Dhilebiwe ni Lukaji 24:1-53
24 Labo nowambela na sumana, mambeseene aliwa ofiya omahame, egathukule dhonukwela dhewa yegeredhiwa.
2 Mbwenye nuwavenyiha mento woona wihina nibwe nne naafugiwena omahameniwa nahisusihiwawo,
3 vano nuuvolowa kifwannyemo muruthu wa Nabwiya Yesu.
4 Vano egaali otikinene, okumelela alobwana abiili yawanre guwo dhojerimela.
5 Ahiyana ale wambela woova ni oworomela vati; nuwindo alobwana ale owoga yegihina: “Munamusayelela ddi muthu mugumi vaari vanookwa?
6 Oliye kali vevala, mbwenye ohuvenyihiwa muukwani. Mubuwele wihina agaali oGalileya oliye ahiwoga egihina
7 Mwaana Muthu eere opelekiwa mmadani mwaathu othega, apiwe vantxikwani vano labo nanatharu avenyihiwe muukwani.”
8 Aliwa wawubuwela madhwaye;
9 vano aliwa ohogolowela vaade, odhowa wawaddela arumiwi aye kumi nammodha vamodha naathu amodha.
10 Vaakaleliwa ahikalavo Mariya Madalena, Jowana ni Mariya amaye Tiyago. Ni ahiyana amodha yaali vamodha naaliwa odhowa wawaddela arumiwi aye.
11 Mbwenye arumiwi a Yesu kayarumedhe dhithu yawogile ahiyana ale. Aliwa yubuwela wihina yawoga dha mmuruni mwiwa.
12 Nuwindo Peduru omaruwa othamagela omahamewa, nufiya oliye oturumelamo, mbwenye onile dhowara dha linyu baahi. Numala odhowaga ikohaga ethu baani yapaddunwe.
13 Mbwenye labo nenne anamahara abiili omaga olenddo odhowaga murudda withaniwa Emawu walapenle makilometuru 11 ni oJeruzale,
14 yeeddaga wambela othapanyedha wodhela dhithu dhatedhene dhaapadduwe.
15 Wula ethapanyedhaga muselu yole, Yesu wafwanya ni wambela weedda vamodha naaliwa,
16 mbwenye mento ewa kayandile omunona wihina duliyene.
17 Oliye wakoha egihina: “Munathapanyedha ddi wula mweddaga?” Aliwa wimela ni wukuuwa vanlubale.
18 Mbwenye mmodha ithaniwa Kelewupa omukoha egihina: “We oli munyawedda anakala vaade yekayevo oJeruzale, ahinonne dhithu dhipadduwe malabo yala?”
19 Oliye wakoha egihina: “Dhithu baani? Aliwa omwakula yegihina: “Dhithu dhipadduwe ni Yesu Munazareno aali namavuhulela akopolo ni mabasa aapariye vamodha ni madhu aye vamentoni va Mulugu ni vaathu:
20 anddimuwa ehu aanamakutha ni anamaholela empelekiwa wihina athongeliwe okwa vano akomeliwa vantxikwani.
21 Mbwenye iyo noojheha wihina mulobwana yole eere wobola nlogo naamwaana Ezarayeli. Teto okuma labo nenne ofiyedha peeno enovira malabo mararu dhithu ndho dhigapaddunwe.
22 Teto yuwukuulihaya sowihina ahiyana amodha nuubehedha omahame
23 woona wihina aliwa kayafwannyewo muruthu ole, nuhogolowa wera yahawoona angero yawonge yegi oliye ohuvenyihiwa muukwani.
24 Mbwenye amodha yaali vamodha ni iyo yahithamagela omahame, ofwanya dhatedhene ninga ahiyana ale yawogiliwa, mbwenye kimonile Yesuya.”
