Dhili muwari mwa Marku 10:1-52
10 Yesu nukuma vevale odhowa murudda dhaali manddile ooJudeya, kobela emodha ya muhinjhe woJordawu, dila yanabili muthithi ole waathu otugumana vaaliye. Oliye obajha wahudhiha, ninga eresiye.
2 Afarizewu amodha omwaddamela wihina emwehe, ni omukoha yegihina enowenyeya mulobwana omwalana ni mwariye.
3 Oliye wawakula egihina: “Moyizeji uwaddenleni ddi?”
4 Aliwa wakula yegihina: “Moyizeji ahenya wihina mulobwana aafunaga omwalana ni mwariye anvahe pethe, indo amurume wi adhowege.”
5 Mbwenye Yesu wawakula egihina: “Mwaha wowumma murima weenyu bumwahaya adhe ulebelegeni malamulo ala.
6 Mbwenye omambelelowene ‘Mulugu ahimpaddusa mulobwana ni muhiyana.
7 Bumwahaya mulobwana anere wahiya ababe ni amaye,
8 vano aabilene ekale mwiili mmodha,’ bumwahaya kinakala athu abiili mbwenye mwiili mmodha baahi.
9 Mowindala yele amagile Mulugu, muthu katapule.”
10 Nuuhogolowela vaade, anamahara aye omukoha muselu mmodhave.
11 Oliye wawaddela egihina: “Yole anaamwalane ni mwariye anodhowa omutela mmodha ohukuma mba,
12 teto akala muhiyana anoomwalana ni mamune anodhowa oteliwa ni mulobwana mmodha ohukuma mba.”
13 Athu wambela wadhana anamwani wihina aatapulele nlada, mbwenye anamahara aye wasumulula.
14 Yesu nuwawoona aliwa yeragana ndo, otikina vanlubale ni owoga egihina: “Kaahiyeni anamwani ayo edhe wa miyo mwaha Omwene wa Mulugu bwaathu ninga yala.
15 Ginowuwaddelani ebaribari: Ole ahinakele Omwene wa Mulugu ninga mwaana, kanaavolowe mumweneni.”
16 Oliye waparela anamwani ale mmadani mwaaye ni wambela wareeliha aatapulelaga malada aye.
17 Akumaga mburo yole, mulobwana dhaala ofiya athamagaga, okokora vamentoni vaye omukoha egihina: “Namahudhiha apama, gerena ethu baani wihina gaakele egumi yohimala?”
18 Yesu omwakula egihina: “Mwahaya bwaddi ogagithana apama? Kaawo muthu apama ahili Mulugu baahi.
19 We ohaanona malamulo enihina: ‘Kumpe muthu, kukume mba, kuwiye, kuvahe onamoona wowoota, kumwinkedhe muthu, waarihe ababo ni amawo.’”
20 Mulobwana ole omwaakula egihina: “Namahudhiha, miyo ginowerana dhithu dhatedhene wambela ezombwe yaga.”
21 Yesu omusugwa, nuudhivela, oliye owoga egihina: “Ehikala ethu emodha enuhalela onahoweliwe werana: Kadhowa, wagulihe dhatedhene onniwena ni wavahe korowadha athu oohawa, wamala onere okanna dhoreela odhulu; vano odhe okale namahara aaga.”
22 Mbwenye yowakula ya Yesu omuhiya ookukumuwene, oliye odhowaga ookwerebeyene mwaha ahikanna dhoreela dhowinjhiva.
23 Yesu nusugwa dhipaddi dhatedhene, oliye owoga ni anamahara aye egihina: “Kinakale ethu yokweya athu enna korowa ovolowa Mumweneni mwa Mulugu!”
24 Mbwenye anamahara aye otikina mwaha madhu awogiliye. Yesu wawaddelave egihina: “Anaaga, kinakale ethu yokweya ovolowa Mumweneni mwa Mulugu!
25 Enere okweya kamelu ovolowa ponyongo ya singano ohiya muthu ooreela ovolowa Mumweneni mwa Mulugu.”
26 Vano aliwa othabwa otikinawa ni omukoha yegihina: “Anavuluwe baani?”
27 Yesu wasugwa pamadhene aliwa ni owoga egihina: “Moonelo waathu eyo kinenyeya, mbwenye monelo wa Mulugu, kahi yoyo, mwaha dhithu dhatedhene wa Mulugu dhinowenyeya.”
