Dhilebiwe ni Juwawu 7:1-52
7 Numala Yesu ohogolowela olenddo waye adhowiye oGalileya, mwaha kaafuna odhowa oJudeya, woona wihina maJudewu yomusayela wihina empe.
2 Mbwenye, yera waddamela mathanga a ddammwa amaJudewu,
3 vano addibile omwaddela Yesu yegihina: “Ovenyewo mburo yola odhowe oJudeya wihina anamaharawo yawone mabasa onaapariwe.
4 Mwaha kaawo muthu anerana dhithu moviteya wula asayelaga ononiwa naathu aatene. Akala we onowerana dhithu ndha, kuvitege.”
5 Mwebaribarene, addibile kiyamuroromela.
6 Nuwindo, Yesu wawaddela anamaharaye egihina: “Mudhidhi waaga kunafiye, mbwenye akala nyu mudhidhi waatene, bwapamave.
7 Athu amwilaboni enuwiddelani ebewene, mbwenye enagiidda miyo mwaha ginovaha onamoona gegi, mabasa ewa babure.
8 Nyu podi odhowa omathangani, mbwenye miyo kaginayawo mwaha mudhidhi waaga kunaakwanele.”
9 Vano, numala wawaddela dhithu ndha, oliye okalave oGalileya.
10 Mbwenye, addibile nudhowa omathangani wule, nuliyeya wahara, mbwenye moviteya.
11 Bumwahaya, maJudewu yomusayela vamathangani vale yegihina: “Mulobwana ole duuvi?’’
12 Vaari va muthithi yole waathu, amodha yonong’ona mwaha woliye. Amodha yowoga yegihina: “Mulobwana ole dapama.” Mbwenye amodha yawoga yegihina: “Naari, kahiyo. Ole onowaleketha athu.”
13 Ebaribariya sowi, kaavo aanda owoga ndina naaye vaari vaathu, mwaha wawoova maJudewu.
14 Vano mathanga egaali vaari, Yesu ovolowa mutempulu ni wambela ohudhiha.
15 Majudewu otikina ni wambela owoga yegihina: “Mulobwana ola anonile addi dholebela ni makalelo yala, wula ahidhowile muskola?”
16 “Vano Yesu wawakula egihina: “Ndhe ginahudhihimi kadhinadha wa miyo, mbwenye dhinadhela wa ole ogirumile.
17 Muthu afuna werana efunelo yaye, anere onona akala dhithu ginahudhihimi dhinadha wa Mulugu, obe dhinadhela wa miyo.
18 Anawoga mubuwelo waye anasayela nthithimiho naaye, mbwenye ole anasayela nthithimiho na ole agirumile deebaribari ni kanafwanyeyana obure.
19 Moyizeji ohuuvahani Nlamulo, kuvahileni? Mbwenye vikalelinyu kaavo aniwelela Nlamulona. Mwahaya bwaddi mugasayela ogipa?
20 Muthithi ole waathu omwakula wegihina: “We ohukanna demoniyu. Omwiwale aani eraga nnafuna nuupe?”
21 Yesu wawakula egihina: “Gerilena ntikiniho nimodha baahi, nyu aatene otikina.
22 Vano karajhihani wubuwela: “Moyizeji ohuuvahani nlamulo nowineliwa, * (kahi wera nlamulo nna nadhela wa Moyizeji, mbwenye nadheele wa makolo eenyu) teto nyu munamwinela muthu labo na Sabadu.
23 Kito akala muthu onowineliwa labo na Sabadu wihina ahilupe Nlamulo na Moyizeji, mwahaya bwaddi mudhe muginyanyuwelege mwaha miyo onvulumusa muthu labo na Sabadu?
24 Kammutorihege muthu ni mento baahi, mbwenye mutorihege mowogowa.”
25 Nuwindo athu amodha ooJeruzale wambela okoha yegihina: “Mulobwana ole munamusayelinyu wihina mumpe kahi yola?
26 Teto peeno anawoga vathaddovene, newene aliwa kinawoga ethu. Nerege anamaholela ehu enamoona ninga di Kiristu?
27 Mbwenye iyo nihinonawo mulobwana ola winadheliye; wula Kiristu adha, kaavo anaanone winaadheliye.”
28 Vano Yesu ahudhihaga mutempulu, owoga ni ndhu nootama egihina: “Nyu muhuginona ni muhunona gidhelimiwo. Teto miyo kagidhile ni efunelo yaaga, mwaha ole agirumile deebaribari, mbwenye nyu kammunonne.
