Dhilebiwe ni Lukaji 17:1-37
17 Nuwindo oliye wawaddela anamahara aye egihina: “Kinenyeya ohukalawo mabwe ookwakwathusa. Mbwenye ginomukubanyedha muthu yole anakwakwathuse athu amodha!
2 Yere owomela muthu yoyo ahamageleliwe mukohi nibwe ninlubale indo avokedhiwa muniya, ohiya oliye omutheegiha mmodha waathu yala ang’ono.
3 Pole-pole mwisugwerege. Akala ddibilo ohuthegela omusumulule, oliye athwaruwa omulevelele.
4 Naarive valabo uthegele dila tanu nabili ni anoohogolowa dila tanu nabili egihina: ‘Miyo gihithwaruwa’ omulevelele.”
5 Nuwindo arumiwi owoga nNabwiya yegihina: “Nenjhedhedheni nroromelo.”
6 Vano Nabwiya owoga egihina: Nyu mwahakanne nroromelo nnaligana ni thanga ya mostarda mwere owoga ni muthanko ola wamorela ooriba mwegihina: ‘Kadduleya* vala viliiwe wiwaale muniya!’ Ndo oliye eere wuwiwelelani.
7 “Baani wa nyu anamuhiya mudharaaye omundda alimaga obe aasamalelaga mambila aye, teto mudhaari ole ahogolowa Nabwiye awoga egihina: ‘Kaguvela vameza vala ojhe ethu-sithu’?
8 Ohiya werana ndo kanawoga egihina: ‘Kawara guwo dhimodha ogipiyele jantaaraga wammala ogigawele wihina gimujhe ni ging’we windo ni weya podi ojha ni ong’wa’?
9 Nerege anere omutamalela mudharaaye mwaha werana ethu amurummiye wihina erena?
10 Ni makalelo mamodhave, mwamala werana dhithu dhatedhene murumiwinyu muwoge mwegihina: Nili adhaari ohufwanelela. Nenrena yele yahoweleya wihina nerena.’”
11 Adhowaga oJeruzale oliye ovira oSamariya ni oGalileya.
12 Nufiya murudda dhaala, alobwana kumi yanna maranya odhowa ogumana nuliye, mbwenye aliwa wimela wolapelawene.
13 Vano aliwa omwithana ni ndhu nootama yegihina: “Yesu, Namahudhiha neddeleni thagaraga!”
14 Oliye nuwawoona wawaddela egihina: “Mudhowe mwagumane naanamakutha.” Emaruwagawene, ehinasuse aliwa ovulumuwa.
15 Mmodha nuwoona wihina ahivulumuwa, ohogolowa amuthithimihaga Mulugu ni ndhu nootama.
16 Mulobwana ole okokora vamentoni va Yesu amutamalelaga. Oliye ali musamaritano.
17 Yesu omwakula egihina: “Aliba maranya aatene ehivulumusiwa kahiyo? Kito atanu nennayi baavi?
18 Newene kaavo mmodha ahogolonwe wihina amuthithimihe Mulugu, ahili mulobwana ola a nlogo nimodha?”
19 Mowindo oliye omwaddela egihina: “Kavenya odhowege. Nroromelo nawo nihuvulumusa.”
20 Afarizewu omukoha yegihina: “Omwene wa Mulugu onadha alini?” Oliye wawakula egihina: “Omwene wa Mulugu kundha mwamakalelo owoneya,
21 newene athu kinawogege yegihina: ‘Kasugwani, ola oli vala!’ Obe: ‘Oli wule!’ Mbwenye munone wihina Omwene wa Mulugu oli vaari veenyu.”
22 Oliye wawaddela egihina: “Onere ofiya mudhidhi munafuneginyu woona labo na Mwaana Muthu, mbwenye kamunoone.
23 Mbwenye athu enerege owoga yegihina: ‘Kasugwani, ole ali wule!’ obe: ‘Ola ali vala!’ Kamuthamagelewo newene kamwahare.
24 Mowindala ninga dari eni yajerima odhulu yoneyaga dhipaddi dhatedhene, labo na Mwaana Muthu nnakale ndo.
25 Voobajha oliye anere woonihiwa goyi vanlubale teto nlogo nna nnere omukoodda.
26 Mowindala, ninga dhereya malabo a Nowe, malabo a Mwaana Muthu enakale ndala:
27 athu yoojha, yong’wa, alobwana yootela ahiyana yooteliwa, ofiyedha labo Nowe ovolowa mmwanddeyani, vano mutokora odha ni watolosa aatene.
28 Ni makalelo mamodhave, ninga dhereya malabo a Loti: Athu yoojha, yoong’wa, yoogula, yooguliha yowala ni yomaga nyumba dhewa.
29 Vano labo Loti nuukuma oSodoma omora mootho odhulu ni enxofere watolosa aatene.
30 Enereye emodhave labo nenno Mwaana Muthu anafuniye woneyihiwa.
31 “Malabo yayo anakale vadhulu va nyumba dhobodhaye dhigaali mba ahikite wihina athukulemo, nimakalelo mamodhave anakale omundda ahihogolowele dhithu ahiyiliye mundduli.
32 Mmubuwele mwaadha Loti.
33 Ole anafuna ovulusa egumaye anere oyelela, mbwenye ole anaayelele egumaye, anere ofwanya.
34 Miyo ginowuwaddelani gegihina: Emahiyu yeyo athu abili enakale vakamani, mmodha anere othukuliwa mmodha anere ohiyiiwa.
35 Ahiyana abiili enere ofwanyiwa vansiloni esilaga; mmodha anere othukuliwa mmodha anere ohiyiiwa.”
36 ——
37 Mwaha wa yeyo aliwa omukoha yegihina: “Waani Nabwiya?” Oliye wawakula egihina: “Wengo winakale muruthu, fivenvo vinaatugumane apangwe.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “kapoleya.”
