Karta naalebeliwe akudda Kolosense 1:1-29
1 Miyo Pawulo, murumiwi a Kiristu Yesu wodhela efunelo ya Mulugu gili vamodha ni Timotiyu ddibilihu,
2 ginowalebela oweela ni addibila oororomeleya eli mwimodhani ni Kiristu enakala oKoloso wihina:
Opama wohinifwanelela ni murenddele onadha wa Mulugu baabihu, okale ni nyu.
3 Malabo aamatene nulobelelagani, iyo nnomutamalela Mulugu Baabi a Nabwiya ehu Yesu Kiristu,
4 teto nihiwa wodhela nroromelo munninyuna ni Kiristu Yesu ni odhivela munninyuna ni oweela aateene
5 mwaha munna wajheeha mareeliho mukoyeliwinyu odhulu. Nyu muuhudhera wodhela mareeliho ayo nuumala wiwa muthenga dhapama,
6 mulaleyiwinyu. Ndala ninga muthenga dhapama dhinavahiiwa dhowiima ni dhinenjhedhedheyiwa wapela elabo yaatene, simodhave enereya ni nyu, okuma labo noobajha mwiwalinyu ni munonilinyu pamadhene opama wohinifwanelela ni ebaribari ya Mulugu.
7 Siyeyo muhudherinyu ni Epafara mudhaari mukwihu nnamudhivelihu ni ali murumiwi oororomeleya a Kiristu analaba vamburoni veehu.
8 Teto oliye ohunaddela wodhela odhivela munninyuna epaddi yomuzimuni.
9 Bumwahaya, obajha nlabo niwalihu wodhela odhivela weenyu, kanselele wulobelelani, nlobaga wihina mukanne enonelo yowakwana ya efunelo yaye, teto wihina mukanne thotho ni monelegemo dhithu dhomuzimuni,
10 nnowulobelelani wihina mweeddege mowiwanana ni efunelo ya Yehova, wihina muhagalase murima waye, nvahaga dhowima mmabasani mwatemwene apama, ni munnuwihaga enonelo yenyu yeebaribari wodhela Mulugu.
11 Ohiya eyo, nnowulobelelani wihina mulibihiwe ni kopolo dhatedhene mowiwanana ni kopolo dhaye dhowaara, wi mudidele ojheeha nuuvilela vamodha nuuhagalala,
12 wula mmutamaalelaga Baabi uweenyileni wihina mwawakele mareeliho enafuna wawakela oweela eli mowaarani.
13 Oliye ohunobola muwari mwa onamathonga wa yiihi, onidhowana mumweneni wa Mwanaye anamudhiveliye,
14 wodhela mwanaye oyo, nihoboliwa ni nihileveleliwa dhoothega dhehu.
15 Oliye nladdaniho na Mulugu oohoneya ni doobajha wa dhopaddusiwa dhatedhene;
16 mwaha wodhela oliye, dhihipaddusiwa dhithu dhatedhene odhulu ni dha velaboni yavati, dhithu dhowoneya ni dhohoneya, anamathonga, ale enna owedha, mamwene ni aatene enna kopolo dhothonga. Dhithu dhatedhene dhipaddusiwe wodhela oliye ni mwaha waaye.
17 Dhithu dhatedhene dhihinakalewo oliye ahikalawo teto dhatedhene dhipaddusiwe wodhela oliye.
18 Oliye musolo wa mulogo oli mwiili waye. Oliye doobajha opaddusiwa dhithu dhatedhene dhihinakalewo, oliye doobajha ovenyihiwa vaari vaanookwa wihina akale oobajha mwa dhithu dhatedhene;
19 mwaha efunelo ya Mulugu sowihina dhikalelo dhaye dhatedhene dhooneyege ni Kiristu
20 teto wodhela oliye, dhithu dhatedhene dhoodhulu ni dha veelaboni yavati dhihogolowele wandana ni Mulugu ni adhaagana murenddele wodhela nikame naaye nikuthuliwe vantxikwani na goyi.
21 Mwebaribarene, kale nyu mwaali wolapela ni Mulugu teto mwaali amwiddani aye mwaha mubuwela dhithu dhabure,
22 vano oliye ohuhogolowela wandana ni nyu wodheela mwiili wa ole iipelekile wihina apiwe, wi mwande okala oweela vamentoni vaye muhunna nihonya newene muhinkedhiwaga ethu
23 hee, mwadidelave okala munroromeloni, mwatibeeleya pamadhene valisersini ni mwakala txithi muuholosiwe ejhehedhelo ya muthenga dhapama mwiwalinyu ni dhilaleyiwe mwa dhopaddusiwa dhatedhene dha veelaboni yavati. Miyo Pawulo gihithomiwa wihina gilaleye muthenga ndho dhapama.
24 Vano miyo ginohagalala naarive goonaga goyi mwaha weenyu. Ginoona wihina ginohowela wonagave goyi ninga yaano ya mwiili wa Kiristu. Goyi ela eneere okavihera mulogo, oli mwiili wa Kiristu.
25 Gihikala murumiwi a mulogo ola mowiwanana ni mutholo givahiwimi ni Mulugu wihina gaalaleye madhu Aye ni murimaga waateene woona wi eyo eneere wukaviherani,
26 madhu ayo, siyoviteya yootaleleya yaakoyiwe okuma kale ni mudhidhi wa malogo akale. Mbwenye peeno enna waddeliwa oweela Aye,
27 Mulugu ahikanna efunelo yowanoniha oweela vaari vamalogo, dhoorela dhothithimiheya dha yoviteya yootaleleya. Yoviteya yotaleleya eyo, fuwandana weenyu ni Kiristu ni ejhehedhelo yokosa epaddi ya nthithimiho naaye.
28 Duliyene nnamulaleyihu nawaddelaga ni naahudhihaga athu aatene ni enonelo yaatene wihina naapeleke aateene ninga athu owithwelavo epaddi yomuzimuni mowiwanana ni Kiristu.
29 Bumwahaya ginoolaba nuuviheya giilibihedhaga ni kopolo dhaye anagivahiye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
