Matewuji 10:1-42
10 Nuwindo, wawithana anamahara aye 12 wavaha kopolo dhowigarana muzimu dhabure, dhovulumusana dhiredda ni makathamiho ohiya-hiyana.
2 Anamaharayeya 12 baala: Simiyawu, anoniwe ni ndina na Peduru, ni ddibile Andere, Tiyagu mwaana Zebedewu ni ddibile Juwawu;
3 Filipi, Bartolomewu, Tome, Matewuji namakukusa musoko, Tiyagu mwaana Alfewu, Tadewu;
4 Simiyawu mukananita, Judasi Iskariyoti, vasogolova amugulihe Yesu.
5 Yesu waruma anamahara ale 12, ni wawaddela egihina: “Munahare dila dha malogo mamodha newene munavolowe sidadi dhaaSamaritanu;
6 mbwenye mudhowe mwasayele mambila orimela, anlogo naamwaana Ezarayeli.
7 Mwadhowaga mwalaleyege mwegihina: ‘Omwene wodhulu ohaddamela.’
8 Mwavulumusege aredda, mwavenyihege anookwa, mwavulumusege aliba maranya ni mwawigarege ademoniyu. Nyu mwakenle mwamahala, bumwahaya mweregena mwamahala.
9 Kamurumedhe wakela oru, parata, newene kobere wihina mpwehe musintuni mweenyu,
10 teto mulenddoni mweenyu kamuthukule thumba na dhoojha, newene dhowara dhimodha, sandaliya, newene mukogodho mmodha, mwaha namalaba anofwanelela ovahiwa yoojha.
11 “Sidadi-si-sidadi munafiyinyu mmusayele ole anna efunelo, vano mukarati venvo ofiyedha omaruwa.
12 Mwafiya vaadeva mwalojhelege anamuralaya.
13 Anamuralaya yuwakelani pama, murenddele weenyu okale naaliwa; mbwenye yahuwakelani pama murenddele weenyu wuhogoloweleni.
14 Mburo-bu-mburo muhinakeliwinyu obe ehinavuruwaniwa muthenga weenyu, mwavenyaga nyumba yeyo obe sidadi yeyo, mutate nthubi namanyalo eenyu.
15 Ginowuwaddelani ebaribari: Labo Notoriha makathamiho enafuna wafwanya sidadi yeyo, enere okwaranya sidadi ya Sodoma ni Gomora.
16 “Miyo ginurumani ninga mambila vaari va mwiijhi. Mowindala, mukale ooxaga ninga nowa, mbwenye oowoma murima ninga kangayiwa.
17 Pole-pole naathu mwaha aliwa enere wuthukulelani mmatiribunaleni mwewa ni yutxapuleni mmasinagoga mwewa.
18 Teto munere othukuleliwa vamentoni vanamathonga ni vamamwene mwaha wa ndina naaga, wihina mwavahe onamona ni malogo aatene.
19 Mowindo, yuthukulani kamuthuwathuwe ni madhu munafuninyu wawoga obe ni makalelo munafuninyu owoga, mwaha mudhidhi yoyo munere ovahiwa madhu owawoga.
20 Mwaha anawoga kahi nyu mbwenye muzimu wa Babinyu bunawoga vamburoni veenyu.
21 Ohiya eyo, muthu nddibile enerege opanana oddibilave, babi anere ompa mwanaye, ahima enere wasadduwela makolwiwa ofiyedha wapa.
22 Teto, nyu munere widdiwa naathu aatene mwaha wa ndina naaga. Mbwenye anaavilele ofiyedha omakuthulo dinavulusiwe.
23 Mwaharahariwa sidadi ela muthawele sidadi emodha, ginowuwaddelani ebaribari: Kamunaafiyedhe olaleya sidadi dhatedhene dhoWizarayeli Mwana Muthu ahinafiye.
24 “Munaskola kanamukwaranya purusoraye, newene mudhaari kanamukwaranya nabwiye.
25 Enahoweleya sowi munaskola aliganege ni purusoraye, teto mudhaari aliganege nnabwiye. Akala muliba vaadeva ohithaniwa Saddana* ki wera athuya enakala vaade vevale kinere othabwihedhiwa?
26 Bumwahaya kamwawoove aliwa mwaha kayiiwo ethu yowipiteya ehinoneye, newene kayiiwo ethu yoviteya ehinadha enoniwa.
27 Ndhe ginuwaddelimini vayiihini, muwogege vowara, teto ndhe ginuwaddelimini obaruni, mudhowe mwalaleye nyumba ni nyumba.
28 Kamwawove ale enafuna wupani, mbwenye ehinanda obarela ejhehedhelo yokanna egumi osogolo, mbwenye mmoove ole anna kopolo dhowutolosani oJhehena.
29 Kadhinagulihiwa pera biili ni korowa modha? Naari dhigali ndo kidha emothela vati newene emodha, Babinyu ahinonne.
30 Teto mathithi ammuruni mweenyu ehimala okontariwa.
31 Bumwahaya, kamoove, nyu muhukanna thima okwaranya pera dhowinjhiva.
32 Vano, muthu yole anaarumedhe vaari vaathu wihina ali mwimodhani ni miyo, nimiyowa ginere omurumedha vamentoni va Ababa, eli odhulu, wihina ekale mwimodhani nuliye.
33 Mbwenye muthu yole anagikodde vaari vaathu, nimiyowa ginere omukodda vamentoni va Ababa eli odhulu.
34 Kamubuwele wihina gadhana murenddele elabo yavati, kagidhilena murenddele, mbwenye supadda.
35 Mwaha gidhile wamwalaniha athu: mwana mulobwana naababe, mwana muhiyana naamaye, teto nzaliye ni nzaliyaye.
36 Mwebaribarene amwiddani a muthu enakale yaale anakaliyena vaade vaye.
37 Ole anathabwa wadhivela ababe obe amaye ogikwaranya miyo, kanafwanelela okala namahara aaga teto ole anathabwa omudhivela mwanaye mwanamulobwana obe amwanamuhiyana ogikwaranya miyo kanafwanelela okala namahara aaga.
38 Ole ahinarumedha ntxikwa naaye na goyi ni ahinagihara, kanafwanelela okala namahara aaga.
39 Ole anafuna ovulusa egumaye anere oyelela, mbwenye ole anaayelele egumaye mwaha wa miyo, anere ofwanya.
40 “Ole anuwakelani, anagakela miyo, teto ole anagakela onamwakela Ole agirumile.
41 Ole anamwakela namavuhulela mwaha wokala namavuhulela anere wawakela mareeliho ooligana ni anamavuhulela, teto ole anamwakela muthu owogowa mwaha wokala muthu owogowa, anere wawakela mareeliho ooligana ni a muthu owogowa.
42 Yole ananvahe kopo emodha ya manjhe waathu yala ang’ono naarive egaali kopo emodha ya manjhe ooridha mwaha wokala namahara, ginowuroromelihani wihina anere wawakela mareeliho mowiwanana ni ethu yele eriliyena.”
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Ni Egerego, “Belzebu”. Namathonga aademoniyu.
