Dhilebiwe ni Lukaji 11:1-54
11 Labo nimodha Yesu aali mburo dhaala alobelaga, vano nuumala mmodha wa anamahara aye owoga egi: “Nabwiya, kanihudhiheni olobela ninga Juwawu ahudhihiye anamahara aye.”
2 Oliye wawaddela egihina: “Mwaalobelaga, mulobelege mwegihina: ‘Babani, ndina nenyu ntxenihiwe. Omwene weenyu odhe.
3 Munivahe yoojha ya kadda labo, mowiwanana ni dhithu nnahowelihu.
4 Ni munilevelelege dhothega dhehu, mwaha nihiyoya nnowalevelela athu aatene enanithegela; ni kamunihiye omorela muyowehiwani.’”
5 Nuwindo, oliye wawaddela egihina: “Baani wa nyu anna mukwaye, vano anomaruwa vaari va mahiyu ni owoga egihina: ‘Mulobwana, gibolihe pawu tharu,
6 mwaha mukwaaga dhaala afiyile movanene aali volenddoni vano miyo kaginna ethu yonvaha.’
7 Mbwenye oliye anowaakula agaali mba mwemmo egihina: ‘Epaa kuginyonye gihimala ofuga musiwo teto anaga egonne vamodha ni miyo ni kagili oovenya wihina guuvahe ethu.’
8 Miyo ginowuwaddelani gegihina: Mwebaribarene oliye anere ovenya wihina anvahe dhithu dhatedhene anahoweliye, ohiya mwaha okala mukwaye, mbwenye mwaha omuwadda ni ntidi.
9 Mowindo, miyo ginowuwaddelani gegi: Mudidele oloba, munere ovahiwa; mudidele oveda, munere ofwanya; mudidele ogogodda, munere ofuguleliwa.
10 Mwaha muthu aatene yole analoba, onoovahiwa, aatene yole anaveda onofwanya; aatene yole anagogodda onofuguleliwa.
11 Mwebaribarene, baabi baani ani mwanaye amuloba oba onvaha nowa, ohiya onvaha oba?
12 Obe amuloba nzayi anere onvaha walize?
13 Mowindala, naarive nyu mugaali athu abure* muhunona wavaha aninyu dhithu dhapama, ki wera Baabinyu ali odhulu, anere wavaha muzimu wotxena ale enamuloba!”
14 Voharela, oliye omwigara demoniyu ohuwoga amooniha goyi mulobwana dhaala. Vano demoniyu ole numuhiya mulobwana ole ohuwoga, oliye obajha owoga, muthithi waathu walivo okala wootikinene.
15 Mbwenye athu amodha owoga yegihina: “Oliye anawigara ademoniyu ni kopolo dha Belzebu,* namathonga aademoniyu.”
16 Mbwenye amodhaya wihina emwehe wambela omuloba yintelelo yodhulu.
17 Nunona ethu yubuweliwa oliye wawaddela egihina: “Omwene waatene onagawanyeya onogujhuwa, ni nyumba yatene enagawanyeya kinawedha okala yowimelene.
18 Nimakalelo mamodhave, akala Saddana ohugawanyeyamo omwene waye onere okala wotikitereyene? Mwaha nyu munawoga wihina miyo ginawigara ademoniyu wodhela Belzebu.
19 Akala miyo ginowawigara ademoniyu ni kopolo dha Belzebu aninyu enawigara ni kopolo dhawani? Bumwahaya aliwa enere wutorihani.
20 Mbwenye akala miyo ginawigara ademoniyu ni kopolo* dha Mulugu, mwebaribarene Omwene wa Mulugu ohufwanyani.
21 Akala mulobwana a kopolo ni ali owiwegeredhene ni dhipano dhaye dhowanana koddo, anosugwera nyumba yaye, dhoreela dhaye dhili dhobareleyadhene.
22 Mbwenye akala muthu mmodha a kopolo ompitha oliye onomuhidda ni onomugonjhiha, anomwaka futhi dhaye dhatedhene aroromeliye ni ogawana ni akwaye dhithu dhayedha amwakiliye.
23 Ole ahili epaddi yaga ali wolapela ni miyo, ole ahinalaba ni miyo wihina aadhena athu wa miyo, diyoyo anaamwadha athuya.
24 “Muzimu wabure wakuma mmwiilini mwa muthu, onoovira mburo dhowumma muhili manjhe, osayelaga mburo wowithuwavo, mbwenye wahifwanya mburo onowoga wegihina: ‘Ginohogolowela vaade vaga vevale gitamilimivo.’
25 Vano wafiya onofwanya vaadeva vigaxeliwe ni vigawomihedhiwe.
26 Mowindala, winodhowa odhana muzimu Seti, dhowopiha omukwaranya oliye, yera ndo enovolowa okalaga mwemune. Vano, omakuthulo wa dhithu wafiya winere othabwa okwaranya omambelelo.”
27 Awogagave, muhiyana dhaala aali vaari va muthithi yole waathu owoga ni ndhu nootama egi: “Oohagalala di muthu ubanleni ni uwamwiheni!”
