Karta naalebeliwe akudda Kolosense 2:1-23
2 Mowindala, ginafuna munone wihina ginna owana koddo enlubale mwaha weenyu, mwaha waakudda Lawudisense ni mwaha wa ale aatene ehinagumanege ni miyo kove ni kove.*
2 Ethu ginafunimi sowihina murima weewa otodoliwe teto wihina ekale owiwanana ni odhivela wi yaakele dhoorela dhatedhene dhinadha mwaha ebaribari yowakwana enniwana, ofiyedha okanna enonelo yowakwanela ya yoviteya yotaleleya ya Mulugu obe nere Kiristu.
3 Wodhela oliye nnowanda woona thotho ni enonelo yaatene ya Mulugu.
4 Ginawoga ndo wihina ahikalewo muthu anuholoseni ni madhu ooleketha.
5 Naarive miyo gihili wengo vamodha ni nyu epaddi yoomwilini gili ni nyu epaddi yoomuzimuni, gihagalalaga woona makalelo enyu apama owegeredha dhithudha ni nroromelo nooliba munninyuna ni Kiristu.
6 Mowindala ninga mmurumedhinyu Kiristu Yesu Nabwiya ehu, mweddegeve mwimodhani nuliye,
7 ndala ninga muhudhihiwinyu munohowela othibeeleya ni olibihiwa ni Yesu, teto mukale ooliba munroromeloni mmutamalelaga Mulugu malabo aamatene.
8 Pole-pole okala adhaari athu enafuna wulekethani ni thotho dhewa ni mubuwelo wohukanna mabasa, onadha ni dhilemelelo dhaathu enahara dhithu dhamwilaboni ohiya dha Kiristu;
9 mwaha duliye ananda otajhiha dhikalelo dhatedhene dha Mulugu.
10 Teto wodhela oliye muhukanna dhithu dhatedhene dhapama munahowelinyu, ole ali musolo wa onamathonga ni owedha watewene.
11 Wodhela wandana munninyuna nuliye ni nyuwa muhiineliwa ohiya ni mada, mbwenye mwaha woorula mwiili wothega yandeyile mwaha wineliwa onadhela wa Kiristu.
12 Mwaha Mulugu ohuuvitani vamodha ni Kiristu wodhela obaddiziwa waye teto muhuvenyihiwa muukwani vamodha nuliye mwaha nroromelo nenyu, mukaviheriwaga ni kopolo dha Mulugu anvenyihile muukwani.
13 Ohiya eyo, naarive kale nyu mugaakwile mwaha dhoviriganiha dhenyu ni ekalelo yenyu yoohineliwa yomwilini, Mulugu ohuuvahani egumi vamodha nuliye.Teto nuupama waye, Mulugu ohunilevelela dhoviriganiha dhehu
14 ni odduguddela* dukumento yalebiwe ni mada yanna malamulo owinjhiva yakumeleliha dhowera dhehu dhabure. Oliye ovenyihavo okomela vantxikwani na goyi.
15 Wodhela ntxikwa na goyi oliye wakuguula anamathonga ni ale enna owedha dhowara dhewa wahiya madave, ni wawoniha vaari vaathu aatene wihina ohumala wagonjhiha, vano wambela waweddana ninga anyakambura.
16 Bumwahaya, kammwihiye muthu wutorihani mwaha wa dhithu munajhinyu obe munang’winyu, obe wodhela waajha mathanga a mweri muxa obe mwaha wa labo na Sabadu.
17 Dhithu ndha murunti wa dhithu dhafuna odha, mbwenye ebaribariya di Kiristu.
18 Ahikalewo muthu anisinjheedhana wiyeviha ni anna ekalelo yowawebedha angero, anuuyeleliheni waakela mukono weenyu; athu ayo enalibana dhithu yoniliwa. Mwebaribarene mubuwelo wewa womwilini onowaweriha aliwa okala owithukula naarive yahinna mwaha woofwanelela withukulana,
19 teto aliwa kili mwimodhani ni musolo wehu weebaribari, ole onunnuwiha mwiili waatene ni onagumaniha mune muli makuva ni musepa, mowindala mwiliya onowunnuwa nnikavihero nnadhela wa Mulugu.
20 Akala nyu muhukwa vamodha ni Kiristu wodhela dhithu dha mwilaboni, mwahaya bwaddi mugakalawo ninga munookosa epaddi yelabo mwawiwelelaga malamulo ala enihina:
21 “Kuhidde, kulawihe newene kudahinye”,
22 malamulo ayo enagana dhithu dhinarimeela dhamala olabihedhiwa teto malamulo ala, kahiyo yaala athu enaahudhihiwa?
23 Dhithu ndho dhinakala ninga thotho mbwenye kadhinamukavihera muthu owanana dhofuna dha mwiili, eyo enowereya mwaha athu enathoma yekiwa makalelo omwebedha Mulugu, enowisinjheedha ninga athu owiyeviha ni enowoniha goyi mwiili wewa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Tho-tho ”
^ Obe: “Othimiha”
