Dhilebiwe ni Lukaji 6:1-49
-
Yesu, “nabwiya a Sabadu” (1-5)
-
Mulobwana aanna nlada nooragala onovulumusiwa (6-11)
-
Arumiwi 12 (12-16)
-
Yesu onohudhiha ni onowavulumusa athu (17-19)
-
Ohagalala ni okubanya (20-26)
-
Wadhivela amwiddani (27-36)
-
Muselele otoriha (37-42)
-
Ononiwa mwaha wa dhowima dhewa (43-45)
-
Nyumba yomageya pama ni nyumba yahitibeleye pama alisersiya (46-49)
6 Nlabo dhaala na Sabadu, Yesu ni anamahara aye oviraga mmunddani mwa tirigu, vano anamahara aye wambela onvulula tirigu, omuthikithaga mmadani emutakunaga.
2 Mwaha wa yeyo Afarizewu amodha nuwona ethu yeriwana wakoha yeraga: “Mwahaya bwaddi mugerana ethu yahinarumedhiwa werana labo na Sabadu?”
3 Mbwenye Yesu wawakula egihina: “Nyu kamunilerigi ele Davidi vamodha ni alobwana aye yeriliwana nuvoliwa dala?
4 Davidi vamodha ni alobwana aye kayavolowe nyumba ya Mulugu, enovahiwa pawu dhotaleleya oliye otakuna vamodha ni alobwana aye, ethu yakoddihiwa otakuna newene Davidi newene ale yaali vamodha nuliye, mbwenye anamakutha baahi?”
5 Oliye wenjhedhedha egihina: “Mwaana a Muthu di Nabwiya a Sabadu.”
6 Sabadu mmodhaya, oliye ovolowa musinagoga ni wambela ohudhiha. Mbwenye ahikalawo mulobwana mmodha aaraganle nlada moono woojha.
7 Anamaleba ni Afarizewu yomusugwa pamadhene Yesu wihina emoone akala eere onvulumusa muthu labo na Sabadu, yindo esayelevo muladdu wihina emwinkedhe.
8 Mbwenye Yesu ahinona ethu yubuweliwa; nuwindo owoga ni mulobwana ole anna nlada noragala egihina: “Kavenya wimele vaari.” Oliye ovenya wimela.
9 Yesu wawaddela egihina: “Miyo ginowukohani gegi, enowenyeya labo na Sabadu werana opama obe obure, ovulusa egumi obe opa?”
10 Yesu nuwasugwa athu aatene yaali vevale, owoga ni mulobwana ole egihina: “Katapula nlada nawo.” Vano oliye otapula, nlada naaye woogowa.
11 Mbwenye aliwa otakaleliwa wambela ompanganela ethu yafuniwa omwerana Yesu.
12 Nlabo nimodha, Yesu odhowa omwangoni olobela, ovira emahiyu yantero alobelaga wa Mulugu.
13 Vati nuusa, wawithana anamahara aye, wasakulavo 12 aavahiliye ndina na arumiwi, mandiniwaya baala:
14 Simawu anoniwe ni ndina na Peduru ni ddibile Andere, Tiyago mwaana Zebedewu ni ddibile Juwawu, Filipi, Bartolomewu,
15 Matewuji, Tome, Tiyago mwaana Alfewu, Simawu ithaniwa “ooviheya,”
16 Judasi mwaana a Tiyago ni Judasi Iskariyoti, aamugulihe Yesu.
17 Aliwa okitela vamodha ni wimela mburo dhaala wamusalasala; yahikalavo anamahara aye owinjhiva ni muthithi waathu wakuma oJudeya, oJeruzale, sere-sere ya niya yo Tiru ni yo Sidoni waadhele onvuruwana ni ovulumusiwa dhiredda dhewa.
18 Naleya yasegedhiwe ni muzimu dhabure yovulumusiwa.
19 Vano muthithi watene wosayela makalelo womudahinya, mwaha dhokumamo kopolo dhaavulumusa athu aatene.
20 Oliye wasugwa anamahara aye ni owoga egihina:
“Oohagalala di nyu, oohawa, mwaha Omwene wa Mulugu bweenyu.
21 “Oohagalala di nyu muli oovoliwene, mwaha munere ojhihiwa.
“Oohagalala di nyu mununla, mwaha munere oteya.
22 “Oohagalala di nyu aniddiwa, ni anakoddiwa malabwene, anaruwaniwa ni ndina nenyu nnulumeliwa mwaha wa Mwaana Muthu.
23 Muhagalale ni muthabe nuuhagalala mwaha mareeliho enyu odhulu ehinjhiva, teto si dhithu dhendha makolo ewa yawereliwa anamavuhulela.
24 “Mbwenye ginowukubanyedhani nyu athu ooreela, mwaha muhumala wawakela mareeliho eenyu aamatene.
