Dhilebiwe ni Lukaji 7:1-50
7 Numala owoga ni muthithi ole waathu, oliye odhowa oKafarnawu.
2 Wengo ahikalawo mudhaari dhaala anamasogolela aanyakoddo aali muredda vanlubale, ahanle neena nuukwa; nabwiye oomudhivela vanlubale mudhaari yola.
3 Namasogolela aanyakoddo nuwiwa owoga wodhela Yesu, waruma anamaholela angasi-angasi a Mujudewu wihina yamulobe adhe anvulumuse mudhaari aye.
4 Aliwa nunfwanya Yesu wambela ompigireyela yegihina: “Oliye anunlela nikavihero nenyu nabwiyani,
5 mwaha oliye onodhivela nlogo nehu teto ohunimagela sinagoga yehu.”
6 Nuwindo, Yesu odhowa naliwa. Mbwenye, yaddamelaga vaade vaye, namasogolela ole aanyakoddo waruma akwaye wihina yamwaddele yegihina: “Nabwiyani, kamuthuwathuwe, mwaha kagifwanelele wuwakelani vaade vaga.
7 Bumwahaya gidhe giwonege wihina kagifwanelele odha ogumana ni nyu. Mbwenye mwawoge madhuve baahi, mudhaari aaga anere ovulumuwa.
8 Mwaha ni miyoya ginothongiwa ni gihikanna atoropa aaga enagiwelela, gamuruma mmodha gegihina: ‘Kadhowa!’ oliye anodhowa, gamwerela mmodhaya gegihina: ‘Kadha wuno!’ oliye onodha ni gawoga ni mudhaari aaga gegihina: ‘Keerana ela!’ oliye onowerana.”
9 Yesu nuwawiwa madhu ala, otikina ni owoga ni muthithi ole waathu wamuhara egihina: “Miyo ginowuwaddelani gegihina: Kaginanfwanye muthu owIzarayeli anna nroromelo ninlubale nowindala.”
10 Athu ale yarumiwe nuuhogolowela vaade, enfwanyile mudhaari ole agaali mugumi.
11 Numala, Yesu omaga olenddo odhowa sidadi yo Nayi, vano anamahara aye ni muthithi waathu okala vamodha nuliye mulenddoni.
12 Mudhidhi yole aaddamelaga musiwo wa sidadi* yele, wafwanya athu egamwihinse muthu okwa* eyagana ode, amaye yanna mwaana mmodha baahi. Ohiya eyo, yaali amamukwele. Teto muthithi munlubale waathu wa sidadi yele wavelelaga.
13 Yesu nuumona, omweddela thagaraga ni owoga nuliye egihina: “Kuwunle kamaala.”
14 Voharela waddamela ni wadahinya maakaya, vano ale yamutheba wimela. Nuwindo oliye owoga egihina: “Muzombwe, anawoga di miyo: Kavenya!”
15 Mwanookwa ole okarati ni wambela owoga, vano Yesu wavahedha amaye.
16 Athu aatene wambela woova ni omuthithimihaga Mulugu yegihina: “Ohukumelela namavuhulela munlubale vaari vehu,” vano: “Mulugu ohubuwela nlogo naaye.”
17 Muthenga ola wodhela oliye ovuwa murudda dhatedhene dhooJudeya ni dhowaddamela.
18 Nuwindo anamahara a Juwawu omwaddela dhithu dhatedhene.
19 Juwawu wawithana anamahara aye abiili ni waruma wihina yamukohe Nabwiya yegihina: “Nabwiya, di Nyu Ajhehiwa Odha, obe nimujhehege mmodha?”
20 Aliwa nunfwanya, alobwana ale owoga yegihina: “Juwawu Namabaddiza anirumile wihina nukoheni akala nyu: ‘Nabwiya, di Nyu Ajhehiwa Odha, obe nimujhehege mmodha?’”
21 Mudhidhi yole, oliye wavulumusa athu owinjhiva yanna dhiredda dhohiyana-iyana, dhiredda dhowopiha, yanna muzimu dhabure ni wafugula mento aaliba oohona.
22 Oliye wawakula egihina: “Mudhowe mwamwaddele Juwawu ethu moonilinyu ni mwiwalinyu: Aliba oohona enna woona, aliba ooragala enna weedda, aliba maranya enna ovulumusiwa, aliba oohiwa enna wiiwa, anookwa enna ovenyihiwa muukwani, ni athu oohawa enna olaleyiwa muthenga dhapama.
23 Oohagalala duule ahigifwannyena ethu yokwakwathusa.”
24 Aliba muthenga yarumiwe ni Juwawu nudhowa, Yesu wambela owoga ni muthithi waathu wodhela Juwawu egihina: “Mwaagele woona ddi mwiddeddereni? Woona bango enaddeguma nnipevo?
25 Kito, mwaagele woona ddi? Mwaagele omoona mulobwana aawanre malaya athima? Ale enawara malaya athima ni enna egumi yoreela enakala nyumba dha mamwene.
