Dhilebiwe ni Lukaji 13:1-35
-
Mwaahithwaruwa munere otolosiwa (1-5)
-
Nladdaniho na nfigera wahinvaha dhowima (6-9)
-
Muhiyana ooragala mutana, onovulumusiwa labo na Sabadu (10-17)
-
Nladdaniho na thanga ya mostarda ni na emela (18-21)
-
Enohoweleya wilibihedha wihina ovolowe musiwo wopurana (22-30)
-
Erodi ‘kwadde ole’ (31-33)
-
Yesu onoomukubwanyedha Jeruzale (34, 35)
13 Mudhidhi yole, athu amodha yaali vevale omwaddela Yesu wodhela athu ooGalileya Pilatu aapiliye, nikamena ataganyihedha ni mukutho dhewa.
2 Oliye wawakula egihina: “Munubuwela wihina ethu ela yapadduwenle athu oGalileya yereye mwaha aliwa baathabwile othega, wapitha athu amodha ooGalileya?
3 Miyo ginowuwaddelani gegi naari; mbwenye ni nyuwa mwaahithwaruwa, munere otolosiwa nimakalelo mamodhave.
4 Obe nyumba yotaama yoSilowe yamothile, enowaapa athu 18, — nyu munubuwela wihina aliwa baathabwile othega wapitha athu yakala oJeruzale?
5 Miyo ginowuwaddelani gegi naari; mbwenye ni nyuwa mwaahithwaruwa, munere otolosiwa nimakalelo mamodhave.”
6 Nuwindo, oliye wawaddela yoladdaniha emodha egihina: “Mulobwana dhaala, ahidhala muthanko wa figu mmunddani mwaaye mwa uva, vano oliye odhowa osayelamo yowima, mbwenye kafwannyemo ethu.
7 Oliye owoga nnamalaba asamalela mundda ole wa uva egihina: ‘Dhihimala yaka tharu gidhaga osayela dhowima mmuthankoni muna mwa figu, mbwenye kaginafwanyegemo ethu. Kagwadda! Mwaha kunavaha dhowima.
8 Namalaba ole omwakula egihina: ‘Nabwiya, muhiye yaka modha baahi. Miyo ginere otiba sere-sereya wihina gipwehevo esturume;*
9 akala osogolo onere ovaha dhowima dhihikala, mbwenye akala kunavahe, podi ogwadda.’”
10 Yesu eera ohudhiha musinagoga labo na sabadu.
11 Mwemune ahikalamo muhiyana dhaala oonihiwa goyi ni muzimu wabure muwari mwa yaka 18; mutanaye wenre okoromana ni kaanda wiinuwa.
12 Yesu numoona muhiyana ole, owoga nuliye egihina: “Muhiyanawe, oreddaawo ohumala.”
13 Oliye omutapulela maladaaye, mohilegela mutanaye woogowa, vano wambela omuthithimiha Mulugu.
14 Mwaha wa yeyo, namasogolela a musinagoga otakaleliwa mwaha Yesu ovulumusa labo na sabadu, nuwindo owoga ni muthithi ole waathu egihina: “Eliwo malabo matanu nammodha owapara mabasa; bumwahaya mudhege malabo yayo wihina nvulumusiwe, ohiya labo na Sabadu.”
15 Nabwiya omwakula egihina: “Anamaleketha nyu! Kadda muthu wa nyu, labo na sabadu, kanatapula ng’ombaye obe burwaye wihina adhowe ang’wihe?
16 Kiyafwanelele muhiyana ola mwaana aAbaraawu yoyo Saddana ammangiye muwari mwa yaka 18, woboliwa mukambura mwaaliye labo na sabadu?”
17 Oliye nuwawoga madhu ala, amwiddani aye aatene okanna manyazo mbwenye muthithi waatene walivo wohagalala ni dhithu dhotikiniha oliye eeriyena.