25 “Ginowukubanyedhani nyu mmanle orubala mwaha munere ovoliwa dala.
“Ginowukubanyedhani nyu munateya mwaha munere wikubanyedha ni munere wunla.
26 “Ginowukubanyedhani nyu, malabwene athu yuwogagani opama, mwaha siyeyo makolo ewa yawereliwa anamavuhulela owoota.
27 “Mbwenye ginowuwaddelani nyu munagivuruwana: Mwadhivelege amwiddani enyu, ni mwawerelege opama ale enuharaharani,
28 mwareelihege ale enuwulumelani, ni mwalobelelege ale enuruwanani.
29 Ole anuvade nthama nna, omulevele nthama nimodha; ole anuwakeni malayinyu amuwari, mmulevele ni oodeya.
30 Ole anulobe ethu onvahe, ole anuwake ethu yawo kumulobe wihina uhogolosele.
31 “Teto, dhithu munafuniyu wihina athu yuwerelegeni ni nyuwa mwawerelege dhithu dhimodhave.
32 “Ki vano mwadhivelaga baahi ale enudhivelani, munapuravo ddi? Ni anamathegaya enowawoniha odhivela ale enna odhivela naliwa.
33 Ki vano mwawerelaga baahi opama ale enuwerelani opama, munapuravo ddi si-to ni anamathegaya enowerana emodhave.
34 Ohiya eyo, mwamboliha muthu wula mujhehaga ohogoloseliwa, munapuravo ddi? Teto ni anamathegaya enobolihana anamathegave, yindo ohogoloseliwa emodhave.
35 Mohiyana ni eyo, mwadhivelege amwiddani enyu, mweregena opama ni mbolihege mwahijhehaga ohogoloseliwa; mareeliho enyu enere winjhiva, vano nyu munere okala ahima a Namadhuludhulu,* mwaha oliye anowawoniha opama athu ohitamalela ni abureya.
36 Mukale a thagaraga, ninga Babinyu adhaleliwe thagaraga.
37 “Ohiya eyo, muselele watoriha athu amodha, wihina munatorihiwe; muselele wapambiha athu amodha wihina munapambihiwe. Mudidele olevelela munere oleveleliwa.
38 Mukale athu oovaha ni nyuwa munere ovahiwa. Munere witheliwa onipiyoni wa guwo yenyu mpimo wapameene, wodhalene, wokiddeleleya ni orahiyaga. Mwaha mpimo mmodhave munapiminyuna akwinyu ni nyuwa munere opimiwana.”
39 Nuwindo, oliye wawaddela yoladdaniha: “Aliba ohoona podi weddihana aliba ohoonave? Yereya ndo aabilene kinaamorele mmuliddini?
40 Munaskola* kanamukwaranya namahudhiha aye, mbwenye yole anaahudhihiwe pamadhene anerege oligana ni namahudhiha aye.
41 Mwahaya bwaddi ogasugwa kase-kase eli mwintoni mwa ddibilo, wula ohandaga woona kugulu eli mwintoni mwawo?
42 Teto onanda addi omwaddela ddibilo wegihina: ‘Ddibilaga, kagihiye givenyihemo kase-kase mwintoni mwawo,’ wula mwintoni mwawo mugaali kugulu yantero? Namaleketha we! Orajhihe okumiha kugulu eli mwintoni mwawo windo onere wanda okumihamo kase-kase eli mwintoni mwa ddibilo.
43 “Kawo muthanko wapama onavaha dhowima dhabure, teto kawo muthanko wabure onavaha dhowima dhapama.
44 Muthanko watene onanoniwa mwaha dhowima dhewa. Motajhiha, kawo anamuhapa figu, newene uva muthanko wa mwinga.
45 Muthu apama anokumiha dhithu dhapama mmurimani mwaaye, mbwenye muthu abure anokumiha dhithu dhabure mmurimani mwaaye; mwaha mulomo waye onawoga ndhe dhidhanle mmurimani mwaaye.
46 “Vano, mwahaya bwaddi mugagithana, ‘Nabwiya! Nabwiya! Wula mwaheragana ele ginawogimi?
47 Muthu yole anadha wa miyo, ni anavuruwana madhu aaga, ni anavirihamo ginere wuwonihani muthu analiganiyena:
48 Analigana ni mulobwana aafunaga omaga nyumba yaye, anarajhiha otiba, ommaga aliserse aye va nibweni. Vano muzongwe nurubwa, muhinjhe othika ni kopolo nyumba ele mbwenye kiyandile obwanyula, mwaha oliye ahimaga pama.
49 Mbwenye, ole aniiwa ahiparihedhaga mabasa analigana ni mulobwana amagile nyumba yaye vathayani, ahimutibele alisersi. Muhinjhe nuudhala othika pamadhene nyumba ele, ofiyedha obwanyuwa yatene.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Mulugu a kopolo dhatedhene.”
^ Obe: “namahudhera.”
