Dhilebiwe ni Lukaji 23:1-56
23 Nuwindo, muthithi watene omaruwa omuthukulela wa Pilatu.
2 Vano wambela omwinkedha yegihina: “Ninfwannye mulobwana ola aholosaga nlogo nehu, ni akoddihaga oliva musoko wa Sezare ni awogaga wihina oliye di Kiristu teto dimweneya.”
3 Pilatu omukoha egihina: “We oli mwene aJudewu?” Vano Yesu omwakula egihina: Di nyu munawoga ndo.”
4 Vano Pilatu owoga ni anddimuwa aanamakutha ni muthithi ole waathu egihina: “Kaginamonana muladdu mulobwana ola.”
5 Mbwenye aliwa otujelagave yegihina: “Oliye anna oholosa nlogo nehu ahudhihaga elabo yatene yoJudeya, obajhana oGalileya ofiyedha wuno.”
6 Nuwiwa ndo, Pilatu okoha akala Yesu ali mugalilewu.
7 Nunona wihina oliye alamuleliwa ni Erodi, oruma wihina emuthukulele wa Erodi aali oJeruzale malabo yaale.
8 Erodi numoona Yesu ohagalala vanlubale. Ni wahivira mudhidhi wowinjhivene afunaga omoona Yesu, mwaha owiwa ovuwa waye ni ojhehedha omoona aweragana matikiniho vamentoni vaye.
9 Wambela omukoha dhithu dhowinjhiva, mbwenye oliye newene kamwakunle.
10 Mbwenye anddimuwa aanamakutha, anamaleba yovenya emwinkedhaga dhithu dhowinjhiva.
11 Vano Erodi vamodha ni anyakoddo aye wambela omunyemula ni omuteya emuwarihaga dhowara dha thima, nuwindo omuhogolosela wa Pilatu.
12 Vobajhavene Erodi ni Pilatu yahiddana, mbwenye labo nenne aliwa wandana pamadhene.
13 Vano Pilatu wawithana anddimuwa aanamakutha, anamaholela ni nlogo,
14 ni wakoha egihina: “Nyu mugidhelena mulobwana ola mwegi onoholosa nlogo. Miyo gihimukoha vamentoni veenyu, mbwenye kaginfwannyena dhothega dhiniwanana ni dhithu munamwinkedhinyu.
15 Teto newene Erodi kanfwannyena muladdu, bumwahaya adhe anihogoloselege. Ninga munooninyu oliye kanna yothega yamuthukulele opiwa.
16 Mowindala, miyo ginere omusinyusa gamala gimutapule.”
17 ——
18 Mbwenye muthithi waatene waathu okuwa wegihina: “Mumpe mulobwana oyo, mbwenye mmutapule Baraba!”
19 (Mulobwana oyo avokedhiwe mukambura mwaha oholosa nlogo sidadi yele ni wapa athu.)
20 Pilatu ohogolowela owoga naaliwa mwaha afuna amutapule Yesu.
21 Mbwenye aliwa wambela okuwa yegihina: “Akomeliwe vantxikwani! Akomeliwe vantxikwani!”
22 Oliye wawogana dila yanatharu egihina: “Mwahaya bwaddi? Mulobwana ola atheegile ddi? Miyo kaginfwannyena yothega yamuthukulele opiwa. Mbwenye miyo ginere omusinyusa gamala gimutapule.”
23 Mwaha wa yeyo aliwa wambela omuwadda ni othabwagave okuwa wihina akomeliwe vantxikwani, teto aliwa kayafuna omaala.
24 Vano Pilatu orumedha yoloba yewa.
25 Oliye omutapula mulobwana yamulonbiwa, avokedhiwe mukambura mwaha oholosa nlogo ni wapa athu, mbwenye ompeleka Yesu wihina emwerena yafuniwa.
26 Wula emudhowagana, aliwa omwihidda mulobwana dhaala ithaniwa Simawu ooSireni akuma omunddani waye wa uva, aliwa omuwaddihedha othukula ntxikwa na goyi wihina amuharegena Yesu.
27 Muthithi munlubale waathu, vamodha naahiyanaya, yomuhara evadaga vathimarimani mwaha womukubanyedha wula emunlelaga.
28 Yesu orugunuwa, wasugwa ahiyana ale ni owoga egihina: “Ahiyana oJeruzale, kamugunlele miyo. Mbwenye mwiwunlelege mwaannya ni mwawunlelege aninyu;
29 mbwenye munone wihina enere ofiya malabo athu enadhiwa ewoga yegihina: ‘Oohagalala baahiyana ehinabala ni ehinabaale ahima ni mabele yahinamwiwe!’