28 Mbwenye oliye owoga egihina: “Naari, oohagalala baale enawiwa madhu a Mulugu ni yaaparihedhaga mabasa!”
29 Muthithi ole waathu othabwagave winjhivavo, oliye wambela owoga egihina: “Nlogo nna nlogo nabure. Nnosayela yintelelo, mbwenye kannonihiwe newene yintelelo modha, ehili yintelelo ya Jonasi.
30 Mowindala ninga Jonasi aaliye yintelelo ya Aninivita, Mwaana Muthu anakale yintelelo ya nlogo nna.
31 Labo notoriha, musano oomadhelo nduwa anere ovenya vamodha ni nlogo nna wihina yaatorihe, mwaha oliye adhele wolapelawene wihina avuruwane thotho dha Salomawu. Mbwenye vala ohukalavo muthu munlubale omukwaranya Salomawu.
32 Labo notoriha, athu oNinive enere ovenya vamodha ni nlogo nna wihina yutoriheni, mwaha aliwa yahithwaruwa Jonasi nuwalaleya. Mbwenye vala ohukalavo muthu munlubale omukwaranya Jonasi.
33 Athu yamuhiddiha lampada, kinanvita newene kinampweha mukukutuni mwa kama, mbwenye enomutomeya vadhulu wihina athu enavolowa yonege waara.
34 Lampada na mwiili thi ninto. Bumwahaya, ninto naawo noonaga pama, mwiili wawo onowara; mbwenye akala ninto nawo thabure,* mwiili wawo watene onakala yiihive.
35 Bumwahaya mukale pasope wihina waara munninyuna winasadduwe wikale yiihi.
36 Mowindo, akala mwiili wawo watene onowara, epaddi emodha ehinna yiihi, mwiili wawo watene, onowara ninga lampada nnumoneeya ni waara wewa.”
37 Yesu numala wawoga madhu ala, Nfarizewu dhaala omuloba wihina adhowe ajhe vaade vaye vamodha nuliye, nuwindo oliye odhowa okarati vameza.
38 Nfarizewu ole numoona Yesu ajhaga ahanawile* mada, oliye otikina vanlubale.
39 Mbwenye Nabwiya owoga egihina: “Nyu Afarizewu munafufutha kopo ni parato odeve mbwenye muwarimwa mugadhanle nrima ni obure.
40 Ataduwa nyu! ole anafufutha ode kanafufutha ni muwarimwa, kahi ndo?
41 Mowindo, mwavahe athu oohawa dhithu dhili vati va murima veenyu, vano dhatedhene wodhela emuthu yenyu dhinere okala dhoweela.
42 Mbwenye ginowukubanyedhani nyu Afarizewu, mwaha munonvaha neekumi a ortela, aaruda* ni a makupu aamatene, mbwenye munolamusa wogowa* ni odhivela wa Mulugu! Ndha si dhithudha dhahoweleya nyu werana, muhulamunse dhithu dhimodha.
43 Ginowukubanyedhani nyu Afarizewu, mwaha munadhiveliwa okarati mburo dhoobajha dha musinagoga ni olojheliwa mwakala vamerkadu!
44 Ginowukubanyedhani nyu mwaha munakala ninga mahame ehinoneya teto athu enanyingaleliwa ehinonaga!”
45 Mmodha waaliwa aakovelele Malamulo owoga egihina: “Namahudhiha, mwawogaga ndo munaniruwana nihiyoya.”
46 Yesu omwakula egihina: “Ginowukubanyedhani ni nyuwa mwakovelele Malamulo, mwaha munowamagelela athu mutholo ehinandiwa othukula, newene nyu annya muhinandinyu osusiha ni embuno!
47 “Ginowukubanyedhani, mwaha munowamaga mahame aanamavuhulela makolwinyu yaapiliwa!
48 Mwebaribarene nyu muli anamoona a mabasa yaapanre makolwinyu ni munorumedha dhithu yeriliwana, mwaha aliwa ehaapa anamavuhulela, mbwenye nyu wamagela mahameya.
49 Bumwahaya, thotho dha Mulugu dhihiwoga dhegihina: ‘Ginere waruma anamavuhulela ni anamahara, vano aliwa enere waharahara ni enere waapa amodhaya,
50 wihina nikame nanamavuhulela nikuthuliwe obajha vipaddusiwe elabo, nikukusiwe nlogo nenna,
51 obajha nikame na Abeli ofiyedha nikame na Zakariya, yole munpilinyu vaaltareni nyumba ya Mulugu.’ Hee, miyo ginowuwaddelani, wihina nnere okukusiwa nlogo nenna.
52 “Ginowukubanyedhani nyu aliba wakovelela Malamulo, mwaha munowawadeliha athu xavi dhomunonana Mulugu. Nyu mwaannya kamunavolowa ni munowawadeliha ale enafuna ovolowa!”
53 Vano oliye nukuma vevale, anamaleba ni Afarizewu wambela omuwadda vanlubale wihina emukohegeve makoho mamodha,
54 yasayelaga makalelo ompara ni madhu aawogiye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “anamathega.”
^ Belzebu ni egerego ndina nimodha anithaniwana Saddana namathonga aademoniyu.
^ Obe: “embuno ya Mulugu.”
^ Obe: “thanrima.”
^ Obe: “ahihabelemo.”
^ Nikupu nonukwela nalabihedhiwa ninga murombwe obe tideriyu.
^ Obe: “opama”
