Dhili muwari mwa Marku 6:1-56
6 Oliye omaruwa odhowa elabo aabaliwiye, anamahara aye omuharaga.
2 Nufiya labo na Sabadu oliye wambela wahudhiha musinagoga, vano athu owinjhiva yanvuruwana yootikina yegihina: “Mulobwana yola adhilena waani thotho dhendha? Mwahaya bwaddi adhe avahiwege thotho ndha ni agawerana matikiniho manlubale ni madaye?
3 Ola kahi karapintero, mwaana Mariya ddibileya kahi Tiyagu Juze, Judasi ni Simawu? Arogoliyeya kahi yala eli vamodha ni iyo?” Nuwindo aliwa wambela okwakwathuwa mwaha wa oliye.
4 Mbwenye Yesu wawaddela egihina: “Namavuhulela kanathithimihiwa elabo yaye, naamudhaye newene vaade vaye.”
5 Ni kawerena matikiniho manlubale murudda yole, ehili watapulela nlada aredda vang’ono ni wavulumusa.
6 Mwebaribarene Yesu ahitikina vanlubale mwaha aliwa ohukanna nroromelo. Ni aheedda murudda dhatedhene dhowaddamela ahudhihaga.
7 Nuwindo, oliye wawithana anamaharaye kumi nabili waruma abiili-abiili ni wavaha kopolo dhowigarana muzimu dhabure.
8 Ohiya eyo wawaddela wihina yahithukule ethu mulenddoni mwewa, ohuli mukogodho baahi — newene pawu, newene thumba na dhoojha, newene yahipwehe korowa musintuni —
9 ni wawaddela wihina eware sandaliya mbwenye enaathukule dhowara dhewa.
10 Ohiya eyo, wawaddela egihina: “Nyumba si nyumba munafiyinyu mukarati venvo ofiyedha omaruwa.
11 Mburo bu mburo muhunakeliwinyu obe ehinavuruwaniwa muthenga weenyu, mwavenyaga mburo yoyo, mutate nthubi na manyalo enyu, wihina okale onamoona weewa.”
12 Numaruwa vevale aliwa wambela walaleya athu wihina ethwaruwe,
13 aliwa yowawigara ademoniyu owinjhiva, ni yowadholiha makura aredda owinjhiva ni yowavulumusa.
14 Vano mwene Erodi wiiwa wodhela Yesu mwaha ndina naaye nahithabwa ovuwa, ni athu yowoga yegihina: “Juwawu, Namabaddiza, ohuvenyihiwa muukwani, bumwahaya agawerana matikiniho manlubale.”
15 Mbwenye amodha yawoga yegihina: “Oyo di Eliyaji.” Amodha yawoga yegihina: “Oyo namavuhulela analigana ni namavuhulela mmodha akale.”
16 Mbwenye Erodi nuwiwa yeyo oliye owoga egihina: “Juwawu, ole gimugwaddilimi musolo, eere ovenyihiwa.”
17 Mwaha vobajhavene Erodi ahimuhidda Juwawu ommaga onvokedha mukambura, mwaha womutela Erodiya mwaadha ddibile Filipi.
18 Mwaha Juwawu oomwaddela egihina: “Nabwiya, kinenyeya omutela muhiyana a ddibilinyu.”
19 Bumwahaya, Erodiya omukoyela ntxiga Juwawu ni oomugana ninga ampe, mbwenye kaanda.
20 Erodi oomoova Juwawu mwaha ahinona wihina aali muthu owogowa, oweela ni oombarela. Aawogaga, onvuruwana pamadhene ni kaanona ethu yowera mwaha dhowera dhaye dhoomudhivela.
21 Mbwenye labo dhaala nofwanelela, Erodi wawegeredha mathanga owubuwela labo noobaliwa waye, ni wawithanelavo alobwana athima, anamaholela aanyakoddo ni alobwana oovuwa oGalileya.
22 Mwaana Erodiya ovolowa ni wiina, oliye omuhagalasa vanlubale Erodi naale yajha vamodha nuliye. Mwene owoga nnamwali ole egihina: “Podi oloba ethu onafuniwe, ginere wuvaha.”
23 Hee, oliye olibela egihina: “Ethu-siithu onaagilobiwe, podi okala omwene waga ginere wugawelawo.”
24 Nuwindo, okuma odhowa wakoha amaye egihina: “Gilobe ddi?” Aliwa omwakula yegihina: “Musolo wa Juwawu, Namabaddiza.”
25 Numala, oliye othamaga odhowa omuloba mwene egihina: “Nabwiyani ginafuna vohilegela mugivahe musolo wa Juwawu Namabaddiza, mbandejani.”