18 Nuwindo, oliye wenjhedhedha egihina: “Omwene wa Mulugu onaligana ninddi, ki giladdanihe niithu baani?
19 Onaligana ni thanga ya mostarda mulobwana dhaala aaliliye mmunddani mwaaye; thanga ele wunnuwa okala muthanko munlubale, vano anabalame oodhulu omagamo dhitunjhidhiwa mmujhinddanimwa.”*
20 Vano, oliye wenjhedhedhave egihina: “Omwene wa Mulugu, giladdanihe ninddi?
21 Onaligana ni emela athukunle muhiyana ataganyihedha ni mpimo miraru dhoothu, ofiyedha othu waatene onyakuwa.”
22 Yesu aheedda sidadi ni sidadi, murudda ni murudda ni ahudhihaga mudila adhowaga oJeruzale.
23 Nuwindo, mulobwana dhaala omukoha egihina: “Nabwiya, athu enaavuluwe enakale vang’ono?” Yesu wawakula egihina:
24 “Mwikome pamadhene wihina nvolowe mulago wopurana, ginowuwaddelani wihina anamwinjhi enere oxixa wihina evolowe, mbwenye enere olepela.
25 Vano mwanamuralaya avenya anere ofuga musiwaye, mbwenye nyu munere okala ode mugogoddaga musiwoya ni muwogaga mwegihina: ‘Nabwiya, kanifuguleleni’, mbwenye oliye anere wuwakulani egihina: ‘Nyuwa munadhela waani, miyo kagunonneni.’
26 Vano nyu munere wambela owoga mwegihina: ‘Iyo nang’wesa ni najhesa vamentoni veenyu, teto nyu nabwiya moohudhiha mudila mwehu.’
27 Mbwenye oliye anere wawakula egihina: ‘Kaginonne munadhelinyuwo. Mugivenyelevo vamentoni vaaga aatene nyu munerana dhithu dhohogowa!’*
28 Wengo funakale wikubanyedha wewa ni watakuna meeno, mwadha mmoona Abaraawu, Izaki, Jako ni anamavuhulela aatene Mumweneni mwa Mulugu, mbwenye nyu mugavokedhiwe ode.
29 Ohiya eyo, athu enerege okuma omadhelo nduwa ni omayelo nduwa, omwaango* ni oti* wihina ekarati vameza Mumweneni mwa Mulugu.
30 Nvuruwane! Ehikalawo oogomihedha enaakale oobajha, ni ehikalawo oobajha enakale oogomihedha.”
31 Mudhidhi yole, Afarizewu amodha omwaddamela ni owoga yegihina: “Omaruwe odhowege, mwaha Erodi anafuna uupe.”
32 Yesu wawaddela egihina: “Mudhowe mwamwaddele kwadde ole mwegihina: ‘Ginna wawigara ademoniyu, ginna wavulumusa athu peeno ni mangwaana, mbwenye muroddovano ginere wamariha mabasaaga.’
33 Bumwahaya ginohowela wapara mabasaaga peeno, mangwaana ni muroddo, mwaha kinenyeya namavuhulela opeliwa elabo emodheene wihili oJeruzale.
34 Jeruzale, Jeruzale, onaapa anamavuhulela ni onaapwesa ni mabwe ale enarumiwa . . . Dila ngasi gisayelimi makalelo owatugumanya aninyu, ninga mwanaku anaakubaarela anaaye mukapwani mwaaye! Mbwenye nyu kamufunne.
35 Vano Mulugu anere onyanyala nyumba yenyu. Miyo ginowuwaddelani gegihina: Kamunadha mugoonaga ofiyedha labo munadhinyu muwoga mwegihina: ‘Oothithimihiwa duule anadha ni ndina na Yehova!’”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Dhithu dhinuddiha thaya.”
^ Obe: “mmurasinimwa.”
^ Obe: “dhabure.”
^ Obe: “oSul.”
^ Obe: “onoorti.”
