Dhili muwari mwa Marku 1:1-45
-
Olaleya wa Juwawu, namabaddiza (1-8)
-
Obaddiza wa Yesu (9-11)
-
Yesu onoweehiwa ni Saddana (12, 13)
-
Yesu wambela olaleya oGalileya (14, 15)
-
Anowasakula anamahara oobajha (16-20)
-
Yesu onowigara muzimu wabure (21-28)
-
Yesu onowavulumusa athu owinjhiva oKafarnawu (29-34)
-
Yesu alobelaga agaalivo yeka (35-39)
-
Muliba maranya anovulumusiwa (40-45)
1 Omambelelo wa muthenga dhapama dhinawoga wodhela Yesu Kiristu Mwaana a Mulugu:
2 Ninga dhilebiwe nnamavuhulela Izayiya egihina: “(Kasugwani! Ginere omuruma muthu osogolo weenyu, wihina egeredhe dila yenyu.)
3 Nihikala ndhu nnithana mwiddeddereni negihina: ‘Mmwegeredhele Yehova dila! Mogolele dila yaye.’”
4 Juwawu namabaddiza aali mwiddeddereni, alaleyaga obaddiziwa watonyihedha othwaruwa ni oleveleliwa dhothega.
5 Athu aatene a murudda woJudeya ni oJeruzale, yodhowa ogumana nuliye wihina ebaddiziwe* ni Juwawu Muhinjhe woJordawu ewogaga dhothega dhewa vaari vaathu.
6 Juwawu dhowara dhaye dhaali dha mooya a kamelu ni sintu na thebe noovadda, dhoojha dhaye dhaali kwaakwa* ni enwi yamukokolani.
7 Oliye alaleya egihina: “Ohukala muthu akopolo anadha osogolo waaga ogikwaranya miyo, teto miyo kaginafwanelela oworoma wihina gitapule sandaliya dhaye.
8 Miyo gubaddizani ni manjhe, mbwenye oliye anere wubaddizani ni muzimu wotxena.”
9 Malabo yaale, Yesu okuma oNazare odhowa oGalileya, obaddiziwa ni Juwawu muhinjhe woJordawu.
10 Atavuwagawene mmanjheni odhulu wahifuguwa, vano oliye woona muzimu omukitelaga ninga kangayiwa.
11 Voharela nahikuma ndhu negihina: “Oyo di Mwanaga, ginamudhivelimi; ni ginamurumedhimi.”
12 Mohilegela muzimu omukukusela mwiddeddereni.
13 Vano numala malabo 40 agaali mwiddeddereni, Ddiyabo omweha. Mwiddeddereni mmo mwahikala anenyama amukokolani, mbwenye angero yomukavihera.
14 Vano Juwawu nufugeliwa mukambura, Yesu odhowa oGalileya alaleyaga muthenga dhapama dha Mulugu
15 ni egihina: “Mudhidhi wajhehiwa ohufiya, Omwene wa Mulugu ohaddamela. Muthwaruwe, ni mukanne nroromelo ni muthenga dhapama.”
16 Eeddaga sere-sere ya Niya yo Galileya, oliye omoona Simawu ni Andere ddibile Simawu yaareyaga mathaviwa muniya mwaha yaali anamatota* oba.
17 Nuwindo, Yesu wawaddela egihina: “Mugiharege, mwaha ginafuna mukale anamameza aathu.”
18 Mohilegela aliwa wahiya mathaviwa, omuharaga.
19 Vasogolova, oliye omoona Tiyagu mwaana Zebedewu vamodha ni ddibile Juwawu egaali mmwanddeyani yasonaga mathaviwa,
20 mohilegela oliye wawithana. Nuwindo, aliwa omuhiya baabiwa Zebedewu mmwanddeyani vamodha nanamalaba ni omuharaga.
21 Aliwa odhowa oKafarnawu vamodha nuliye.
Vano nufiya nlabo na Sabadu, oliye ovolowa musinagoga ni wambela ohudhiha.
