Dhili muwari mwa Marku 14:1-72
-
Anamakutha enompanganela ompa Yesu (1, 2)
-
Yesu anokuthuleliwa makura oonukwela (3-9)
-
Judasi anomuguliha Yesu (10, 11)
-
Paskwa ogomihedha (12-21)
-
Wiitiwa wa Mathanga a Nabwiya (22-26)
-
Yesu anovuhulela wihina Peduru anere omukodda (27-31)
-
Yesu anolobela oJetisemani (32-42)
-
Yesu anomagiwa (43-52)
-
Othongiwa wa Yesu Musinediriyu (53-65)
-
Peduru anomukodda Yesu (66-72)
14 Ehalaga malabo menddi wihina afiye Paskwa ni Mathanga a Pawu dhohukanna Emela. Anddimuwa aanamakutha ni anamaleba wambela omusayela nimakalelo ooxaga wihina emuhidde ni empe.
2 Mowindala, yowoga yegihina: “Kanimuhidde mudhidhi wa mathanga; wihina nnatatamule muladdu ni nlogo.”
3 Agaali oBetaniya, ajhaga vaade va Simawu muliba maranya, ofiya muhiyana dhaala ni garafwa na alabasturu mwaali makura oonukwela ni ookwima, yasasanyiwe ni nardu, yahataganyihiwe niithu. Oliye ofugula garafwa nne na alabasturu wambela omukuthulela vamuru.
4 Mwaha wa yeyo, amodha wambela owoga vikaleliwa ootakaleliwene yegihina: “Makura ala oonukwela enongeliwe ddi ebewene?
5 Mwaha makura ala oonukwela yere ogulihiwa muthengo wowakwana 300 denariyu, korowadha evahiwe aliba oohawa!” Ethu erilena muhiyana ole watakalela vanlubale.
6 Mbwenye Yesu owoga egihina: “Mwahaya bwaddi mugamunyonya muhiyana ola? Ethu agereliye sapama.
7 Mwaha nyu malabwene munookalesa naaliba oohawa, mwafuna podi wawerela opama, mbwenye kamunakalege malabo aamatene ni miyo.
8 Oliye erilena ele andiliye werana; oliye ohaguva okuthulela makura oonukwela mwiili waaga, oonihaga okoyiwa waaga muukwani.
9 Ginowuwaddelani ebaribari: Mburo bu mburo winalaleyiwe muthenga dhapama wapela elabo yatene, ethu erilena muhiyana ola enere owogiwa, ubuweliwaga oliye.”
10 Vano Judasi Iskariyoti, mmodha wa anamahara ale kumi nabili, odhowa wa anddimuwa aanamakutha wihina ampeleke mmadani mwewa.
11 Vano aliwa nuwiwa yeyo, ohagalala ni opaganya onvaha korowa dha parata. Okuma labo nenne odhowa osogolo osayelaga mudhidhi wofwanelela wihina amugulihe.
12 Labo noobajha na Mathanga a Pawu dhohikanna Emela, labo naalemeliwe ovaha mukutho wa paskwa, anamahara aye omukoha yegihina: “Nabwiyani munafuna wihina nawegeredhe waani mathanga a paskwa?”
13 Nuwindo, oliye waaruma anamahara aye abiili egihina: “Mudhowe musidadi, anere wufwanyani mulobwana dhaala athukunle muno wa manjhe. Mmuharege yoyo,
14 vano nyumba anavolowiye, muwoge ni mwanamuralaya mwegihina: ‘Namahudhiha onokoha egihina: “Sala yaaleddo wihina gimujhevo paskwa ni anamahara aaga siivi?”’
15 Oliye anere wuwonihani sala enlubale eli odhulu, yowegeredhiwene. Vano, mwawegeredhe mathangaya venvo.”
16 Nuwindo, anamahara aye odhowa musidadi mune, ni ofwanya dhatedhene ninga mwawogeliye, vano aliwa wawegeredha mathanga a paskwa.
17 Vati vigarimbe, oliye ofiya ni anamahara aye kumi nabili.
18 Vano ejhaga vameza, Yesu wawaddela egihina: “Ginowuwaddelani ebaribari, mmodha wa nyu anajha vamodha ni miyo, anere ogiguliha.”
19 Mwaha wa yeyo aliwa wukuuwa vanlubale, kadda muthu obajha omukoha egihina: “Nabwiya, nerege di miyo?”
20 Oliye wawakula egihina: “Di mmodha wa nyu 12, yole anajha ni miyo mutijelani muna.
21 Mwaha wi Mwaana Muthu onodhowa, ninga dholebela dhinawogiwa wodhela oliye, mbwenye ginomukubanyedha ole anamugulihe Mwaana Muthu! Yakale yapama muthu yoyo ahibaliwawene.”