25 Vano oliye wawaddela egihina: “Nyu muhinna thotho ni munolegela woonelamo dhithu dhatedhene dhiwogile anamavuhulela!
26 Kiyahoweleya wihina Kiristu oonihiwe goyi ni avolowe munthithimihoni mwaaye?”
27 Vano watapulelamo dholebela dhawoga wodhela oliye, obajhana dholebela dha Moyizeji ni dhaanamavuhulela aatene.
28 Nuwaddamela murudda wadhowiwa, oliye okalaga ninga adhowa wolapelawene.
29 Mbwenye aliwa omuwadda wihina akale naaliwa yegihina: “Kakala ni iyo, vinaaja oriba teto nduwa nnaaja omothelamo.” Nuwindo oliye orumedha okala vamodha naliwa.
30 Vano ajhaga vamodha naliwa, othukula pawu olobela, omutamalela Mulugu, numala ogwaddanya wagawela.
31 Nuwindo mento ewa ofuguwa aliwa woonelamo wihina ali Yesu, mbwenye oliye orimelavo.
32 Vano yowoga vikaleliwa yegihina: “Dhithu awogiye ndhaaga mudila kadhandahinya murima anitapulelagamo pamadhene Dholebela?”
33 Mudhidhi yole aliwa omaruwa ohogolowela oJeruzale, wafwanya arumiwi kumi nammodha vamodha naathu yatugumane naliwa;
34 yawoga yegihina: “Mwebaribarene, Nabwiya ohuvenyihiwa muukwani ni ohugumana ni Simawu!”
35 Vano wawaddela ethu yapadduwele egaali mudila ni makalelo yoneliwamo wihina di Yesu mudhidhi agwaddaga pawu.
36 Mudhidhi ewogagave dhithu ndha Yesu okumelela vaari vewa ni owoga egihina: “Murenddele okale ni nyu.”
37 Mbwenye aliwa otikina vanlubale ni wambela woova yubuwela wihina yoona muzimu.*
38 Mwaha wa yeyo oliye wakoha egihina: “Musimwelele ddi ni mwahaya bwaddi muganganyedha mmurimani mweenyu?
39 Kaasugweni mada ni manyalo aaga wihina dimiyene. Kagipareni mugoone, mwaha muzimu kunna nyama newene makuva ninga munagonelinyu.”
40 Vano awaddelagave, oliye wawoniha madaye ni manyalwaye.
41 Mbwenye mwaha ohagalala nutikina ndhe dhapadduwa, aliwa kayarumedha. Vano oliye wakoha egihina: “Muhukanna ethu yoojha?”
42 Nuwindo aliwa onvaha mwana piddula ya oba yowoosa,
43 oliye othukula otakuna wula emusugwaga.
44 Voharela, wawaddela egihina: “Ala bi madhu gawogilimi ngali vamodha ni nyu gegihina dhatedhene dhilebiwe mmalamuloni a Moyizeji, aanamavuhulela ni muSalmuni wodhela miyo dhinere wakwanela.”
45 Nuwindo, oliye wafugula mubuwelo wihina yonelemo Dholebela dhinatapuleliwa
46 ni awaddelaga egihina: “Dhihilebiwa wihina Kiristu eere woonihiwa goyi, vano labo nanatharu avenyihiwe muukwani,
47 wihina ni ndina naaye were olaleyiwa muthenga wihina athu ethwaruwe ni dhileveleliwe dhothega dhaathu amalogo amatene, obajhana oJeruzale.
48 Nyu munaakale anamoona a dhithu dhendha.
49 Munone wihina ginere wuvahani ele epaganyile ababa. Vano nyu, mukale musidadi mwemuna ofiyedha ovahiwa kopolo dhinadhela odhulu.”
50 Nuwindo oliye wathukulela murudda woBetaniya, watadela mada aye ni wareeliha.
51 Wula aareelihagave, oliye othukuleliwa odhulu.
52 Numala, aliwa okokora vamentoni vaye nuwindo ohogolowela oJeruzale egaali ohagalalene.
53 Malabo amatene yakala mutempulu emuthithimihaga Mulugu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “yera olaveya.”
