Dhili muwari mwa Marku 8:1-38
8 Malabo yaale wahitugumana muthithi mmodha munlubale, mbwenye aliwa kiyanna ethu yoojha. Nuwindo oliye wawithana anamahara aye ni wawaddela egihina:
2 “Ginoweddela thagaraga muthithi ola waathu, mwaha eli ni miyo malabo ala mararu teto kinna ethu yoojha.
3 Miyo gaaruma wihina edhowege mmavaade mwewa egavoliwe dala, enookwa mudila, mwaha amodha edhele wolapelawene.”
4 Mbwenye anamahara aye omwakula yegihina: “Mburo yola wahinakaliwa nnafwanye waani pawu dhowakwana muthithi yola waathu?”
5 Vano oliye wakoha egihina: “Munna pawu ngasi?” Aliwa wakula: “Ninna tanu nabili.”
6 Ni oruma wihina muthithi ole waathu wi okarati vati. Othukula pawu tanu nabili, olobela, numala ogwaddanya ni wavaha anamahara aye, vano anamahara aye ogawela muthithi waatene waali vevale.
7 Ohiya eyo yahikanna mwana oba vang’ono, vano numala olobela wawaddela wihina yagawele.
8 Nuwindo ojha, orubala, nuddoddela pawu dhahanle odhaala muddanga tanu nabili dhinlubale.
9 Yahikalavo athu owakwana 4000. Nuwindo oliye wapaganya.
10 Vohilegela oliye ogwela mmwanddeyani naanamahara aye ni ofiya murudda woDalamanuta.
11 Nufiya wengo, afarizewu efunaga wihina emwehe omwaddamela wambela okangana nuliye emulobaga yintelelo yodhulu.
12 Nuwindo oliye ovumela vadhulu ni owoga egihina: “Mwahaya bwaddi nlogo nna nigasayela yintelelo? Miyo ginowuwaddelani ebaribari, nlogo nna kannonihiwe yintelelo newene modha.”
13 Vano oliye wahiya, ogwela mmwanddeyani, wabuwela kobela emodha.
14 Nuwindo, aliwa oddiwala othukula pawu ni kiyathukunle ethu mmwanddeyani ehili pawu modha.
15 Yesu wawaddela egihina: “Mukale mento; pole-pole ni emela yaafarizewu ni emela ya Erodi.”
16 Vano aliwa obajha okangana vikaleliwa mwaha ohuthukula pawu.
17 Nunona yakanganeliwa oliye wakoha egihina: “Munakanganela ddi mwaha ohuthukula pawu? Nivanove kamwiwale ni kamonelemo? Murima dhenyu kadhinanda wonelamo?
18 ‘Naarive muganna mento kamunoona, naarive muganna mabaru kamuniwa?’ Kamunubuwela
19 muddanga mingasi dhodhaladhene mwaddoddelinyu, nugwaddanya pawu ndhe tanu yaajhile athu 5000?” Omwakula yegihina: “Kumi nabili.”
20 Obe pawu ndhe tanu nabiili yaajhile athu owakwana 4000, muddanga mingasi mwaddoddelinyu ni pawu dhahanle?” Omwakula yegihina: “Tanu nabili.”
21 Nuwindo, wakoha egihina: “Nivanove kamunonelemo?”
22 Nufiya oBetizayida aliwa omudhelana mulobwana dhaala ohoona ni omuloba wihina amutapulele nlada naaye.
23 Oliye opareela nlada na mulobwana ole ohoona omuthukulela mburo wolapela wa murudda yole. Numuturela maara mmwintoni mwaaye omparela nlada ni omukoha egihina: “Onowanda woona ethu-siithu?”
24 Mulobwana ole osugwa odhulu ni omwakula egihina: “Ginowawoona athu, mbwenye enakala ninga muthanko dhineedda.”
25 Dila yanabili Yesu ompara mulobwana ole mmwintoni mwaaye vano oliye wambela woona pama. Mento aye wambela woona, oliye woonaga dhithu dhatedhene.
26 Nuwindo oliye omuruma wihina adhowege vaade vaye egihina: “Kuhogolowele mmuruddani.”
27 Yesu ni anamahara aye odhowa murudda woSezareya ooFilipi, egaali mudila oliye wakoha anamahara aye egihina: “Athu amodha enubuwela wihina miyo gili aani?”
28 Aliwa omwakula yegihina Juwawu Batista; mbwenye amodha enihina muli Eliyaji teto amodha enihina muli namavuhulela.”
29 Oliye wakoha egihina: “Ki nyu, munihina miyo gili aani?” Peduru wakula egihina: “Nyu muli Kiristu.”
30 Nuwindo wakongomedha wihina ehimwaddele muthu mmodha wodhela oliye.
31 Ohiya eyo oliye wambela wahudhiha wihina Mwaana Muthu eere woonihiwa goyi dila dhowinjhivadhene ni eere okoddiwa nanamaholela, anddimuwa aanamakutha ni anamaleba, eera ndo apiwe labo nanatharu avenyihiwe muukwani.
32 Mbwenye muselu ola oliye awonge vaddedderenivene aatene yiiwaga. Mbwenye Peduru omuthukulela okwibi wambela omusumulula.
33 Mwaha wa yeyo oliye orugunuwa wasugwa anamahara aye ni omusumulula Peduru egihina: “Kasusedha ngo Saddanawe! Mwaha we kunna mubuwelo wa Mulugu mbwenye mubuwelo waathu.”
34 Oliye withana muthithi ole waathu vamodha ni anamahara aye ni wawaddela egihina: “Ole anafuna okala namahara aaga iikodde ni athukule ntxikwa naaye na goyi agiharegeve.
35 Ole anafuna ovulusa egumi yaye anere oyelela, mbwenye ole anayelele egumi yaye mwaha miyo ni mwaha wa muthenga dhixa anere ofwanya.
36 Mwebaribarene muthu anapuravo ddi ayelela egumi yaye mwaha wojhavo elabo?
37 Obe muthu anaalive ddi wihina avuluse egumi yaye?
38 Mwaha anagikalele manyazo vamodha ni madhu aaga vaari va nlogo nna nooraruwa* ni noothega, Mwaana Muthu anere omukalela manyazo muthu yoyo adhaaga munthithimihoni naaBabe ni angero oweela.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Nohiroromeleya.”