22 Ejhagave, Yesu othukula pawu, olobela, nuwindo ogwaddanya, wagawela anamahara aye egihina: “Kathukulani mujhe; ela enatapulela mwiili waaga.”
23 Ni werana emodhave, othukula kopo, olobela, ni wavaha aliwa, aatene ong’wa.
24 Oliye wawaddela egihina: “Ela enatapulela ‘nikame naaga na nipangano,’ nnakuthuliwe ni nnakavihere athu owinjhiva.
25 Miyo ginowuwaddelani ebaribari: Kaginadha gimuhogolowela omung’wa vinyu anakuma muthanko wa uva, ofiyedha labo ginadhimi gimung’we vinyu muxa, Mumweneni mwa Mulugu.”
26 Nuumala wiiba jhibo, aliwa odhowa Mwango Woolivera.
27 Vano, Yesu wawaddela egihina: “Aatene nyu munere okwakwathuwa, mwaha dholebela dhinawoga dhegihina: ‘Ginere omporosa namakukulaya, vano mambilaya ebalalesiwe.’
28 Mbwenye gavenyihiwa muukwani, ginere ogumana ni nyu oGalileya.”
29 Vano, Peduru omwakula egihina: “Naarive aatene ekwakwatuwe, miyo kaginadha gikwakwathuwa.”
30 Yesu omwaddela egihina: “Ginowuwaddela ebaribari: Peeno, hee, emahiyu yela, mutubi ahinunle* dila biili, onere ogikoodda dila tharu.”
31 Mbwenye Peduru okalelave ntidi owoga egihina: “Naarive ehoweleyaga okwa vamodha ni nyu, miyo kaginukoddeni.” Anamahara aye amodhaya owoga emodhave.
32 Vano Yesu ofiya vamodha naliwa mburo onithaniwa Jetisemani, ni owoga ni anamahara aye egihina: “Mukarati vevala, miyo ginadhowa wule galobele.”
33 Oliye omuthukula Peduru, Tiyagu ni Juwawu, wambela wukuuwa ni osimwela vanlubale.
34 Oliye wawaddela egihina: “Gihithabwa wukuuwa, gihanle vang’ono wihina gikwe. Muhale vevala ni mukale mento.”
35 Nususedha vang’ono osogolo, oliye okokora, oworomela vati ni wambela olobela wihina dhenyeya mudhidhi ole worusa wahinfwanye.
36 Oliye owoga egihina: “Aba, Babani, nyu munoowedha dhithu dhatedhene, susihani kopo ela vamentoni vaaga. Kayereye efunelo yaga, mbwenye yereye efunelo yenyu.”
37 Oliye ohogolowa ni wafwanya egonaga, vano owoga ni Peduru egihina: “Simawu, onogona? Kuwanna kopolo yokala mento newene wora modha?
38 Mukale mento ni mudidele olobela, wihina muhimorele muwehiwani. Ebaribarene, muzimu onofuna, mbwenye mwiili oli wokwerebeyene.”
39 Oliye osusavo dila yanabili ni olobela, aavirisedhaga madhu mamodhave.
40 Ohogolowa dila yanabili, wafwanya egonaga, mwaha mento yera wanyemela, bumwahaya kiyandile omwakula.
41 Ohogolowa dila yanatharu ni wawaddela egihina: “Mudhidhi ninga yola munogona ni munna withuwa! Baahi! Ohufiya mudhidhi! Mwaana Muthu anopelekiwa* mmadani mwa anamatheega.
42 Kavenyani, kabeni ndhowege. Kasugwani! Anna ofiya ole anagiguliha.”
43 Vohilegela, Yesu awogagave, mmodha wa anamahara aye kumi nabili ithaniwa Judasi, odhana muthithi waathu ogaaparele masupadda ni mmiri dhewa.* Aliwa yarumiwe ni anddimuwa aanamakutha, aanamaleba ni aanamaholela a nlogo.
44 Namaguliha ole ahimala opangana naaliwa egihina: “Yole ginambejarimi di yoyo; mummage, mmuthukule ni munamuthawihe.”
45 Numwaddamela Yesu oliye owoga egihina: “Rabi!” nuwindo onvaha beju.
46 Nuwindale aliwa omuhidda Yesu ni ommaga.
47 Mudhidhi yole, mmodha waaliwa aali ni muthithi yole oweta supadda naaye, omugwadda nibaru mudhaari a namakutha munlubale.
