
26 Yesu wawakula egihina: “Ginowuwaddelani ebaribari nyu kamunagivedela mwaha matikiniho mwawonilinyu, mbwenye mwaha wa pawu mutakunninyu murubala.
27 Mulabege, mbwenye kamulabelege yojha enuudda, mbwenye yojha enakalawo malabo amatene, anuvaheni Mwaana Muthu; mwaha ola diyole mwinnyene Mulugu, Ababa, enonihiwa * wihina enomurumedha.”
28 Nuwindo aliwa omukoha yegihina: “Nere ddi negi napare mabasa a Mulugu?”
29 Yesu wawakula egihina: “Ala bimabasa a Mulugu: mmuroromele Mulugu yole agirumile.”
30 Aliwa omukoha yegihina: “Nabwiya yintelelo baani munafuninyu werana wihina iyo noone ni nurumedheni? Ki mabasa baani munafuninyu wapara?
31 Makolo ehu ehimujha mana mwiddeddereni ninga dholebela dhinawogiwa: ‘Mulugu wavaha pawu yodhulu wihina ejhe.’”
32 Vano Yesu wawaddela egihina: “Ginowuwaddelani ebaribari: Moyizeji kaavahile pawu yodhulu, mbwenye Ababa enowuvahani pawu yeebaribari enadhela odhulu.
33 Mwaha pawu ya Mulugu siyele enadhela odhulu ni enaavaha egumi athu amwilaboni.”
34 Aliwa omuloba yegihina: “Nabwiya, munivahegeve pawu eyene.”
35 Yesu wawaddela egihina: “Miyo gili pawu yegumi. Muthu yole anadha wa miyo kanadha akanna dala, teto yole anaagiroromele kanadha akanna nthona.
36 Mbwenye ninga giwogilimi, nyu muhugoona, naarive dhigaali ndo kamunagirumedha.
37 Aatene Ababa enagivahiwa enere odha wa miyo, teto miyo kaginadha gaakodda ale enadha wa miyo;
38 mwaha miyo gidhele odhulu, kagidhele werana efunelo yaga, mbwenye efunelo yole agirumile.
39 Efunelo yole agirumile siila: wihina gahimuyelele newene mmodha waathu yaale agivahiliye, mbwenye wihina gaavenyihe nlabo nookuthula.
40 Ela sifunelo ya Ababa: wihina yole amunonne Mwaana ni anamuroromela akanne egumi yohimala, vano labo nookuthula miyo ginvenyihe muukwani.”
41 Nuwindo maJudewu wambela omuwoga obure mwaha wa madhu awogiliye egihina: “Miyo gili pawu enadhela odhulu.”
42 Aliwa wambela owoga vikaleliwa yegihina: “Ola kahiyo Yesu, mwaana a Juze? Ababeya ni amayeya kananonne? Vano mwahaya bwaddi agawoga egihina: ‘Miyo gidhele odhulu’?”
43 Yesu wawakula egihina: “Kamunong’onege vikalelinyu.
44 Kavo anadha wa miyo, Ababa egirumile ehimwithanile, teto miyo ginere onvenyiha labo nookuthula.
45 Ehilebiwa mulivuruni mwanamavuhulela yegihina: ‘Aatene enere ohudhihiwa ni Yehova.’ Muthu yole anaavuruwana Ababa ni anahudhera naliwa onoodha wa miyo.
46 Kaawo muthu anawoonaga Ababa ahili yole anadha wa Mulugu. Oyo onowawoonaga Ababa.
47 Ginowuwaddelani ebaribari: Yole anaagiroromele, anere wakela egumi yohimala.
48 “Miyo gili pawu yegumi.
49 Makolo enyu ehimujha mana mwiddeddereni, naarive dhigaali ndo aliwa ehikwa.
50 Ela sipawu enadhela odhulu, wihina muthu yole anaatakune ahikwe.
51 Miyo gili pawu yegumi enadhela odhulu. Anaatakune pawu ela anerege okalawove malabo amatene; teto pawu eyo ginafunimi ovaha bu mwiili waaga mwaha dhigumi dhaathu.”
52 Vano Majudewu wambela okangana vikaleliwa yegihina: “Mulobwana ola anaande addi onivaha mwiili waye wihina ntakune?”
53 Nuwindo, Yesu wawaddela egihina: “Ginowuwaddelani ebaribari: Mwahitakuna mwiili wa Mwaana Muthu ni mwahing’wa nikame naaye kamunakanne egumi.
54 Anatakuna mwiili waaga ni anang’wa nikame naaga ohukanna egumi yohimala, teto miyo ginere onvenyiha muukwani, labo nookuthula,
55 mwaha mwiili waaga yojha yeebaribari, teto nikame naaga yoong’wa yeebaribari.
56 Anatakuna mwiili waaga ni anang’wa nikame naaga anere okala mwimodhani ni miyo, vano miyo mwimodhani nuliye.
57 Mowindala ninga Ababa, enakalawo egirumiliwa miyo ginakalawo mwaha wa Ababa, nimakalelo mamodhave ole anatakuna mwiili waaga anere okalawo mwaha wa miyo.
58 Ela si pawu enadhela odhulu. Kahi ninga pawu etakune makolwinyu naarive dhigaali ndo ekwa. Anatakuna pawu yeela anere okalawo nimukalakala.”
59 Oliye awoogile madhu ala ahudhihaga musinagoga yo Kafarnawu.
60 Nuwawiwa madhu ala, anamaharaye owinjhiva wambela owoga yegihina: “Madhu ala boopiha mbani. Baani anaande wavuruwana madhu ninga yaala?”
61 Mbwenye, Yesu nuunona wihina anamaharaye yera onong’ona mwaha wa muselu yoole, oliye wakoha egihina: “Madhu ala enowukwakwathusani?
62 Mweere ddi mwahamoone Mwaana Muthu ahogolowelaga waliye kale?
63 Muzimu bunavaha egumi, mbwenye mwiili kunna mabasa. Madhu guwaaddelimini boomuzimuni ni enovaha egumi.
64 Mbwenye vikalelinyu ehikalavo amodha ehinna nroromelo.” Mwaha obajha kale Yesu ahanona athu yahanna nroromelo ni muthu aamugulihe.
65 Oliye wenjhedhedhave egihina: “Bumwahaya gidhe guwaaddelegeni gegi: Kaawo muthu anadha wa miyo ahiithaniwe ni aBaba.”
66 Mwaha wa yeyo, anamaharaye owinjhiva ohogolowela dhithu dhamundduli vano kuheddaga nuliye.
67 Nuwindo, Yesu wakoha anamaharaye kumi nabiili egihina: “Ni nyunwa munafuna muhogolowele mundduli?”.
68 Vano Simawu Peduru omwaakula egihina: “Nabwiya, nnadhowe wuuvi? Nyu dinna muthenga dha egumi yohimala.
69 Iyo nnororomela teto nihinona wihina nyu nabwiya muli Oweela a Mulugu.”
70 Yesu wawakula egihina: “Kahiyo miyo usakunleni nyu kumi nabiili? Mbwenye, mmodha wa nyu muliba woota.”
71 Mwebaribareene oliye amwagana Judasi, mwaana Simawu Iskariyoti, mwaha mulobwana ola eere omuguliha naarive agari mmodha wa anamaharaye ale kumi nabiili.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Lit: “envahiliwa selu.”