30 Vano enerege owoga ni mwango yegihina: ‘Onimorele!’ ni dhipwathapwatha yegihina: ‘Nikunele nthaya!’
31 Akala enowerana ndala muthanko ogaali mukiiti, ki wamala wumma?”
32 Ohiya eyo yahithukuliwa apanga abiili wihina yapiwe vamodha ni Yesu.
33 Vano, nufiya Mburo wa Dhigarigadhi,* aliwa omukomela vantxikwani ni apanga abiili, mmodha moono woojha mmodhaya moono weemara.
34 Mbwenye Yesu oosoriha egihina: “Babani, kaaleveleleni, eneriwa kinoona.” Ohiya eyo ovokedha gari dhowara dhaye wihina egawane.
35 Athu aatene wimela omusugwaga, mbwenye anamaholela omunyemulaga ni ewogaga yegihina: “Amodha owanda wavulusa; ivuluseto mwinnya, akala oliye di Kiristu asakuliwe ni Mulugu.”
36 Nanyakoddoya yomunyemula edhaaga valiye wihina envahe vinyu otaganyihedhiwa ni makupu oowawa,
37 ni yowoga yegihina: “Akala we oli Mwene aJudewu, kivuluseto wamwinnyo.”
38 Vadhulu vamusolo waye okomelavo tabwa walebavo madhu yawoga yegihina: “Ola di mwene aaJudewu.”
39 Vano mpanga mmodha akomeliwe vamodha nuliye wambela omuruwana egihina: “We kuli Kiristu? Kivuluseto wamwinnyo vamodha ni iyoya!”
40 Mbwenye mpanga mukwaye omusumulula egihina: “We kunamova Mulugu, vano ntorihiwihu nimakalelo mamodhave?
41 Iyo ntorihiwe mowogowa mowiwanana ni ele nerilihuna. Mbwenye mulobwana ola katheegile ethu.”
42 Nuwindo mpanga ole owoga egihina: “Yesu, onagidduwale wavolowa mumweneni mwawo.”
43 Oliye omwakula egihina: “Mweebaribarene, ginowuwaddela peeno: We onodha okale ni miyo mParayizu.”
44 Waligi mudhidhi wa 12, yiihi okuneela elabo yele yatene ofiyedha 15 wora,
45 mwaha nduwa nahithima. Vano kurtina na mburo woweela,* otaala vaari ni vaari.
46 Vano Yesu okuwa nindhu nootama egihina: “Babani, ginoopeleka egumaaga* mmadani mweenyu.” Nuwindo oliye okwa.
47 Nuwoona dhithu dhapadduwa, namasogolela aanyakoddo wambela omuthithimiha Mulugu egihina: “Mwebaribarene, mulobwana ola aali owogowa.”
48 Vano muthithi watene waathu waali vevale wihina woone dhithu dhapadduwa; ohogolowela vade vewa evadaga vathimarimani.
49 Athu aatene yamunonne yimenle mwana volapelavene. Ohiya eyo ahiyana yanvelenle okuma oGalileya yaali vevale, yoonaga dhithu dhatedhene.
50 Ahikalawo mulobwana dhaala ithaniwa Juze akosa epaddi ya Tiribunale ya maJudewu, ali mulobwana apama ni owogowa.
51 (Mulobwana oyo kaakavihenrena muselu yanniwana woompa Yesu.) Oliye ali oWarimateya, sidade yoJudeya nuliyeya ojheha Omwene wa Mulugu.
52 Mulobwana oyo odhowa wa Pilatu oloba muruthu wa Yesu.
53 Nuwindo oliye othukula muruthu ole ovidigelela* ni guwo ya linyu yathima odhowa opweha mmahameni yatibiwe vanibweni mwaali mwahinavitiwege muthu.
54 Naali labo Nomwegeredha Sabadu, teto ahanle neena wi Sabaduya abajhe.
55 Mbwenye ahiyana ale yanvelenle Yesu okuma oGalileya yahidhowa vamodha omahame wihina yoone makalelo wavitiwe muruthu waye,
56 vano aliwa ohogolowa wihina yegeredhe dhonukwela nukwela ni makura onukwela. Mbwenye ninga elemelelo aliwa withuwa labo na Sabadu, mowiwanana ni malamulo yawogiwa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “makuva a musolo.”
^ Obe: “santuwariyu.”
^ Lit. “muzimwaga; munebaga.”
^ Obe: “opotha.”
