Dhili muwari mwa Marku 4:1-41
4 Vasogolova oliye obajha ohudhiha sere-sere ya niya, vano muthithi waathu otugumana waddamela vaaliye. Nuwindo, oliye ogwela mmwanddeyani, okarati ni okala volapela vang’ono naaliwa, mbwenye muthithi waatene waathu wimenle sere-sere ya niya.
2 Ni owahudhiha dhithu dhowinjhiva alabihedhaga dholaddaniha. Ahudhiha egihina:
3 “Kavuruwanani: Namalima omaruwa wihina amidhe*.
4 Amidhaga, thanga dhimodha omorela sere-sere ya dila, vano odha balame oddoddelavo.
5 Thanga dhimodha omorela vamabweni vaali thaya vang’ono, omela mowaguva mwaha thaya kayinjhivilevo.
6 Mbwenye nduwa nuwooba onyala ni okwa mwaha kadhanna musisi.
7 Thanga dhimodha omorela vamwingani, vano mwinga ndhe nuwunnuwa ohoga ni kuhuvaha dhowima.
8 Dhimodha omorela thaya yapama, nuwunnuwa obajha ovaha dhowima, dhimodha ovaha 30, dhimodha ovaha 60 ni dhimodha ovaha okwaranya 100.”
9 Oliye wenjhedhedha egihina: “Ole anna mabaru owiwa avuruwane.”
10 Vano agahanle yeka, ale yaamwapenle odha vamodha ni anamahara aye obajha omukoha wodhela dholaddaniha ndhe.
11 Oliye wawakula egihina: “Nyu muhuvahiwa ofuru wowonelamo dhoviteya dhotaleleya dha Omwene wa Mulugu, mbwenye aliwa kinna ofuru yoyo, bumwahaya ngahudhiha gilabihedhaga dholaddaniha,
12 mwaha enosugwa, mbwenye kinoona, enowiwa, mbwenye kinonelamo; teto aliwa kidha ethwaruwaga ni kidha eleveleliwa.”
13 Ohiya eyo, oliye wenjhedhedha egihina: Nyu kamunoonelamo yoladdaniha yela; ki munande addi wonelamo dholaddaniha dhimodha?
14 “Namaala anna waala madhu.
15 Vano thanga ndhe dhamorele sere-sere ya dila, enatapulela ale eniwa muthenga mbwenye Saddana odha oddulamo ele yaaliwe mmurimani mwewa.
16 Nimakalelo mamodhave, ele yaaliwe vanibweni ni thaya vang’ono enatapulela ale enawiwa madhu enowarumedha mowaguva nuuhagalala.
17 Mbwenye woona wihina kadhanna musisi, dhinolegela mudhidhi vang’ono, mbwenye yakumelela makathamiho obe oharahariwa mwaha wa madhu aliwa okwakwathuwa.
18 Teto dhikalawo dhimodha dhaliwe vamwingani. Ndha dhinatapulela ale enawiwa madhu,
19 mbwenye munigwa wa elabo ela vamodha ni kopolo dhowoota dhinna dhoreela dha mwilaboni ela, ni munigwa wa dhithu dhimodha dhinobibiddela ni dhinowahoga madhuya, vano okala muthu ahinavaha dhowima.
20 Omagomihedhowa, bewu yaaliwe thaya yapama enatapulela ale enawiwa madhu, warumedha ni enovaha dhowima 30, dhimodha 60 ni dhimodha ovaha okwaranya dila 100.”
21 Wawaddelave egihina: “Athu yahiddiha panti enokunela obe enapweha mukukutuni mwa kama? Kinapwehiwa mburo wootama wihina emoneyege?
22 Bumwahaya, kayiwo ethu yowipiteya ehinooneye, newene kayiwo ethu yoviteya ehinadha enoniwa.
23 Ole anna mabaru owiwa avuruwane.”
24 Oliye wawaddelave egihina: “Mpwasedhe pamadhene dhithu muniwinyu. Mpimo mmodhave munapiminyuna athu amodha ni nyuwa munere opimiwana, ni munere wenjhedhedhiwa.
25 Mwaha ole anna anere ovahiwave ni anere wenjhedhedhiwa okunamo, mbwenye ole ahinna naarive nileya anniyena anere waakiwa.”
26 Nuwindo, oliye wenjhedhedhave egihina: “Mwaha Omwene wa Mulugu onaligana ni mulobwana amidhile thanga dhaye vathayani.
27 Oliye onoogona mahiyu ni onovenya mambesi, nuwindo mmidhodha omela ni wunnuwa, naarive ahinonne makalelo dhimenliwa ni dhunnuwaliwa.
28 Vang’ono vang’ono thaya enovaha dhowima yekiwa: enambela wunnuwa, vasogolova omaga muhubu, vogomihedha mangalaya wambela withwa.
29 Mbwenye mangalaya* yambela withwa ni wafiya mudhidhi wohadda oliye orepamo ni kalongaye.”
30 Oliye wenjhedhedhave egihina: “Omwene wa Mulugu nnaliganihe ninddi, nnaladdanihe ni musibe baani?
31 Onaligana ni thanga ya mostarda ethabwile oyeva okwaranya thanga dhatedhene dha mwilaboni yavati dhinaaliwa.
32 Mbwenye yaaliwa enowunnuwa okala muthanko munlubale okwaranya muthanko dhimodha ni okanna murasi* dhinlubale, mwemmo balame dhodhulu dhinafwanyiwamo murunti ni dhinamagiwamo dhitunjhidhiwa.”
33 Alabihedhaga musibe dhowinjhiva ninga dhendha, owawaddela madhu a Mulugu ofiyedha venvo yandiwa wonelamo.
34 Mwebaribarene kaavo ethu awogiye ahiladdanihe, mbwenye owatapulelamo anamahara aye yakalavo yekiwa.
35 Labo nenne, vati viribaga, oliye wawaddela anamahara aye egihina: “Kabeni naabuwele kobela emodha.”
36 Nuumala opaganya muthithi ole waathu, aliwa omuthukula naaleya yaali vamodha nuliye mmwanddeyani, ni dhahikalawo mwanddeya dhimodha dhathanana naaliwa.
37 Vano okumelela nipevo ninlubale muniya, manjhe wambela ovolowa mmwanddeyani, nuwindo mwanddeyaya wambela oddadda.
38 Mbwenye oliye aali mundduli mwa mwanddeya agonaga. Nuwindo aliwa odhowa onvenyiha ni omwaddela yegihina: “Namahudhiha, kamunoona wihina nihanle nenaa nuukwa?”
39 Nuwindo oliye ovenya, osumulula nipevo nne ni owoga nniya egihina: “Omaaleyewo! Ni okurumuwe!” Nipevo nne okurumuwa ni okalawo omaleya winlubale.
40 Oliye wakoha egihina: “Mwahaya bwaddi mugathabwaga woova? Nivanove kamunna nroromelo?”
41 Mbwenye aliwa ofwanyiwa woova winlubale ni wambela owoga vikaleliwa yegihina: “Mulobwana yoola baani? Ofiyedha nipevo nniya omwiwelelaga.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “aale.”
^ “tirugu amaga muhubu enaharela bi mangalaya.”
^ Obe: “mujhindda.”