29 Miyo gihimunona, mwaha gidhile ni ndina naaye teto oliye digirumile.”
30 Bumwahaya aliwa yomusayela wihina emmage, mbwenye kaavo andile omwihidda, mwaha mudhidhi waye waali wahinafiye.
31 Nuwindo, athu owinjhiva a muthithi yole wambela omuroromela ni yowoga yegihina: “Kiristu adha, nerege aneere wawerana matikiniho wakwaranya ninga yaala awenrena mulobwana ola?”
32 Afarizewu wiwa muthithi ole waathu onong’onaga wodhela oliye, vano anddimuwa aanamakutha ni Afarizewu waaruma anamasugwera * wihina yammage.
33 Vano Yesu owoga egihina: “Ginere okala vamodha ni nyu mudhidhi vang’ono, gihinadhowe wa Ole agirumile.
34 Nyu munere ogisayela, mbwenye kamunaagifwanye teto mburo ginayimiwo, nyu kamunande ogihara.”
35 Nuwindo, maJudewu wambela owoga vikaleliwa yegihina: “Mulobwana ola anafuna adhowe wuvi, iyo nahinandihu ofiyawo? Oliye anafuna adhowe waJudeu obe adhowe aahudhihege aGerego?
36 Oliye afuna awoge ddi ni madhu ala owihina: ‘Nyu munere ogisayela, mbwenye kamunaagifwanye teto mburo ginayimiwo, nyu kamunande ogihara’?”
37 Labo nogomihedha na mathanga, Yesu ovenya owoga ni ndhu nootama egihina: “Yole anna nthona podi odha wa miyo, wihina ang’we.
38 Muthu yole anaagiroromele, ninga dholebela dhinawogiwa, ‘vati vamurima vaye vinere okuma anedduddu a manjhe eegumi.’”
39 Yesu aawogaga madhu yaale, oliye awoga wodhela muzimu, yakele athu yaale yaamuroromele, mwaha ofiyedha mudhidhi yole waali wahinakalewo muzimu, woona wihina Yesu aali ahinakele nthithimiho.
40 Athu amodha a muthithi yole yawiwale madhu ala, wambela owoga yegihina: “Mwebaribarene ola namavuhulela.”
41 Athu amodha yawoga yegihina: “Ola di Kiristu.” Mbwenye amodha yawoga yegi: “Nerege Kiristu anadha oGalileya?
42 Dholebela kadhinawoga dhegihina, Kiristu aadhele nnihimo na Davidi ni oBele murudda wakalesa Davidi?”
43 Nuwindo, athu wambela ogaweya mwaha waye.
44 Athu amodha yafuna emmage, mbwenye kaavo andile werana ndo.
45 Anamasugwera ale, ohogolowela wa anddimuwa aanamakutha ni wafarizewu, vano aliwa wakoha yegihina: “Mwahaya bwaddi mudhe mwahimudhegena wuno?”
46 Anamasugwera ale wakula yegihina: “Iyo kannamonege muthu anawoga ndale!”
47 Nuwindo, Afarizewu wakoha yegihina: “Ni nyunwa muhumala olekethiwa?
48 Nerege akala namaholela ehu obe aafarizewu amuroromele?
49 Mbwenye muthithi ola ohunonne Nlamulo, athu owulumeliwa.”
50 Mbwenye Nikodemu aadhowile ogumana ni Yesu kale, ni aali nfarizewu mmodha, wawaddela egihina:
51 “Nerege Nlamulo nehu, nnomutoriha muthu nihirajhihile onvuruwana obe nnona dhithu aneriyena?”
52 Aliwa omwakula yegihina: “Nerege ni weya oli muGalilewu? Kasanyiha ni onere woona wihina kaawo namavuhulela anaadhele oGalileya.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe. “nogwaddiwa nthuba.”
^ Obe: “agwarda.”
