Dhilebiwe ni Lukaji 18:1-43
18 Numala wawaddela yoladdaniha wodhela thima yoolobela malabo amatene ni ohuselela,
2 egihina: “Sidade dhaala ahikalawo namatoriha ahamoova Mulugu ni kaamuriha muthu.
3 Teto luwani emodhave ahikalawo maamukwele, oliye kaagoma odhowa owoga nnamatoriha ole egihina: ‘Kawoga pama muladdu dhaaga ginnimina ni mwiddani aaga.’
4 Wahimala mudhidhi wowinjhivene ahimpwathaga, mbwenye oliye wubuwela egihina: ‘Miyo kaginamoova Mulugu newene kaginamuriiha muthu,
5 mbwenye, woona wi maamukwele ola anoothabwa oginyonya ndala, ginere owoga pamadhene muladdu dhaye wihina aselele oginyonya, gahera ndo onogigomiha.”
6 Vano Nabwiya owoga egihina: “Kanvuruwaneni namatoriha asorihiliye, naarive ahili muthu owogowa!
7 Ni makalelo yala, Mulugu kanenye wihina athu aye aasakuliye enamuloba mutana ni mahiyu yeddihiwe nuupama, wula aweddihaga nuuvilela?
8 Ginowuwaddelani wihina: Oliye anere weenya mohulegela wihina yeddihiwe mowogowa. Mowindala Mwaana Muthu afiya, nerege anere ofwanya nroromelo ninga nenna elabo ela yavati?”
9 Nuwindo oliye wawaddela nladdaniho athu ale yathabwa ororomela wogowa wewa ni yahanna nriho naathu amodha:
10 “Alobwana abiili odhowa otempulu wihina yalobele, mmodha ali nfarizewu mmodha ali namakukusa musoko.
11 Vano nfarizewu ole wimela wambela olobela mmurimani mwaaye egihina: ‘Mulugwaga, ginowutamalelani mwaha kagili ninga athu amodha: ambava, ohuroromeleya, anamararuwa; newene ninga namakukusa musoko ola ali vala.
12 Miyo ginoothuga sumana dhatedhene dila biili, ginompeleka neekumi mowiwanana niyele ginnimina.’
13 Mbwenye namakukusa musoko ole, imenle mwana volapelavene, kaafuna newene wavenyihedha mento aye odhulu, mbwenye oovada vathimarimani vaye egihina: ‘Mulugwaga geddeleni thagaraga miyo muliba otheega.’
14 Miyo ginowuwaddelani gegihina: Mulobwana ole adhowile vade vaye agonihile ekalelo yaye yowogowa ompitha nfarizewu ole. Mwaha ole anithukulele anere ototiwa manyazo mbwenye ole aniyevihe anere wunnuwihiwa.”
15 Ohiya eyo athu yowadhana aniwa oodduli wihina aatapulele nlada; mbwenye anamaharaye nuwawoona yeragana ndo wasumulula athu ale.
16 Nuwindo Yesu waruma wihina yadhena ahima ale oodduli egihina: Kahiyeni ahimaayo edhe wa miyo ni kamwaakoddihe, mwaha Omwene wa Mulugu bwaathu ninga yala.
17 Miyo ginowuwaddelani ebaribari: Ole ahinakele Omwene wa Mulugu ninga mwaana, kanaavolowe mumweneni.”
18 Vano namaholela dhaala aajudewu omukoha egihina: “Namahudhiha apama, geere ddi wihina gaakele egumi yohimala?”
19 Yesu omwakula egihina: “Mwahaya bwaddi ogagithana apama? Kaawo muthu apama ahili Mulugu baahi.
20 We uhanona pamadhene malamulo enihina: ‘Kuraruwe, kumpe muthu, kuwiye, kuvahe onamoona wowoota, warihege ababo ni amawo.’”
21 Mulobwana ole owoga egihina: “Obajha ezombwaaga ginowavirihamo malamulo amatene yala.”
22 Nuwawiwa madhu yala, Yesu omwaddela egihina: “Ehikala ethu emodha enuhalela onahoweliwe werana: Odhowe, wagulihe dhithu dhatedhene onniwena korowadha wavahe athu oohawa, wamala onere okanna dhoreela odhulu; vano odhe okale namahara aaga.”
23 Muzombwe ole nuwawiwa madhu yayo, oliye wukuuwa vanlubale mwaha ahithabwa oreela.
24 Yesu omusugwa ni owoga egihina: “Kinakale ethu yokweya athu enna korowa ovolowa Mumweneni mwa Mulugu!
25 Mwebaribarene, enere okweya kamelu ovolowa ponyongo ya singano ohiya muthu ooreela ovolowa Mumweneni mwa Mulugu.
26 Athu yawiwale madhu yala owoga yegihina: “Ki anavuluwe baani?”
27 Oliye owoga egihina: “Dhithu dhahinenyeya waathu, wa Mulugu dhinowenyeya.”
28 Mbwenye Peduru omwakula egihina: “Kasugwani! Iyo nihimala ohiya dhithu dhatedhene wuharagani.”
29 Oliye wawaddela egihina: Kawo muthu anahiye nyumbaye, mwariye, addibile, ababe obe anaaye mwaha wa Omwene wa Mulugu
30 ahakela okunamo mudhidhi yola, teto omakuthulo wa dhithu dhatedhene, egumi yohimala.”
31 Oliye wawithanela okwibi anamaharaye ni wawaddela egihina: “Nvuruwane, nnadhowa oJeruzale wengo dhinere wakwanela dhithu yalembe anamavuhulela wodhela Mwaana Muthu.
32 Motajhiha, oliye anere opelekiwa mmadani mwaathu amalogo wihina emunyemule, emoonihe goyi ni emuturele maara.
33 Yamala omutxapula anere opiwa vano labo nanatharu avenyihiwe muukwani.”
34 Naarive dhigaali ndo aliwa kayawoonelemo madhu ale yatapuleliwa, mwaha yotapulela ya madhu ala yaali yoviteya, bumwahaya aliwa kayonelemo ethu.
35 Vano Yesu nuwaddamela oJeriko, onfwanya mulobwana dhaala ohoona akiratile sere-sere ya dila, alobaga dhithu.
36 Nuwiwa muthithi waathu oviraga oliye okohedha wihina anone ethu baani yapadduwa.
37 Aliwa omwaddela yegihina: “Yesu munazareno, dinavira!”
38 Nuwindo oliye omwithana ni ndhu nootama egihina: “Yesu, Mwana Davidi, geddeleni thagaraga!”
39 Mbwenye athu yali osogolo wa muthithi yole waathu wambela omusumulula wihina amaalewo, mbwenye oliye othabwagave okuwa egihina: “Mwana Davidi, geddeleni thagaraga!”
40 Yesu wimela ni oruma wihina adhiwena mulobwana ole ohoona. Vano numwaddamela, Yesu omukoha egihina:
41 “Onafuna guwerele ddi?” Oliye omwakula egihina: “Nabwiya, ginaloba wihina mento aaga yoonege.”
42 Vano Yesu owoga nuliye egihina: “Kaafugule mento, nroromelo nawo nihuvulumusa.”
43 Mudhidhi yoole mento aye ofuguwa oliye wambela woona, vano oliye omuharaga Yesu amuthithimihaga Mulugu. Teto athu nuwoona ndhe dhereye, aliwa omuthithimiha Mulugu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
