Dhilebiwe ni Lukaji 15:1-32
15 Anamakukusa musoko aatene ni anamathegaya yodha vaali Yesu wihina envuruwane.
2 Afarizewu ni anamalebaya yomwaaba vikaleliwa yegihina: “Mulobwana ola anodhiveliwa okarati ni anamathega ni onoojha naaliwa.”
3 Nuwindo, oliye wawaddela yoladdaniha egihina:
4 “Baani wa nyu anakanna mambila 100 vano nimodha nnorimela, kanaahiya 99 mwiddeddereni vano anodhowa osayela nne nirimele?”
5 Vano oliye afwanya, anookapatha ni anohagalala.
6 Ndo oliye afiya vaade vaye anowawithana akwaye ni amwanddamanaaye ni anowawaddela egihina: ‘Muhagalale ni miyo, mwaha nimbila naaga nne narimele gihifwanya.’
7 Miyo ginowuwaddelani gegi, ni makalelo mamodhave odhulu winere okala ohagalala mwaha muthu mmodha oothega othwaruwa, ohiya athu 99 owoogowa ehinahowela othwaruwa.
8 “Obe muhiyana baani anakanna korowa kumi dha darakima, enorimelavo modha kanahiddiha panti axela mba mwaaye mwatemwene ni asayelamo pamadhene ofiyedha ofwanya?
9 Vano afwanya anowawithana akwaye ni amwanddamanaaye ni anowawaddela egihina: ‘Muhagalale ni miyo, mwaha gihifwanya korowaga ele ya darakima yagirimenle.’
10 Miyo ginowuwaddelani gegi, ni makalelo mamodhave angero a Mulugu enere ohagalala mwaha muthu mmodha oothega othwaruwa.”
11 Nuwindo, Yesu owoga egihina: “Mulobwana dhaala aanna ahima abiili.
12 Vano amung’onoya owoga naababe egihina: ‘Babani givaheni dhoreela dhaaga.’ Vano oliye wagawela kadda muthu dhaye.
13 Nuuvira mwanamalabo, mwaana amung’noya othukula dhoreela dhaye ni odhowa elabo yolapela. Nuufiya wule, oliye ononga dhoreela dhaye dhatedhene mwaha wothukula mweddelo wabure.*
14 Numala ononga dhatedhene okumelela* dala elabo yele yatene, vano oliye wambela woona goyi.
15 Oliye osayela ganyu vano ofwanya vaade va mwanamurala a elabo yele, oliye omuruma omundda waye wihina ajhihege guluwe dhaye.
16 Vano oliye omukalelaga murogo alfaroba, dhoojha dha guluwe, mbwenye newene kaavahiwa ethu.
17 Vano nusuweya musolo, oliye owoga egihina: ‘Anamalaba ababa vano enna ojha ni enna orubala, wula miyo gikwaga dala!’
18 Gineerege odhowa vaade vaababa gaalobe gegihina: “Babani, gihimutheegela Mulugu oodhulu ni gihuthegelani.
19 Kaginafwanelela okala mwaninyu. Mugoonege ninga mudhaari enyu.”’
20 Oliye omaruwa odhowa ogumana naababe. Agaali wolapelawene, ababe omoona ni omweddela thagaraga. Aliwa omuthamagela, omukubarela ni ombejari.
21 Vano mwaana ole owoga naababe wera: ‘Babani, gihimutheegela Mulugu oodhulu ni gihuthegelani. Kaginafwanelela okala mwaninyu.’
22 Vano ababe owoga ni adhaariwa yegihina: ‘Kaaguvani! Kadhenani malaya olapa athimaya, mmuwarihe, mwamala mmudhena aneli ni sandaliya mmuwarihe.
23 Mwindo, mudhena mwaana ng’ombe yooruva mupe, nnafuna nimujhele mathanga,
24 mwaha mwanaga ola ahikwa vano uhogolowela okalawo, ahirimela vano ukumelela.’ Nuwindo mathanga wambela ojhiwa.
25 “Mwaana apogoya ali omundda, vano ahogolowelaga vaade ni aajaga ofiya, wambela wiwa jhibo wula athu yinaga.
26 Nuwindo, oliye omwithana mudhaari mmodha ni omukoha ethu yapadduwa.
27 Oliye omwaddela egihina: ‘Ddibilo didhiile, vano ababo ompela mwaana ng’ombe yooruva mwaha wohogolowa agaali mugumi.’
28 Mwaha wa yeyo oliye otakaleliwa vanlubale ni okoodda ovolowa. Mbwenye ababe okuma ni ombebedha wihina avolowe.
29 Oliye wawakula ababe egihina: ‘Gihulabelani yaka dhowinjhivadhene ninga mudhaari ni kaginaalupege malamulo enyu. Naarive dhigaali ndo, kamunagipelege newene mbuzi modha wihina gaajhe mathanga nakwaaga.
30 Mbwenye nuufiya mwaninyu ola anoongile dhoreela dhenyu dhatedhene naanyabi, nyu ompela mwaana ng’ombe yooruva.’
31 Ababe omwakula yegihina: ‘We wakala vevala ni miyo malabo amatene teto dhithu dhatedhene ginnimina saawo.
32 Mbwenye iyo nnawerana mathanga ala wihina nihagalale baahi, mwaha ddibilo ola ahikwa vano uhogolowela okalawo, ahirimela vano ukumelela.’”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “mweddelo wohidhuwanyeya; mweddelo wootaduwa.”
^ Obe: “okalawo.”