26 Ki-to mwebaribarene mwadhowele woona ddi? Omoona namavuhulela? Hee, miyo ginowuwaddelani oliye ohumukwaranya namavuhulela.
27 Ola diyole dholebela dhamuwogiwa dhegihina: ‘Kasugwa! Ginere omuruma muthu osogolo weenyu, wihina egeredhe dila yenyu!’
28 Ginowuwaddelani ebaribari: Mwa athu aatene yaale ebaliwe ni muhiyana kanabaliwege muthu munlubale omukwaranya Juwawu; mbwenye ole ali ooyeva Mumweneni wa Mulugu di munlubale omukwaranya oliye.”
29 (Nlogo naatene ni anamakukusa musoko, numala wawiwa madhu yala wonelamo wihina Mulugu dowogowa, mwaha yabaddiziwe ni Juwawu.
30 Mbwenye Afarizewu ni aliba yakovelele Malamulo opwaza efunelo ya Mulugu, mwaha kiyabaddiziwe nuliye.)
31 “Nlogo nna, ginaliganihe nnaani ki giladdanihe nnaani?
32 Nnaligana ni ahima ekaratile vamerkadu yawithana akwiwa yegihina: ‘Iyo nihoba palaza, mbwenye nyu kamwiinale; iyo nihuwibelani jhibo dhowukula, mbwenye nyu kamunlile.’
33 Nimakalelo mamodhave, Juwawu Batista adhile ahijhile pawu newene ahimung’wile vinyu, mbwenye nyu munawoga mwegi: ‘Oliye ohukanna demoniyu.’
34 Mwaana Muthu adhile ajhaga ni ang’waga, mbwenye athu enawoga yegihina: ‘Kamusugweni! Mujhani, namang’wa vinyu, akwaye banamakukusa musoko ni anamathega!’
35 Thotho enowoneya mowiwanana ni dhowera dhewa.”
36 Nfarizewu dhaala oomuwadda malabwene wihina ajhe vamodha nuliye. Oliye odhowa vaade va nfarizewu ole ni ojha vamodha ni oliye.
37 Muhiyana dhaala anoniwe sidadi yatene ninga namathega, onona wihina Yesu ali vaade va nfarizewu onojha nuwindo oliye othukula garafwa na alabasturu nanna makura oonukwela.
38 Okokora omanyaloni waye, oliye wambela wunla aanyethihaga manyalo ni mitori dhaye, ni afufuthaga ni mathithi aye. Ohiya eyo, owabejari manyalo a Yesu ni owakuthulela makura oonukwela.
39 Nfarizewu ole nuwoona ele eeriyena wambela owoga mmurimani mwaaye egihina: “Mulobwana ola mwebaribarene ahakale namavuhulela, eere omunona muhiyana baani anaahidda manyalo aye, wihina oliye namathega.”
40 Mwaha wa yeyo, Yesu omwaddela egihina: “Simawu, ehikala ethu ginafunimi wuwaddela.” Oliye omwakula egihina: “Kawogani namahudhiha!”
41 “Alobwana abiili yahinfiyari mulobwana dhaala anabolihiha korowa; mmodha ambolihe 500 denariyu, mmodhaya 50.
42 Woona wihina kiyanna korowa yomuliva, oliye walevelela aabiilene. Aabiilene yaala, anathabwa omudhivela duuvi?”
43 Simawu omwakula egihina: “Ginona wihina duule athambwiye omulevelela.” Oliye omwaddela egihina: “Ohakula pamadhene.”*
44 Nuwindo, oliye orugunuwa omusugwa muhiyana ole ni omukoha Simawu egihina: “Onomoona muhiyana ola? Miyo gihivolowa mba mwawo mbwenye we kugivahile manjhe owasuwana manyalo aaga. Mbwenye muhiyana ola ohanyethiha manyalo aaga ni mitori dhaye ni ohafufutha ni mathithi aye.
45 We newene kugivahile beju modha, mbwenye muhiyana ola, okuma vevale givolowilimi ofiyedha wora yela, oliye kanamaala wabejari manyalo aaga.
46 We kuwakuthulele makura vamuru vaaga, mbwenye muhiyana ola ohakuthulela makura oonukwela manyalo aaga.
47 Bumwahaya, ginowuwaddela gegihina: Naarive dhothega dhaye dhigathambwe winjhiva, dhihimala oleveleliwa, mwaha oliye ohugooniha odhivela winlubale. Mbwenye ole analeveleliwa dhothega dhaye vang’ono, anadhivela vang’ono.”
48 Vano Yesu owoga ni muhiyana ole egihina: “Dhothega dhawo dhihimala oleveleliwa.”
49 Ale yakiratile vameza vamodha nuliye wambela onong’ona vikaleliwa yegihina: “Mulobwana yoola baani anofiyedha olevelela dhoothega?”
50 Mbwenye Yesu owoga ni muhiyana ole egihina: “Nroromelo nawo nihuvulusa. Odhowe ni murenddele.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “luwani.”
^ Obe: “muruthu.”
^ Obe: “Ohutoriha pamadhene.”