22 Muthithi waathu walivo otikina vanlubale mwaha makalelo aye oohudhiha, mwaha oliye ahudhiha oonihaga wi arumiwe ni Mulugu, mohiyana ni anamaleba.
23 Mudhidhi yole musinagoga mwewa ahikalamo mulobwana dhaala oonihiwa goyi ni muzimu wabure, oliye okuwa egihina:
24 “Yesu Munazareno onafuna ddi ni iyo? Wadhela onitolosa? Miyo gihunona pamadhene wihina oli oweela a Mulugu!”
25 Mbwenye Yesu omusumulula egihina: “Kamaalawo, kakumamo mmwiilini mwaaye!”
26 Vano muzimu ole wabure, ommothiha mulobwana ole ni okuwa vanlubale, nuwindo okumamo mmwiilini mwaaye.
27 Mowindala athu aatene otikina niile yapadduwe, ni wambela wikoha vikaleliwa yegihina: “Elaya ddi? Makalelo maxa oohudhiha edhiile ovanene! Oliye ohukanna kopolo dhowigara muzimu dhabure, ni aliwaya enomwiwelela.”
28 Mowindo, dhithu dheriyena ovuwa mowaguva murudda dhatedhene dhoGalileya.
29 Nukuma musinagoga aliwa odhowa vaade va Simawu, Andere, Tiyagu vamodha ni Juwawu.
30 Mbogohaye Simawu akinantile vakamani mwaha aanna nipanddawe,* aliwa omwaddela Yesu.
31 Oliye odhowa valiye ni omwihiddela nlada onvenyiha. Oliye ovulumuwa, nuumala odhowa wapiyela yoojha.
32 Vati vaajaga oriba, athu waadhowana areddiwa ni amodha yonihiwa goyi naademoniyu;
33 athu aatene asidadi* yele otugumana vamusiwoni.
34 Nuwindo, oliye wavulumusa athu owinjhiva yanna dhiredda dhohiyana-hiyana, ni wawigara ademoniyu owinjhiva, mbwenye kaawenya wihina ewoge ethu, mwaha yahimunona wihina oliye di Kiristu.
35 Mambesi nduwa nihinakume, oliye ovenya ni odhowa mburo wahaali athu, wambela olobela.
36 Simawu naathu amodha yaali nuliye odhowa onvedaga
37 aliwa nunfwanya, owoga yegihina: “Nabwiyani, athu aatene enna wuvedani.”
38 Mbwenye oliye wawakula egihina: “Ndoweni mburo mmodha, sidadi dhowaddamela wihina miyo galaleye, mwaha siyeyo gidhelimi.”
39 Oliye odhowa alaleyaga musinagoga mwewa ni murudda dhatedhene dhoGalileya awigaraga ademoniyu.
40 Agaali wengo, muliba maranya dhaala omwaddamela, omukokorela ni omuloba egihina: “Nabwiyani, mwafuna, givulumuseni.”
41 Nuwindo, oliye omweddela thagaraga, ni omutapulela nlada mulobwana ole, omudahinya, ni owoga egihina: “Miyo ginofuna! Vulumuwa.”
42 Vohilegela maranya ale orimela, oliye ovulumuwa.
43 Nuumala Yesu omuruma wihina adhowege,
44 ni omukongomedha egihina: “Pole-pole onaamwaddele muthu, mbwenye odhowe wagumane nnamakutha, ovelele nvaho wawo mowiwanana ni malamulo a Moyizeji wihina aliwa ekanne onamoona.”
45 Mbwenye ahinasuse, mulobwana ole wambela ovuwiha ni wawaddela athu ele yampadduwele, ofiyedha Yesu ohukanna makalelo oovolowa musidadi, mbwenye akalesa ode mburo wahinaviresa athu owinjhiva. Naarive dhigaali ndo, athu amurudda dhatedhene yoodha mburo valiye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Mbalaga.”
^ Obe: “anamameza.”
^ Obe: “febiri.”
^ Obe: “aluwani.”