26 Naarive eyo egamukule vanlubale, mwene kandile okoodda yolobaye mwaha wa dhithu alibeliye ni mwaha waathu awithaniye.
27 Vano mwene omuruma munyakoddo aye mowaguva wihina adhena musolo wa Juwawu. Odhowa mukadeya mwemmo mwaliye, ogwadda musoloya
28 odhana mbandejani. Oliye onvahedhela namwali ole, vano namwali ole odhowa wavahedha amaye.
29 Anamahara aye nuwiwa muselu yoyo, odhowa othukula muruthu waye odhowa ovita mmahame.
30 Vano arumiwi odhowa otugumana vaali Yesu ni omwaddela dhithu dhatedhene yeriliwana ni yahudhihiwa.
31 Oliye wawaddela egihina: “Kabeni, ndhowe naaje mburo nikalewo yekihuwo wihina nithuwe vang’ono.” Athu owinjhiva yodhowa ni yoodha, aliwa kiyanna mudhidhi wowithuwa newene woojha ethu.
32 Nuwindo aliwa omaruwa ni mwanddeya, odhowa mburo wihinakala athu wihina ekalewo yekiwa.
33 Vano athu wawoona emaruwaga, athu owinjhiva onona wageleliwa. Athu aatene yakuma sidadi yele wahara ni moddo, ni okala oobajha ofiyawo.
34 Nuwindale, ekitaga mmwanddeyani mune woona muthithi ni muthithi waathu, vano wambela waweddela thagaraga mwaha yakala ninga mambila yahinna namakukula. Oliye wambela wahudhiha dhithu dhowinjhiva.
35 Vati vahiribaga, anamahara aye omwaddamela ni owoga yegihina: “Mburo ola kunakaliwa teto vati viiriba.
36 Mwawaddele athu ala wihina yagule dhoojha musidadi ni murudda dhowaddamela.”
37 Nuwindo Yesu wawakula egihina: “Nyuwene mwaavahe yoojha.” Anamahara aye omukoha yegihina: “Ndhowe nagule pawu dha muthengo 200 denariyu, naavahe athu ala wihina ejhe?”
38 Oliye wakoha egihina: “Munna pawu ngasi? Kadhowani moone!” Egamanle woona, aliwa owoga yegihina: “Ninna pawu tanu, ni oba biili.”
39 Vano oruma wihina muthithi waatene okarati vamaanini makuru-makuru.
40 Nuwindale aliwa okarati makuru amodha 100 amodha 50.
41 Nuwindo othukula pawu tanu ni oba biili, osugwa odhulu ni olobela. Numala, othukula pawu ndhe ogwaddanya wavaha anamahara aye, wihina anamahara aye yagawele athu yaali vevale, ni ogwaddanya oba ndhe biili wagawela athu aatene.
42 Nuwindo athu aatene ojha ni orubala,
43 ni oddoddela pawu dhahanle odhaliha muddanga 12 ni obadha dhahanle.
44 Athu aatene yaajhile pawu ndhe yahakwana 5000.
45 Nuwindo, mohulegela, oliye waruma anamahara aye wihina yagwele mmwanddeyani ni esongole, yaabuwele kobela emodha murudda wo Betizayida, wula oliye apaganyaga muthithi ole waathu.
46 Nuupaganya muthithi ole waathu oliye ogwela vamwangoni wihina alobele.
47 Vati vigarimbe, mwanddeya ofiya vaari va niya, mbwenye oliye ohala wewule yekaye.
48 Woona wihina yahikanna makathamiho ootxapa mwanddeyaya mwaha wa nipevo nakopolo naafwanyile, vati vaajaga osa* oliye odhowa ogumana naaliwa, eeddaga vadhulu va niya, mbwenye ahanle vang’ono wihina aakwaranye.
49 Numoona Yesu eeddaga vadhulu vaniya aliwa owoga yegihina: “Nnoroha!” mwaha aatene numoona yahirurumuwa.
50 Mbwenye mohulegela oliye owoga naliwa egihina: “Mulibe murima! Kamoove, dimiyo.”
51 Nuwindo oliye ogwela mmwanddeyani vamodha naaliwa, nipevo omaala. Mwaha wa yeyo aliwa otikina vanlubale,
52 mwaha kayonelemo yotapulela wodhela pawu ndhe, mmurimani mwewa yaali ehinonelemo.
53 Numala wabuwa aliwa ofiya oJenezare ni osayela mburo oseyihavo mwanddeyiwa.
54 Mbwenye ekitagawene mmwanddeyani, athu wawoona.
55 Muthithi ole waathu weedda murudda waatene ni wambela wathukula areddiwa yaapwehiliwa vamaakani vano waadhowana wengo waali Yesu.
56 Mburo dhatedhene aviriyemo musidadi obe mburo dhimodha yowapweha areddiwa mmerkadu, ni yomuloba wihina ehidde yowara yeleve baahi. Ni aatene yahidda yowara yaye yoovulumuwa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Mawora 3 a mahiyu ofiyedha 6 a mambesi nduwa nnakumiwa.”