28 Peduru omwakula egihina: “Kasugwani, iyo nihimala ohiya dhithu dhatedhene wuharani.”
29 Yesu owoga egihina: “Miyo ginowuroromelihani gegi: Kaawo muthu anahiye nyumba yaye, addibile, arogoliye, amaye, ababe, anaaye obe mundda dhaye, mwaha waaga ni mwaha wa muthenga dhapama,
30 ahakela okunamo mudhidhi yola, nyumba, addibile, arogoliye, amaye, anaaye, mundda dhaye, ni oharahariwa ni osogolo egumi yohimala.
31 Mbwenye owinjhiva eli owambela enaakale oogomihedha; teto oogomihedha enaakale owambela.”
32 Egaali mulenddoni, edhowaga oJeruzale, Yesu okala osogolo wa anamaharaye, aliwa otikina vanlubale mbwenye ale yahara wambela woova. Dila yanabili, oliye wawithanela anamaharaye kumi nabili okwibi wambela wawaddela dhithu dhimodhave dhafuna ompadduwela;
33 “Nvuruwane, nnadhowa oJeruzale, Mwaana Muthu anere opelekiwa mmadani mwanddimuwa aanamakutha ni anamaleba. Aliwa enere omuthonga wihina apiwe,
34 ni enere ompeleka mmadani mwa athu amalogo, wihina emunyemule, emuturele maara, emutxapule ni empe, yamala malabo mararu avenyihiwe.”
35 Tiyagu ni Juwawu amwaana Zebedewu, omwaddamela ni omuloba yegihina: “Munerele ethu nnafunihu wulobani.”
36 Vano Yesu wakoha egihina: “Munafuna guwereleni ddi?”
37 Aliwa omwakula yegihina: “Nnaloba wihina nikarati mumweneni mweenyu mmodha moono woojha ni moono weemara.”
38 Yesu wawakula egihina: “Nyu kamunonne ethu munalobinyu. Nyu munere wanda ong’wela kopo modhave ginafunimi ong’wela obe nyu munere obaddiziwa ni makalelo mamodhave ginabaddiziwimi?”
39 Aliwa wakula yegihina: “Iyo nnere wanda.” Nuwindo Yesu owoga naliwa egihina: “Nyu munere wanda ong’wela kopo emodhave ginafunimi ong’wela ni obaddiziwa ni makalelo mamodhave ginabaddiziwimi.
40 Mbwenye okarati moono waaga woojha obe moono waga weemara anenya kahiyo miyo; mburo ndha annyaya baale Ababa yawegeredheliwa.”
41 Anamahara ale 10 nuwiwa muselu ole, aliwa watikina anamahara ale abiili Tiyagu ni Juwawu.
42 Mbwenye Yesu wawithana ni owoga egihina: “Nyu muhunona wihina anamathonga eelabo enathonga nlogo mowiwanana ni efunelo yewa, teto anamathonga anlubale enowagonjhiha athu enaalamuliwa.
43 Nyu kamukale ndo; mbwenye ole anafuna okala munlubale vaari veenyu akale mudhariya,
44 teto ole anafuna okala owambela vaari veenyu akale mudhariya.
45 Woona ninga Mwaana Muthu kadhele olabiwa mbwenye adhele olaba ni ovelela egumaye wihina awobole anamwinjhi.”
46 Nuwindo aliwa ofiya oJeriko. Vano Yesu ni anamahara aye vamodha ni muthithi munlubale wakuma oJeriko onfwanya Bartimewu (mwaana Timewu), mulobwana oohawa* ni ohoona agakaratile sere-sere ya dila.
47 Oliye nuwiwa wihina Yesu muNazareno davira, oliye wambela omwithana egihina: “Yesu mwaana Davidi kageddeleni thagaraga!”
48 Nuwindo, muthithi ole waathu wambela omusumulula ni oruma wihina amaalewo, mbwenye oliye othabwagave omwithana egihina: “Mwaana Davidi, geddeleni thagaraga!”
49 Vano Yesu wimela ni owoga egihina: “Kamwithaneni.” Aliwa omwithana mulobwana ole ohoona ni omwaddela yegihina: “Olibe murima! Kavenya, oliye onowuwithana.”
50 Oliye wakuguula malayaaye, ovenya mowaguva, odhowa vaali Yesu.
51 Nuwindo, Yesu omukoha egihina: “Onafuna wihina guwerele ddi?” Muliba ohoona ole omwakula egihina: “Raboni,* gikavihereni wihina goonege.”
52 Vano Yesu omwaddela egihina: “Kadhowaga, nroromelo nawo nihuvulumusa.” Vohilegela mento aye wambela woona ni wambela omuhara dila adhowiye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Alobesa korowa mu dila.”
^ Obe: “Namahudhiha.”