48 Nuwindo, Yesu owoga naaliwa egihina: “Nyu mudhele ogimaga ni masupadda ni mmiri dhenyudhene ninga gere okala mbava?
49 Malabo amatene gakalesa ni nyu mutempulu gihudhihaga mbwenye kamugimagile. Dhatedhene ndho, dhereye wihina dhakwanele Dholebela.”
50 Vano anamahara aye omuhiya yekaye, aliwa othawa.
51 Vano muzombwe dhaala awanre baahi dhowara dha linyu oojajala, wambela wahara mundduli, mbwenye aliwa numoona ofunaga ommaga,
52 mbwenye oliye wakuguulela yowara yaye ya linyu othawa madave.
53 Athu ale omuthukulela Yesu wa namakutha munlubale, vano anddimuwa aatene aanamakutha, anamaholela ni anamaleba otugumana.
54 Mbwenye Peduru oomuhara wolapelawene ofiyedha oddemulela vathaddo va namakutha munlubale; nuufiya oliye okarati ni anamalaba, woothaga mootho.
55 Anddimuwa aanamakutha ni Sinediriyu yaatene yowasayela athu wihina evahe onamoona wowoota wodhela Yesu, wamuthukulele opiwa, mbwenye kinfwannye muthu.
56 Mwebaribarene athu owinjhiva yovaha onamoona wowoota wodhela oliye, mbwenye onamoona wewa kuwiwanana.
57 Ohiya eyo, athu amodha yovenya ni yovaha onamoona wowoota wodhela oliye yegihina:
58 “Iyo nihimwiwa awogaga egihina: ‘Miyo podi obwanyula tempulu ela emagiwe naathu, muwari mwa malabo mararu gimage emodha, yahinamagiwe ni mada aathu.’”
59 Mbwenye naarive egawogile ndo onamoona wewa kuwaali webaribari.
60 Vano namakutha munlubale ovenya ni omukoha egihina: “We kunaakula ethu? Yowakula yawo siivi wodhela athu ala enuwinkedhiwa?”
61 Mbwenye Yesu kaakunle ethu. Nuwindo, namakutha munlubale ovenya ni omukohave dila biili egihina: “We oli Kiristu, Mwaana a Mulugu Oothithimiheya?”
62 Yesu omwakula egihina: “Hee, dimiyene, nyu munere omoona Mwaana Muthu agakaratile moono woojha wa kopolo ni adhaaga mmuraboni wodhulu.”
63 Mwaha wa yeyo namakutha munlubale otala dhowara dhaye ni owoga egihina: “Mwahaya bwaddi nigahowela anamoona?
64 Nyu muhiwa oliye aruwanaga dhithu dhotaleleya. Moonelo weenyu buuvi?” Aliwa wakula yegihina oliye afwanelele okwa.
65 Amodha wambela omuturela maara, omukunela wintoni, ni empwadulaga* yegihina: “Kamuwoge! Uvande baani, vano numala omuukutha atoropa ootiribunale omuthukula.
66 Vano Peduru agakaratile ode, vathaddo, ofiya mudhaari dhaala a mwanamuhiyana a namakutha munlubale.
67 Numoona Peduru oothaga, oliye omusugwa pamadhene ni owoga egihina: “Ni weya waali ni Yesu, Munazareno.”
68 Mbwenye oliye omukoodda egihina: “Kagimunonne mulobwana yoyo onamuwogiwe,” nuwindo oliye okumela musiwo mmodha wavathaddo.
69 Dila yanabili mudhaari a mwanamuhiyana omoona ni owoga naathu ale yaali vevale egihina: “Ola di mmodha aanamahara aye.”
70 Dila yanabili oliye omukoodda. Nuuvira mwanamudhidhi ale yaali vevale owoga ni Peduru yegihina: “Mwebaribarene ni weya weddesa nuliye mwaha we oli mugalilewu.”
71 Mbwenye oliye wambela wiwulumela ni alibelaga egihina: “Miyo kagimunonne mulobwana yoyo munamuwoginyu!”
72 Vohilegela mutubi wunla dila yanabili, vano Peduru wubuwela ele awogile Yesu egihina: “Mutubi ahinunle dila biili, we onere ogikoodda dila tharu.” Oliye wukuuwa vanlubale ni wambela wunla.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “ohunibe.”
^ Obe: “Onogulihiwa.”
^ Obe: “Gulumbo dhewa.”
^ Obe: “envahaga makofi.”
